រដ្ឋាភិបាលផ្អាករៀបចំព្រះរាជពិធីបុណ្យអុំទូកសារជាថ្មី នៅឆ្នាំនេះ
រដ្ឋាភិបាលកម្ពុជា នៅថ្ងៃទី ៣១ តុលា បានចេញសារាចរស្តីពីការផ្អាកព្រះរាជពិធីបុណ្យអុំទុក បណ្តែតប្រទីប និង សំពះព្រះខែ អកអំបុក សារជាថ្មី នៅឆ្នាំ ២០១៥ នេះ។ ការសម្រេចចិត្តផ្អាកពិធីបុណ្យអុំទូកនេះ រដ្ឋាភិបាលកម្ពុជា អះអាងថា ទឹកទន្លេនៅឆ្នាំនេះ មានកម្រិតទាបពេក ហើយដោយប្រទេសកម្ពុជាបច្ចុប្បន្ន កំពុងជួបប្រទះនឹងគ្រោះរាំងស្ងួត ដែលទាមទារឲ្យមានកម្លាំងប្រមូលផ្តុំ ដើម្បីដោះស្រាយកង្វះខាតទឹកជាបន្ទាន់។
ចុះផ្សាយនៅថ្ងៃ៖
ស្តាប់ - ០១:៤៤
ជាថ្មីម្តងទៀត រដ្ឋាភិបាល បានសម្រេចផ្អាក នូវការប្រារព្ធ ព្រះរាជពិធីបុណ្យអុំទូក បណ្តែតប្រទីប និង សំពះព្រះខែ នៅខែវិច្ឆិកា ឆ្នាំ ២០១៥ ខាងមុខនេះ ។ នេះបើតាមសារាចរ របស់រដ្ឋាភិបាលកម្ពុជា នៅថ្ងៃទី ៣១ តុលា នេះ។
ការសម្រេចផ្អាកប្រារព្ធ ព្រះរាជពិធីបុណ្យអុំទូកនៅឆ្នាំ នេះ រដ្ឋាភិបាលកម្ពុជា បានបញ្ជក់ថា កម្រិតទឹកទន្លេនៅឆ្នាំនេះ មានកម្រិតទាបពេក។ ជាមួយគ្នានេះដែរ ដោយសារតែប្រទេសកម្ពុជា នៅឆ្នាំ បាននឹងកំពុងប្រឈមមុខនឹងគ្រោះរាំងស្ងួត ដូច្នេះ រដ្ឋាភិបាល ទាមទារ ឲ្យមានការប្រមូលផ្តុំនូវកម្លាំង និង មធ្យោបាយ ដើម្បីដោះស្រាយបញ្ហាកង្វះខាតទឹក សម្រាប់ស្រូវប្រាំង ជូនប្រជាកសិករនៅតាមបណ្តាខេត្ត។
បើទោះជា រដ្ឋាភិបាល បានប្រកាសផ្អាកការរៀបចំព្រះរាជពិធីបុណ្យអុំទូក នៅតាមដងទន្លេសាបមុខព្រះបរមរាជវាំង ដែលគ្រោងប្រព្រឹត្តិទៅនៅថ្ងៃទី ២៤ ដល់ ២៦ វិច្ឆិកា ក៏ដោយ ប៉ុន្តែ ការរៀបចំ ពិធី នៅតាមបណ្តាខេត្តនានា អាចប្រព្រឹត្តិទៅដោយធម្មតា ទៅតាមទំនៀមទម្លាប់ និង លទ្ធភាព។ បន្ថែមលើនេះ ការឈប់សម្រាក របស់មន្ត្រីរាជការ និយោជិត កម្មករ នៅតែរក្សាដដែល ពោលគឺរយៈពេល បីថ្ងៃ។
គួរជម្រាបជូនថា ព្រះរាជពិធីបុណ្យអុំទូក ត្រូវ បានរាជរដ្ឋាភិបាលកម្ពុជា ប្រកាសផ្អាករយៈពេល ៣ ដង រួចមកហើយ គឺនៅឆ្នាំ២០១១ ឆ្នាំ ២០១២ និងឆ្នាំ២០១៣។ ដោយការផ្អាកព្រះ រាជពិធីដោយសារតែនៅឆ្នាំ២០១១ ដោយសារតែមានគ្រោះទឹកជំនន់ ដ៏ធ្ងន់ធ្ងរបំផ្លាញកសិផលរបស់ប្រជាកសិករ និងធ្វើឲ្យ ប្រជាពលរដ្ឋកម្ពុជារាប់ម៉ឺនគ្រួសារទទួលរងគ្រោះ។
ដោយឡែកសម្រាប់ការផ្អាកបុណ្យអុំទូក ជាលើកទី២ នៅឆ្នាំ២០១២ដោយសារតែ ការយាងសោយទិវង្គតនៃព្រះវររាជបិតាជាតិខ្មែរ ព្រះបរមរតនកោដ្ឋ ព្រះករុណា ព្រះបាទ សម្តេច ព្រះនរោត្តម សីហនុ។ ប៉ុន្តែ នៅក្នុងឆ្នាំ ២០១៤ ព្រះរាជពិធីបុណ្យអុំទូក ក៏ត្រូវបានរៀបចំឡើងសារជាថ្មីម្តងទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ