អ្នកជំនាញ៖ រដ្ឋាភិបាលមិនបានប្រើប្រាស់ផែនទីខុសពីរដ្ឋធម្មនុញ្ញទេ
លោកអ៊ុំ សំអាន តំណាងរាស្ត្រគណបក្សសង្គ្រោះជាតិ បានផ្សព្វផ្សាយលើបណ្តាញហ្វេសប៊ុកផ្លូវការរបស់លោកថា រដ្ឋាភិបាលកម្ពុជាបានប្រើប្រាស់ផែនទីខុសពីរដ្ឋធម្មនុញ្ញដើម្បីបោះបង្គោលព្រំដែនជាមួយនឹងប្រទេសវៀតណាម ប៉ុន្តែមន្ត្រីជំនាញព្រំដែនកម្ពុជា បានទាត់ចោលការចោទប្រកាន់របស់បក្សប្រឆាំងនេះ។
ចុះផ្សាយនៅថ្ងៃ៖
ស្តាប់ - ០២:៤៣
ការចោទប្រកាន់ពីតំណាងរាស្ត្រគណបក្សសង្គ្រោះជាតិសារជាថ្មីម្តងទៀត គឺជារឿងខុសទាំងស្រុង នេះគឺជាការបញ្ជាក់ពីលោកស្រី កុយ ពិសី អនុប្រធានលេខាធិការដ្ឋាននៃគណៈកម្មការព្រំដែនដែលបានថ្លែងឆ្លើយតបលោក អ៊ុំ សំអាននៅថ្ងៃសុក្រនេះ។ លោកស្រី កុយ ពិសី បានបញ្ជាក់ថារដ្ឋាភិបាលតែងតែប្រកាន់យកផែនទីបោនខ្នាត១លើ១០០ពាន់គឺជាគោលសម្រាប់ការចរចាជាមួយនឹងវៀតណាម។ ហើយសន្ធិសញ្ញាព្រំដែនជាមួយប្រទេសវៀតណាមកាលពីឆ្នាំ១៩៨៥នោះ ក៏កម្ពុជាបានប្រើប្រាស់ខ្នាត១លើ១០០ពាន់ដែរ។ កម្ពុជាបានប្រើផែនទីUTMខ្នាត១លើ ៥០ពាន់ដើម្បីមើលទីតាំងជាក់ស្តែងៗថ្មីៗប៉ុណ្ណោះ។
ទាក់ទងនឹងការប្រើប្រាស់ផែនទីនេះ លោក ហោង ណាំហុង រដ្ឋមន្រ្តីក្រសួងការបរទេសបានគូសបញ្ជាក់ថាកាលពីថ្ងៃទី២កញ្ញាថា កម្ពុជាប្រកាន់យកផែនទីបោនខ្នាត១/១០០ពាន់ ប៉ុន្តែបានប្រើប្រាស់ផែនទីផ្សេងៗដើម្បីការពារបូរណៈភាពទឹកដីកម្ពុជា។
សូមបញ្ជាក់ថា លោក អ៊ុំ សំអាន តំណាងរាស្ត្រគណបក្សសង្គ្រោះជាតិដែលកំពុងរស់នៅអាមេរិក តាមរយៈហ្វេសប៊ុកផ្លូវការរបស់គាត់ បានចោទរដ្ឋាភិបាលថា រដ្ឋាភិបាលបានប្រើប្រាស់ផែនទីUTM ខ្នាត 1/50.000 ផ្ទុយពីមាត្រា២នៃរដ្ឋធម្មនុញ។ ហើយបានស្នើឱ្យរដ្ឋាភិបាលនៃគណបក្សប្រជាជនកម្ពុជាបង្ហាញផែនទីUTM ខ្នាត 1/50ពាន់ ចំនួន៤០ផ្ទាំង និង សន្ធិសញាឆ្នាំ១៩៨៥ ដែលរដ្ឋាភិបាលបានប្រើប្រាស់សម្រាប់ដើម្បីបោះបង្គោលព្រំដែនជាមួយវៀតណាម។
លោកស្រី កុយ ពិសី បានស្នើឱ្យរដ្ឋាភិបាលចាត់វិធានការផ្លូវច្បាប់ចំពោះតំណាងរាស្ត្រគណបក្សប្រឆាំងរូបនេះ ព្រោះថាជាការបំប៉ោងរឿងព្រំដែន និងជាការមួលបង្កាច់។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានលើកឡើងថារដ្ឋាភិបាលនៅមិនទាន់មានចំណាត់ការនៅឡើយទេចំពោះការលើកឡើងរបស់លោក អ៊ុំ សំអាន នេះ ប៉ុន្តែសកម្មភាព និងការឃោសនាទាំងឡាយណាដែលធ្វើឱ្យប៉ះពាល់ដល់ដំណើរការនៃការអនុវត្តស្របច្បាប់របស់រដ្ឋាភិបាលគឺនឹងត្រូវទទួលខុសត្រូវចំពោះមុខច្បាប់។
សូមបញ្ជាក់ថានៅថ្ងៃទី៣ កញ្ញាម្សិលមិញរដ្ឋាភិបាលកម្ពុជាទើបតែបញ្ចប់ការផ្ទៀងផ្ទាត់ផែនទីជាលើកទី២ បន្ទាប់ពីប្រទេសបារាំងបានប្រគល់ផែនទីប៉ោនខ្នាត១/១០០ពាន់មកឱ្យកម្ពុជាផ្ទៀងផ្ទាត់ដើម្បីដោះស្រាយមន្ទិលសង្ស័យចំពោះការប្រើប្រាស់ផែនទីក្លែងក្លាយ។ លោក សុខ ទូច ប្រធានក្រុមស្រាវជ្រាវបញ្ហាព្រំដែន បានលើកឡើងថា បញ្ហាផែនទីក្លែងក្លាយគឺត្រូវបានបញ្ចប់ហើយក្រោយការផ្ទៀងផ្ទាត់ផែនទីជាមួយនឹងផែនទីពីអតីតអាណានិគមនិយមបារាំងដែលជាអ្នកគូសផែនទីឱ្យកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ