លោក ហ៊ុន សែន ដកតំណែងប្រធានមន្ទីរសុខាភិបាលក្រុងក្រោយរឹបអូសរថយន្តវិទ្យុ ABC
លោកនាយករដ្ឋមន្រ្តី ហ៊ុន សែន នៅថ្ងៃសៅរ៍នេះ បានសម្រេចដកតំណែងប្រធានមន្ទីរសុខាភិបាលក្រុងភ្នំពេញ លោក សុខ សុគន្ធ ក្រោយចាប់រថយន្តសង្គ្រោះរបស់ស្ថាននីយវិទ្យុ ABC ដែលស្គាល់ថា ម្ចាស់ស្ថានីយជា លោក សេង ប៊ុនវ៉េង ឬ គេនិយមហៅថា លោកអាចារ្យអេ។
ចុះផ្សាយនៅថ្ងៃ៖
ស្តាប់ - ០២:១៨
ចំណាត់ការដកតំណែងប្រធានមន្ទីរសុខាភិបាលរាជធានីភ្នំពេញ លោក សុខ សុគន្ធ ធ្វើឡើងបួនម៉ោងបន្ទាប់ពីអ្នកប្រើហ្វេសប៊ុកម្នាក់ឈ្មោះ Sophea Khith ប្ដឹងតាមហ្វេសប៊ុកទៅកាន់លោកនាយករដ្ឋមន្ត្រី ហ៊ុន សែន នៅថ្ងៃសៅរ៍នេះ។
លោកនាយករដ្ឋមន្រី ហ៊ុន សែន ក៏បានអន្តរាគមន៍ចេញបញ្ជាទៅលោក ឃួង ស្រេង អភិបាលរងរាជធានីភ្នំពេញយករថយន្តសង្គ្រោះបន្ទាន់របស់ស្ថាននីយវិទ្យុ ABC ដែលឃាត់ទុកកាលពីថ្ងៃទី១១សីហាប្រគល់ឲ្យលោកអាចារ្យអេវិញ។
ក្នុងថ្ងៃតែមួយ លោក ហ៊ុន សែន ក៏បានហៅទូរសព្ទទៅកាន់ស្ថាននីយវិទ្យុABC ដោយប្រកាសសូមទោសចំពោះការអនុវត្តរបស់មន្ត្រីខ្លះដែលបំពានទៅលើរថយន្តសប្បុរសរបស់វិទ្យុABC។ ដើម្បីធ្វើការប៉ះប៉ូវ លោកនាយករដ្ឋមន្ដ្រីបានប្រកាសដកប្រធានមន្ទីរសុខាភិបាលចេញពីតួនាទី ហើយផ្ដល់រថយន្តសង្គ្រោះចំនួនពីរគ្រឿងបន្ថែមដល់ស្ថានីយវិទ្យុABC។
លោក ហ៊ុន សែន បានថ្លែងការពារចំណាត់ការរបស់លោកថា នេះមិនមែនជាការចាញ់ឈ្នះអ្វីនោះទេប៉ុន្តែករណីនេះធ្វើឲ្យមានការយល់ច្រឡំចំពោះនយោបាយរដ្ឋាភិបាល។
ដូច្នេះក្នុងនាមជានាយករដ្ឋមន្ត្រីត្រូវទទួលកំហុសឆ្គងរបស់មន្រ្តីថ្នាក់ក្រោម។
លោក អ៊ូ វីរៈ អ្នកតាមដានបញ្ហាសង្គមមើលឃើញថា ចំណាត់ការដកប្រធានមន្ទីរសុខាភិបាលរាជធានីចេញនេះគឺជារឿងគ្មានប្រយោជន៍។ គ្មានប្រយោជន៍ដោយលោកយល់ថា ចំណាត់ការបែបនេះធ្វើឲ្យមន្ត្រីថ្នាក់ក្រោមលែងហ៊ានធ្វើការសម្រេចចិត្ត លែងហ៊ានក្នុងការអនុវត្តច្បាប់ព្រោះខ្លាចធ្វើខុស ដូច្នេះមានតែអង្គុយចាំបញ្ជាពីនាយករដ្ឋមន្ត្រី។
បើតាម លោក អ៊ូ វីរៈ មន្រ្តីនិមួយៗរមែងតែងមានសកម្មភាពខុសនិងត្រូវ។ ប៉ុន្តែការសម្រេចដកតួនាទីអ្វីមួយគួរអាស្រ័យលើការបូកសរុបការងារឬវាយតំលៃទៅលើសកម្មភាពការងារទាំងមូល។ហើយការសម្រេចចិត្តដោយធ្វើឡើងតែសកម្មភាពតែមួយបែបនេះអាចធ្វើឲ្យប៉ះពាល់ដល់អារម្មណ៍មន្ត្រីជាច្រើននឹងបាត់បង់ការឲ្យតម្លៃលើច្បាប់។
សូមបញ្ជាក់ថា មន្ទីរសុខាភិបាលរាជធានីភ្នំពេញឲ្យដឹងថា រថយន្តសង្គ្រោះរបស់វិទ្យុ ABC មិនបានចុះបញ្ជីរថយន្តគិលានសង្រ្គោះ និងសុំការអនុញ្ញាតិច្បាប់ ពីក្រសួងសុខាភិបាលទេ។ ពុំមានស្លាកលេខសំគាល់ខុសពីច្បាប់ចរាចរណ៍។ ពុំមានក្រុមគ្រូពេទ្យជំនាញបច្ចេកទេសសុខាភិបាលសំរាប់សង្រ្គោះបន្ទាន់ ហើយក្នុងរថយន្តពុំមានបំពាក់សំភារៈ ឧបករណ៏ បរិក្ខារពេទ្យ និងឱសថសំរាប់ធ្វើអន្តរាគមន៍សង្រ្គោះបន្ទាន់ដល់អ្នកជំងឺ។ ជារថយន្តសង្រ្គោះបន្ទាន់ប៉ុន្តែដឹកផលិតផលសុខភាពដើម្បីលក់ចែកចាយបន្តដល់អតិថិជនទៅវិញ។
បើតាមការស្ទង់មតិរបស់មជ្ឈមណ្ឌលកម្ពុជាសម្រាប់អ្នកសារព័ត៌មាន ABC ជាស្ថានីយវិទ្យុដែលមានកម្មវិធីព័ត៌មានទាន់ហេតុការណ៍ហើយជាវិទ្យុលេខ១ ដែលមានអ្នកស្ដាប់ច្រើនជាងគេនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ