កិច្ចប្រជុំត្រីភាគីស្ដីពីប្រាក់ឈ្នួលកម្មករឆ្នាំ២០១៦នឹងបន្តនៅថ្ងៃចន្ទខាងមុខ
បើគ្មានអ្វីប្រែប្រួលទេនោះនៅថ្ងៃចន្ទទី២៨កញ្ញាខាងមុខកិច្ចប្រជុំត្រីភាគីស្ដីពីប្រាក់ឈ្នួលកម្មករឆ្នាំ២០១៦នឹងត្រូវចាប់ផ្ដើម បន្ទាប់ពីទទួលបានការសម្រេចពីគណៈកម្មការប្រឹក្សាការងារក្រោយកិច្ចប្រជុំកាលពីថ្ងៃទី២៥កញ្ញា។ កិច្ចប្រជុំត្រីភាគីនៅថ្ងៃចន្ទខាងមុននេះជាកិច្ចប្រជុំដើម្បីកំណត់ប្រាក់ខែរួមមួយ មុនដាក់ជូនគណៈកម្មការប្រឹក្សាការងារពិនិត្យសម្រេចនៅថ្ងៃទី០៥ខែតុលាឆ្នាំ២០១។
ចុះផ្សាយនៅថ្ងៃ៖
ស្តាប់ - ០២:២៥
ក្រុមការងារបច្ចេកទេសត្រីភាគីដែលមានចំនួន១៦រូបមកពីភាគីនិមួយៗដូចជាក្រសួងការងារ សមាគមរោងចក្រកាត់ដេរនៅកម្ពុជា និង សហជីពនឹងជួបគ្នានៅថ្ងៃចន្ទទី២៨ខាងមុខ ។ ដោយការជួបនោះនឹងពិភាក្សាផ្អែកលើពីរចំណុចសំខាន់គឺកត្តាសេដ្ឋកិច្ចនិងសង្គមដើម្បីបង្ហាញតុល្យ ភាពរវាងគ្នានិងគ្នា។ ព្រោះការដំឡើងប្រាក់ឈ្នួលត្រូវគិតគូរពីជីវភាពរស់នៅរបស់កម្មករនិងផលលិតភាពនៃការងារ។ នេះបើតាមការបញ្ជាក់បន្ថែមរបស់លោក កាំង ម៉ូនីកា អគ្គលេខាធិការងសមាគមរោងចក្រកាត់ដេរនៅកម្ពុជា GMAC។
លោក កាំង ម៉ូនីកា បញ្ជាក់ទៀតថា ជាគោលការណ៍ក្រុមការងារត្រីភាគីបានឯកភាពគ្នាថា មិនលើកឡើងពីចំនួនតួលេខនៃការដំឡើងប្រាក់ខែនោះទេ ពោលគឺគិតជាភាគរយនៃការដំឡើងប្រាក់ខែវិញ។ ហើយក្រុមការងារបច្ចេកទេសត្រីភាគីបានឯកភាពគ្នាជាបណ្ដោះអាសន្នកំណត់យកថ្ងៃទី០៥តុលាដើម្បីឲ្យគណៈកម្មការប្រឹក្សាការងារប្រជុំពិនិត្យសម្រេចលើលទ្ធផលដែលខ្លួនបានជួបប្រជុំ។
លោក អាត់ ធន់ ប្រធានសហជីពប្រជាធិបតេយ្យកម្មករកាត់ដេរកម្ពុជាដែលគ្រោងទៅចូលរូមកិច្ចប្រជុំនេះបានឲ្យដឹងថា ចំពោះចំនួនតួលេខនិងភាគរយគិតជាប្រាក់សម្រាប់ដំឡើងជូនកម្មករមិនមានអ្វីខុសគ្នាទេព្រោះបំណងរបស់ក្រុមការងារត្រីភាគីគឺដើម្បីប្រយោជន៍កម្មកររស់នៅបានសមរម្យ។ ដូច្នេះសហជីពលោក អាត់ ធន់ នឹងលើកឡើងពីចំនួនប្រាក់បៀវត្សដែលផ្ដល់ឲ្យកម្មករចាប់ពី ១៥៨ ១៦៨ ១៧៨ ដុល្លារ ,ស្នើឲ្យនិយោជកពិនិត្យលើកម្មករប្រភេទដេស៊ីប៊ុងដែលការដំឡើងប្រាក់ខែរៀងរាល់ឆ្នាំត្រូវបានគេបំភ្លេច និង ស្នើទៅកាន់ភាគីរដ្ឋាភិបាលពិនិត្យមើលលើបញ្ហាទំនិញលើទីផ្សារជាដើម។
បើតាមលោក អាត់ ធន់ ប្រាក់ខែគោលកម្មករនាពេលបច្ចុប្បន្នមានចំនួន១២៨ដុល្លារ បូករួមនិងប្រាក់អត្ថប្រយោជន៍ផ្សេងទៀតក្នុងមួយខែ និយោជិកទទួលបានប្រាក់សរុប១៧១ដុល្លារ។
ជាការគត់សម្គាល់នៅរាល់ឆ្នាំដែលមានកិច្ចប្រជុំស្ដីពីប្រាក់ខែគោលកម្មករតែងតែមានបញ្ហាមិនចុះសម្រុងគ្នាច្រើនរវាងភាគីរដ្ឋាភិបាល GMAC និង សហជីពដែលតំណាងឲ្យកម្មករ។ GMAC តែងព្រមានជារឿយៗថា អ្នកវិនិយោគនិងអ្នកបញ្ជាទិញអាចបង្វែរទិសដៅរបស់ខ្លួនទៅកាន់ប្រទេសផ្សេងព្រោះតែការទាមទារប្រាក់ឈ្នួលច្រើនពីសំណាក់សហជីព។ ប៉ុន្តែសហជីពថាការទាមទាររបស់ខ្លួនដើម្បីប្រយោជន៍កម្មករឲ្យរស់នៅស្របទៅនឹងតម្លៃពលកម្មសមរម្យដូចបណ្ដាលប្រទេសផ្សេងក្នុងតំបន់អាស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ