អនាគតនៃវិស័យភាពយន្តខ្មែរ ស្ថិតក្នុងដៃផលិតករភាពយន្តជំនាន់ក្រោយ
ចុះផ្សាយនៅថ្ងៃ៖
ស្តាប់ - ០៥:០៣
ប៉ុន្មានឆ្នាំចុងក្រោយនេះ ផលិតករភាពយន្តថ្មីៗជាច្រើនរូប បានចូលប្រឡូកនៅក្នុងការផលិតភាពយន្តខ្លី ដើម្បីដាក់បញ្ចាំងតាមពិធីមហោស្រពភាពយន្តនានា។ ក្រៅពីដាក់បញ្ចាំងភាពយន្តនៅក្នុងព្រឹត្តិការណ៍មហោស្រពអន្ដរជាតិ ផលិតករខ្មែរមួយចំនួនទៀត បានប្រមែប្រមូលយកពានរង្វាន់នៅក្នុងការប្រកួតប្រជែងភាពយន្តពីក្រៅប្រទេស ត្រឡប់មកស្រុកវិញជាបន្តបន្ទាប់។ ការកើនឡើងទាំងបរិមាណនិងគុណភាពនៃផលិតករភាពយន្តជំនាន់ក្រោយដូច្នេះ ត្រូវបានគេមើលឃើញថា ជាក្ដីសង្ឃឹមនៃវិស័យភាពយន្តខ្មែរ។
នៅក្នុងមហោស្រពភាពយន្តថ្នាក់ជាតិ នាប៉ុន្មានឆ្នាំចុងក្រោយនេះ ខ្សែភាពយន្តដែលផលិតដោយផលិតករភាពយន្តខ្មែរជំនាន់ក្រោយជាច្រើនរឿង ត្រូវបានដាក់បញ្ចាំងឲ្យទស្សនាដោយឥតគិតថ្លៃ។ ជាខ្សែភាពយន្ត ដែលមិនមែនត្រឹមតែផលិតដោយជនជាតិខ្មែរប៉ុណ្ណោះទេ ប៉ុន្តែថែមទាំងជាខ្សែភាពយន្តដែលទទួលបានពានរង្វាន់ពីការប្រកួតប្រជែងខ្សែនៅក្រៅប្រទេសថែមទៀតផង។
នេះសរបញ្ជាក់ឲ្យឃើញថា កម្ពុជាមានផលិតករភាពយន្តជំនាន់ក្រោយប្រកបដោយគុណភាពច្រើននាក់ មិនចាញ់ប្រទេសជិតខាងនោះឡើយ។ មានមូលហេតុច្រើនយ៉ាង ដែលធ្វើឲ្យការផលិតភាពយន្តរបស់យុវជនខ្មែរ ចាប់ផ្ដើមពុះកញ្ជ្រោលឡើងប្រកបដោយគុណភាពដូច្នេះ។
ទី១៖ គឺវគ្គបណ្ដុះបណ្ដាលផលិតភាពយន្ត។ បើទោះបីជាកម្ពុជានៅមិនទាន់មានសាលាបង្រៀនផលិតភាពយន្តជាផ្លូវការយ៉ាងណាក្ដី ក៏ស្ថាប័នឯកជន និងអង្គការក្រៅរដ្ឋាភិបាលមួយចំនួន បានរៀបចំបង្កើតឲ្យមានវគ្គបណ្ដុះបណ្ដាល ឬជំរុំផលិតភាពយន្តជាបន្តបន្ទាប់។ វគ្គបណ្ដុះបណ្ដាលខ្លីៗអស់ទាំងនេះ បានផ្ដល់ឱកាសឲ្យអ្នកដែលចាប់អារម្មណ៍ពីភាពយន្ត ស្វែងយល់ពីបច្ចេកទេសចាំបាច់ទាំងឡាយ នៅក្នុងការផលិតភាពយន្ត។ ក្រៅពីនេះ ក៏មានផងដែរ កម្មវិធីទស្សនាភាពយន្ត កម្មវិធីជួបជាមួយផលិតករភាពយន្ត និងកម្មវិធីពិភាក្សាពីភាពយន្តនានា។ កម្មវិធីទាំងអស់នេះ បានរួមចំណែកលើកកម្ពស់ការយល់ដឹងរបស់ផលិតករវ័យក្មេង នៅក្នុងវិស័យភាពយន្តផងដែរ។
ទី២៖ គឺមហោស្រពភាពយន្ត។ ខុសពីពេលមុន ដែលផលិតករគ្មានកន្លែងដាក់បង្ហាញស្នាដៃរបស់ខ្លួន ឥឡូវ ផលិតករភាពយន្តខ្មែរ មានកន្លែងបង្អួតស្នាដៃរបស់ខ្លួនហើយ ទាំងនៅតាមមហោស្រពភាពយន្ត និងនៅតាមកញ្ចក់ទូរទស្សន៍។ ហើយជាពិសេស ខ្សែភាពយន្តដែលផលិតដោយស្នាដៃកូនខ្មែរ ទទួលបានការគាំទ្រ និងលើកទឹកចិត្តយ៉ាងច្រើនកុះករពីសំណាក់អ្នកទស្សនាថែមទៀតផង។
ជាក់ស្ដែង តាំងពីឆ្នាំ២០១០រហូតមក កម្ពុជាបានបង្កើតឲ្យមានមហោស្រពភាពយន្តអន្ដរជាតិជារៀងរាល់ឆ្នាំ។ មហោស្រពនេះ គឺជាព្រឹត្តិការណ៍ភាពយន្តដ៏សំខាន់ ក្នុងការផ្សព្វផ្សាយផលិតផលភាពយន្តក្នុងស្រុកយ៉ាងទំលំទូលាយ ទៅកាន់ឆាកអន្ដរជាតិ។ និយាយឲ្យស្រួលស្ដាប់ មហោស្រពភាពយន្ត គឺជាផ្សារ ដែលអនុញ្ញាតឲ្យផលិតករវ័យក្មេង បង្អួតបង្ហាញភាពយន្តដែលមានគុណភាពរបស់ខ្លួន ទៅកាន់សាធារណជន ទាំងជាតិ និងអន្ដរជាតិ។ ក្រៅពីនេះ វាក៏ជាវេទិកាផ្លាស់ប្ដូរបទពិសោធ និងចំណេះដឹងទៅវិញទៅមក រវាងផលិតករភាពយន្តខ្មែរ និងបរទេសផងដែរ។ ទន្ទឹមគ្នានេះ ប៉ុស្តិ៍ទូរទស្សន៍ខ្មែរមួយចំនួនក៏ធ្លាប់បានសហការជាមួយក្រុមកុនខ្មែរកូនខ្មែរ ដើម្បីបង្កើតឲ្យមានកម្មវិធីកុនខ្លីផងដែរ។ ជាកម្មវិធី ដែលចាក់បញ្ចាំងនូវខ្សែភាពយន្តខ្លីៗរបស់ផលិតករភាពយន្តជំនាន់ក្រោយនៅកម្ពុជា។ ទាំងនេះ បានធ្វើឲ្យផលិតករខ្មែរកាន់តែច្រើនឡើង ជាពិសេសយុវជន មានកម្លាំងចិត្តកាន់តែពុះកញ្ជ្រោលក្នុងការផលិតភាពយន្តប្រកបដោយគុណភាព។
ទី៣៖ គឺការប្រកួតប្រជែង។ ដោយសារតែការប្រកួតប្រជែងនេះហើយ ដែលធ្វើឲ្យផលិតករភាពយន្តខ្មែរ ព្យាយាមសម្រិតសម្រាំងស្នាដៃរបស់ខ្លួន ដើម្បីឈានទៅដណ្ដើមយកជ័យលាភី។ ការប្រកួតប្រជែងភាពយន្ត សកលភាវូបនីយកម្ម បានផ្ដល់ឱកាសដល់ផលិតករភាពយន្តខ្មែរ នាំយកកុនដែលខ្លួនផលិតបាន ឆ្លងដែនទៅប្រកួតជាមួយភាពយន្តដទៃទៀតនៅក្រៅប្រទេស។
ទាក់ទងនឹងការប្រកួតប្រជែងកុននេះ ឆ្នាំ២០១៤កន្លងទៅ អាចចាត់ទុកថា ជាឆ្នាំដ៏ល្អប្រសើរ សម្រាប់ខ្សែភាពយន្តខ្មែរ នៅលើឆាកអន្ដរជាតិ។ តាំងពីដើមឆ្នាំ រហូតដល់ចុងឆ្នាំ ខ្សែភាពយន្តរបស់ផលិតករខ្មែរមិនតិចជាង៤ទេ ដែលបានទទួលពានរង្វាន់ នៅក្នុងមហោស្រព និងការប្រកួតប្រជែងកម្រិតអន្ដរជាតិ។ ហើយនៅឆ្នាំ២០១៥ទៀតសោត ស្នាដៃរបស់ផលិតករភាពយន្តវ័យក្មងកម្ពុជាចំនួន៥នាក់ បានជាប់នៅក្នុងវគ្គចុងក្រោយ នៃការប្រកួតប្រជែងខ្សែភាពយន្តនៅអាស៊ីអាគ្នេយ៍។ ក្នុងចំណោមនោះ ផលិតករភាពយន្តខ្មែរ២នាក់បានទទួលជ័យលាភីភាពយន្តខ្លីល្អបំផុត លេខ១និងលេខ៣។ ដោយឡែក នៅក្នុងឆ្នាំ២០១៦នេះទៀតសោត ភាពយន្តខ្មែរចំនួន២ ត្រូវបានជ្រើសរើសយកទៅបញ្ចាំងនៅមហោស្រពភាពយន្តអន្ដរជាតិក្រុងកាន លើកទី៦៩ នៅប្រទេសបារាំង។ រឿងមួយមានចំណងជើងថា និរទេស ផលិតដោយលោក រិទ្ធី ប៉ាន់ និងមួយទៀតផលិតដោយលោក ដាវី ជូ ដែលមានចំណងជើងថា កោះពេជ្រ។
តាមរយៈការកើនឡើងទាំងបរិមាណនិងគុណភាពនៃផលិតករភាពយន្តជំនាន់ក្រោយដូច្នេះ អ្នកជំនាញមានសុទិដ្ឋិនិយមចំពោះអនាគតនៃវិស័យភាពយន្តខ្មែរ ថាអាចនឹងរីកលូតលាស់ទៅមុខបានប្រសើរជាងសព្វថ្ងៃនេះ។ ខណៈដែលផលិតករភាពយន្តជំនាន់ថ្មី ខិតខំសម្រិតសម្រាំងស្នាដៃរបស់ខ្លួនឲ្យមានគុណភាពកាន់តែប្រសើរ ទស្សនិកជនទាំងឡាយក៏គួរតែផ្ដល់តម្លៃ និងការលើកទឹកចិត្តឲ្យបានកាន់តែច្រើនថែមទៀត។ ព្រោះសូមកុំភ្លេចថា គឺការផ្ដល់តម្លៃនិងការលើកទឹកចិត្តនេះហើយ ដែលជាថ្នាំកម្លាំងសម្រាប់ផលិតករ ក្នុងការផលិតភាពយន្តឲ្យមានគុណភាពកាន់តែប្រសើរជាងសព្វថ្ងៃនេះទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ