ឱសថក្លែងក្លាយនៅកម្ពុជាកំពុងបំផ្លាញសុខភាពប្រជាជនខ្មែរយ៉ាងស្ងៀមស្ងាត់
ចុះផ្សាយនៅថ្ងៃ៖
ស្តាប់ - ០៤:២៦
កាលពីប៉ុន្មានសប្តាហ៍មុន ប្រាក់ ធីតាបានធ្វើបទវិភាគស្តីពីគុណភាពសេវាសុខាភិបាលនៅកម្ពុជារួចមកហើយ ហើយនៅក្នុងនោះក៏រួមមានកត្តាជាច្រើនផងដែរ ដែលធ្វើឲ្យវិស័យសុខាភិបាលនៅកម្ពុជានៅមានកម្រិតនៅឡើយ។ នៅថ្ងៃនេះ ធីតា នឹងបន្តធ្វើបទវិភាគលើវិស័យសុខាភិបាលនេះដដែល ដោយផ្តោតទៅលើឱសថ ហើយជាឱសថក្លែងក្លាយ ដែលកំពុងតែចរាចរណ៍នៅលើទីផ្សារកម្ពុជា ហើយក៏កំពុងតែបំផ្លាញសុខភាពប្រជាពលរដ្ឋយ៉ាងស្ងៀមស្ងាត់ផងដែរ។
បើទោះបីជាគ្មានតួលេខច្បាស់លាស់ពីចំនួនឱសថក្លែងក្លាយនៅកម្ពុជាក៏ដោយ ក៏មន្ត្រីជំនាញដែលធ្វើការងារខាងផ្នែកត្រួតពិនិត្យផលិតផលក្លែងក្លាយនៅកម្ពុជាបានបញ្ជាក់ថា ចំនួនឱសថក្លែងក្លាយគឺមានចំនួនច្រើន ដោយយោងទៅលើការសិក្សាស្រាវជ្រាវក្នុងជំហានដំបូងរបស់ក្រុមមន្ត្រីជំនាញ និងអង្គការដែលធ្វើការងារពាក់ព័ន្ធខាងផ្នែកនេះ។
បើពិនិត្យមើលទៅ កម្ពុជាគឺជាប្រទេសប្រើប្រាស់ផលិតផលថ្នាំពេទ្យនាំចូលស្ទើរតែទាំងស្រុង ខណៈដែលក្រុមហ៊ុនផលិតថ្នាំពេទ្យនៅក្នុងស្រុកមិនសូវជាមានច្រើនប៉ុន្មាននោះទេ។ ហើយបើមានវិញក៏មិនមែនផលិតដើម្បីលក់នៅក្នុងស្រុកទាំងអស់នោះដែរ គឺនាំចេញជាង៥០%ឯណោះ។ ជាក់ស្តែងដូចជាក្រុមហ៊ុនផលិតឱសថ PPM ជាដើម គឺផលិតផលរបស់ខ្លួននាំចេញទៅកាន់បរទេសចំនួន៦០% ហើយទីផ្សារក្នុងស្រុកវិញគឺមានតែ៤០% ប៉ុណ្ណោះ។
បើនិយាយពីថ្នាំពេទ្យដែលត្រូវបាននាំចូលមកលក់នៅកម្ពុជាវិញ គឺមានការប្រកួតប្រជែងគ្នាខ្លាំងណាស់ខាងផ្នែកតម្លៃ។ ឧទាហរណ៍ថ្នាំប៉ារ៉ាមួយមុខ គឺមកពីបណ្តាក្រុមហ៊ុនផលិតជាច្រើន ហើយក៏មកពីប្រទេសផ្សេងៗគ្នាដែរ។ ថ្នាំខ្លះត្រូវបានផលិតឡើងដោយលួចចម្លងរូបមន្តគេទាំងស្រុង ហើយខ្លះវិញក៏ត្រូវបានផលិតឡើង ដោយកាត់បន្ថយសមាសធាតុផ្សំសំខាន់ៗផងដែរ ដើម្បីកាត់បន្ថយថ្លៃដើម ហើយទទួលបានប្រាក់ចំនេញខ្ពស់។
គ្រប់គ្នាសុទ្ធតែដឹងហើយថាថ្នាំពេទ្យ គឺជាអាវុធមុខពីរ ប្រសិនបើយើងប្រើប្រាស់វាមិនបានត្រឹមត្រូវនោះ។ ចុះទម្រាំប្រើប្រាស់ថ្នាំពេទ្យក្លែងក្លាយទៀតនោះ តើវាមានផលប៉ះពាល់យ៉ាងណាខ្លះទៅដល់សុខភាពរបស់ប្រជាជនខ្មែរ? នៅត្រង់ចំណុចនេះ វារឹតតែបង្ហាញកាន់តែច្បាស់ ថាហេតុអ្វីបានជាមនុស្សសម័យឥឡូវឈឺច្រើន ហើយឈឺជំងឺប្លែកៗម្ល៉េះ?
ចំណីអាហារផ្ទុកទៅដោយសារធាតុគីមីមួយផ្នែកហើយ ហើយថ្នាំពេទ្យក្លែងក្លាយនេះក៏កំពុងតែរួមចំណែកបំផ្លាញសុខភាពប្រជាពលរដ្ឋបន្តិចម្តងៗ ដោយមិនដឹងខ្លួន។ មនុស្សមួយចំនួនមិនអាចរស់ដោយគ្មានថ្នាំពេទ្យបាននោះទេ ហើយក៏ត្រូវប្រើជាប្រចាំផងដែរ ដើម្បីរក្សាស្ថានភាពជំងឺរបស់ខ្លួនឲ្យនៅសភាពធម្មតា។ ប៉ុន្តែករណីខ្លះប្រើយូរៗទៅ គឺកាន់តែច្រើនឡើងៗ។
អញ្ចឹងប្រជាពលរដ្ឋខ្លួនឯងគួរតែគិតពិចារណាឡើងវិញ ថាក្នុងករណីណាគួរតែប្រើថ្នាំពេទ្យ ហើយករណីណាមិនគួរប្រើនោះ ព្រោះថាផលប៉ះពាល់នៃការប្រើប្រាស់ថ្នាំពេទ្យក្លែងក្លាយនិងខុសវេជ្ជបញ្ជានោះ វាមិនបង្ហាញក្នុងពេលភ្លាមៗនោះទេ។ វាសំងំលាក់ខ្លួនក្នុងរាងកាយ ហើយបំផ្លាញសរីរាង្គណាមួយក្នុងខ្លួន។
ជាជំហានដំបូងប្រជាជនកម្ពុជាគួរតែយល់ដឹងឲ្យបានច្បាស់ពីការប្រើប្រាស់ថ្នាំពេទ្យ។ ប្រសិនបើដឹងថាជំងឺរបស់ខ្លួន ត្រូវនឹងថ្នាំណាមួយហើយនោះ អាចទៅរកទិញបានទៅតាមឱសថស្ថានដែលមានស្លាកយីហោត្រឹមត្រូវ។ ហើយនៅពេលដែលទិញថ្នាំក៏ត្រូវពិនិត្យមើលការវេចខ្ចប់ អក្សរនៅលើសំបកថ្នាំ និងកាលបរិច្ឆេទប្រើប្រាស់ឲ្យបានច្បាស់លាស់ផងដែរ។ ប៉ុន្តែបើមិនទាន់ដឹង ឬក៏មិនទាន់ច្បាស់ថាខ្លួនមានជំងឺអ្វីឲ្យប្រាកដនោះទេ ត្រូវទៅរកគ្រូពេទ្យពិនិត្យ និងពិគ្រោះជំងឺជាមុនសិន ដើម្បីទទួលបានវេជ្ជបញ្ជា ដើម្បីយកទៅទិញថ្នាំ ហើយប្រើទៅមានប្រសិទ្ធភាព។
ក្រសួងពាក់ព័ន្ធនានាគួរតែចូលរួមបង្កើនការអប់រំដល់ប្រជាពលរដ្ឋឲ្យបានយល់ដឹងកាន់តែច្បាស់ពីការត្រួតពិនិត្យមើលឱសថក្លែងក្លាយ តាមរយៈការផ្សព្វផ្សាយនានាតាមទូរទស្សន៍ វិទ្យុ និងបណ្តាញសង្គមហ្វេសប៊ុកជាដើម។ ការផលិតជាវីដេអូខ្លីចាក់ផ្សាយតាមទូរទស្សន៍ និងបណ្តាញសង្គមហ្វេសប៊ុក និងរឿងខ្លីចាក់ផ្សាយតាមវិទ្យុជាដើម។ ហើយត្រូវតែបន្តការផ្សាយឲ្យបានច្រើនគ្រប់គ្រាន់ ដើម្បីឲ្យប្រជាជនយល់ដឹង និងជ្រាបកាន់តែច្បាស់ពីការប្រើប្រាស់ និងផលប៉ះពាល់នៃការប្រើប្រាស់ឱសថក្លែងក្លាយ។
ក្រៅពីនេះក្រសួងពាក់ព័ន្ធនានា ដែលរួមមានដូចជាមន្ត្រីគយ មកពីក្រសួងសេដ្ឋកិច្ចនិងហិរញ្ញវត្ថុ មន្ត្រីត្រួតពិនិត្យផលិតផលក្លែងក្លាយ របស់ក្រសួងមហាផ្ទៃ និងមន្ត្រីមកពីក្រសួងសុខាភិបាល គួរតែពន្លឿនការងាររបស់ខ្លួនក្នុងបញ្ហានេះ ព្រោះថាមន្ត្រីទាំងអស់សុទ្ធតែបានដឹងហើយពីបញ្ហានេះ។ បង្កើនការត្រួតពិនិត្យនៅតាមឱសថស្ថាននានា មិនថា នៅក្នុងទីក្រុងភ្នំពេញនោះទេ គឺសូម្បីតែនៅតាមបណ្តាខេត្ត និងតំបន់ដាច់ស្រយ៉ាលនានាផងដែរ។ មន្ត្រីពាក់ព័ន្ធនានាគួរតែបង្កើនការយកចិត្តទុកដាក់ចំពោះសុខទុក្ខ និងសុខភាពរបស់ប្រជាពលរដ្ឋខ្លួនឲ្យបានកាន់តែច្រើនជាងពេលបច្ចុប្បន្ននេះ ព្រោះថាកម្ពុជាគឺជាប្រទេសកាន់លទ្ធិប្រជាធិបតេយ្យ។ អញ្ចឹងមន្រ្តីនានាគឺមានតួនាទីធ្វើការដើម្បីបម្រើរាស្រ្ត ដែលជាប្រជាជនរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ