កម្ពុជា ប្រារព្ធទិវាជាតិអំណានលើកដំបូង ក្រោមប្រធានបទ«បណ្តុះទម្លាប់អាន និងជម្រុញវប្បធម៌អាន»
ក្រសួងអប់រំយុវជន និងកីឡា នៅព្រឹកថ្ងៃទី ១១ ខែមីនានេះ បានរៀបចំទិវាជាតិអំណាន លើកទី១ នៅសាកលវិទ្យាល័យភូមិន្ទភ្នំពេញ ក្រោមប្រធានបទ«បណ្តុះទម្លាប់អាន និងជម្រុញវប្បធម៌អាន»។ ទិវាជាតិអំណាននេះ ប្រព្រឹត្តិឡើងក្នុងគោលបំណង ជំរុញវប្បធម៌ការអាននៅក្នុងចំណោមប្រជាជនកម្ពុជា ជាពិសេស សិស្សានុសិស្ស និងនិស្សិត នៅតាមបណ្តាគ្រឹះស្ថានសិក្សានានា ឲ្យកាន់តែមានភាពផុសផុល។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
ប្រទេសកម្ពុជា នៅថ្ងៃទី ១១ ខែមីនានេះ បានប្រារព្ធទិវាជាតិអំណានលើកដំបូង ក្រោមប្រធានបទ «បណ្តុះទម្លាប់អាន និងជម្រុញវប្បធម៌អាន» ដោយមានការចូលរួមពីសំណាក់ មន្រ្តីរាជការ បុគ្គលិកវិស័យឯកជន និងនិស្សិត ប្រមាណជា ២ពាន់នាក់។
បើតាម លោក ហង់ ជួនណារ៉ុន រដ្ឋមន្រ្តីក្រសួងអប់រំ បានថ្លែងពីគោលដៅនៃទិវាជាតិអំណាន ទិវានេះថា គឺជាការបណ្តុះទម្លាប់អាន ជម្រុញវប្បធម៌អាន លើកកម្ពស់សមត្ថភាពអាន និងតែងនិពន្ធ ដើម្បីអាចចូលរួមចំណែកការពារ និងពង្រឹងវប្បធម៌ខ្មែរ។
មិនត្រឹមតែប៉ុណ្ណោះ ការកំណត់យកថ្ងៃទី ១១ ខែមីនានេះ ក៏ដើម្បីរំឮកដល់ថ្ងៃប្រសូតរបស់ ព្រះមហាសុមេធាធិបតី ជួន ណាត (ជោតញ្ញាណោ) សម្ដេចព្រះសង្ឃរាជថ្នាក់ទី១ នៃគណៈមហានិកាយ នៃព្រះរាជាណាចក្រកម្ពុជា ដែលទ្រង់បានប្រសូតនៅថ្ងៃទី ១១ ខែមីនា ឆ្នាំ១៨៨៣។ សម្តេចព្រះសង្ឃរាជ ជួនណាត ជាបណ្ឌិតផ្នែកអក្សរសាស្រ្ត និងជាបុគ្គល ដែលបានចងក្រងវចនានុក្រមខ្មែរ សម្រាប់ប្រជាជនកម្ពុជា បានប្រើប្រាស់ និងសិក្សារៀនសូត្រ។
សូមរំឮកជូនថា កាលពីថ្ងៃទី ១៤ ខែកញ្ញា ឆ្នាំ២០១៥ រដ្ឋាភិបាលកម្ពុជា បានចេញអនុក្រឹត្យមួយកំណត់យកថ្ងៃទី ១១ ខែមីនា ជារៀងរាល់ឆ្នាំ ដើម្បីប្រារព្ធទិវាជាតិអំណាន បន្ទាប់ពីមើលឃើញថា ការអាននៅក្នុងចំណោមប្រជាជនកម្ពុជា នៅមានកម្រិតនៅឡើយ។
ព្រមជាមួយគ្នានេះ កាលពីដើមខែមីនា កន្លងទៅនេះ ក្រសួងអប់រំ យុវជន និងកីឡា បានចេញសេចក្តីអំពាវនាវមួយ ស្នើសុំឲ្យសាធារណៈជន ក៏ដូចជា ស្ថាប័នពាក់ព័ន្ធបរិច្ចាគសៀវភៅផ្សេង ទៅឲ្យគ្រឹះស្ថានសិក្សា នៅកម្ពុជា។ ការស្នើសុំដូច្នេះ ដោយសារ បណ្ណាល័យនៅទូទាំងប្រទេសកម្ពុជា ដែលមានរហូតទៅដល់ ៨៤៧០ មានតែសៀវភៅគោលដៅប៉ុណ្ណោះប៉ុន្តែ សៀវភៅអានបន្ថែមដើម្បីបំពេញតម្រូវការរបស់សិស្សានុសិស្ស គឺនៅមានភាពខ្វះខាតច្រើន។
យ៉ាងណាក៏ដោយ ដើម្បីធានាឲ្យវប្បធម៌នៃការអាននៅកម្ពុជា ប្រកបដោយប្រសិទ្ធិភាព និងចីរភាព សម្រាប់ឆ្នាំ២០១៧ និងឆ្នាំបន្តបន្ទាប់ទៀត ក្រសួងអប់រំ យុវជន និងកីឡា នឹងបង្កើតកម្មវិធីប្រឡងប្រណាំង ការអាន និទានរឿង ការស្មូត្រកំណាព្យ និងការតែងនិពន្ធ ឲ្យកាន់តែទូលំទូលាយបន្ថែមទៀត។ មិនត្រឹមតែប៉ុណ្ណោះ ក្រសួងអប់រំ ដែលជាសេនាធិការរបស់រដ្ឋាភិបាល ក៏នឹងបង្កើតគណៈកម្មការគ្រប់គ្រង ដឹកនាំ អនុគណៈកម្មការសម្របសម្រួល និងពិធីការ អនុគណៈកម្មការបច្ចេកទេសរៀបចំ ទិវាជាតិអំណាននេះ ដើម្បីពង្រឹងប្រសិទ្ធិភាព និងនិរន្តរភាព ឲ្យប្រែក្លាយទៅជាវប្បធម៌អំណាននៅកម្ពុជា។
បន្ថែមលើនេះ រដ្ឋមន្រ្តីក្រសួងអប់រំ លោក ហង់ ជួនណារ៉ុន ក៏បានធ្វើការអំពាវនាវ ឲ្យស្ថាប័ននានា រដ្ឋបាលថ្នាក់ក្រោម ព្រមទាំងអង្គការសង្គមស៊ីវិល ជួយបំផុសស្មារតី ទម្លាប់នៃការអានរបស់ប្រជាជនកម្ពុជា ឲ្យកាន់តែមានសក្តានុពល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ