លោកហ៊ុន សែន អំពាវនាវឲ្យរឹតបន្តឹងការលើកលែងទោសដល់ទណ្ឌិតដែលពាក់ព័ន្ធនឹងអំពើប្លន់
បន្ទាប់ពីករណីប្លន់ប្រដាប់អាវុធបានកក្រើកឡើងវិញនារយៈពេលប៉ុន្មានថ្ងៃចុងក្រោយនេះ លោកនាយករដ្ឋមន្រ្តីហ៊ុន សែន នៅក្នុងពិធីផ្សព្វផ្សាយការបញ្រ្ជាបទស្សនទាន សីលធម៌ សាសនា ដើម្បីសុដុមនីយកម្មនៅកម្ពុជានាព្រឹកនេះ បានបញ្ជាឲ្យអាជ្ញាធរគ្រប់លំដាប់ថ្នាក់ទាំងអស់ឲ្យធ្វើសកម្មភាពព្រមៗគ្នា ដើម្បីបង្រ្កាបអំពើប្លន់នៅក្នុងប្រទេសកម្ពុជា។ ជាមួយគ្នានេះ លោកហ៊ុន សែន ក៏បានអំពាវនាវឲ្យរដ្ឋមន្ត្រីក្រសួងយុត្តិធម៌ពិនិត្យមើលឡើងវិញចំពោះការស្នើលើកលែងទោសដល់ទណ្ឌិត ដែលពាក់ព័ន្ធនឹងអំពើប្លន់ និងគ្រឿងញៀនផងដែរ។
ចុះផ្សាយនៅថ្ងៃ៖
ស្តាប់ - ០១:៥៥
សម្លេងលោកហ៊ុន សែន ៖
ការអំពាវនាវរបស់លោកហ៊ុន សែន ទៅកាន់រដ្ឋមន្ត្រីរបស់ខ្លួននេះ គឺក្រោយពីលោកបានកត់សម្គាល់ឃើញថា ជនល្មើសពាក់ព័ន្ធនឹងករណីប្លន់ប្រដាប់អាវុធ និងការជួញដូរគ្រឿងញៀន គឺមុខដដែលៗ ហើយត្រូវបានលើកលែងទោសនាពេលកន្លងមក។ យ៉ាងណាក៏ដោយ ប្រមុខរដ្ឋាភិបាលកម្ពុជា បានគូសបញ្ជាក់ថា ការរឹតបន្តឹងទៅលើការលើកលែងទោសនេះ មិនមែនសំដៅទៅលើទណ្ឌិតពាក់ព័ន្ធនឹងករណីទាំងនេះទាំងអស់នោះទេ។
ជាការសម្គាល់ ប្រតិកម្មរបស់ប្រមុខដឹកនាំកម្ពុជាពាក់ព័ន្ធបញ្ហាសន្តិសុខសង្គមនៅពេលនេះ គឺបានកើតឡើងបន្ទាប់ពីករណីប្លន់ប្រដាប់អាវុធបានកក្រើកឡើងវិញនៅក្នុងរាជធានីភ្នំពេញនារយៈពេលថ្មីៗចុងក្រោយនេះ។ ជាក់ស្តែងកាលពីថ្ងៃទី១១ធ្នូ កន្លងទៅ មានករណីប្លន់ប្រដាប់អាវុធដ៏សាហាវមួយបានកើតឡើងទាំងព្រឹកព្រលឹមតែម្តង នៅក្នុងខណ្ឌទួលគោក ដោយក្រុមចោរបានបាញ់សម្លាប់ម្ចាស់ ដើម្បីប្លន់យកម៉ូតូដោយគ្មានញញើតដៃ។ បន្ទាប់មក កងរាជអាវុធហត្ថលើផ្ទៃប្រទេស បានបង្រ្កាបក្រុមចោរប្លន់ទាំងនោះ ដោយបានបាញ់សម្លាប់ចំនួនពីរនាក់ក្រោមហេតុផលពួកគេតដៃ និងបានចាប់ខ្លួន៤នាក់ផ្សេងទៀតក្នុងនោះមានស្រីចំនួនពីរនាក់។ ករណីប្លន់ប្រដាប់អាវុធនេះ បានក្លាយជាប្រធានបទដ៏ក្តៅគគុកនៃការជជែកគ្នារវាងប្រជាពលរដ្ឋខ្មែរ។ ហើយសូម្បីលោកនាយករដ្ឋមន្ត្រីផ្ទាល់ ក៏បានចាប់អារម្មណ៍ខ្លាំងពីរឿងនេះផងដែរ។
ផ្តើមចេញពីករណីនេះ និងប្រឈមមុខនឹងការកើតឡើងនៃករណីប្លន់ជាប់ៗគ្នានាពេលកន្លងមក លោកនាយករដ្ឋមន្ត្រីហ៊ុន សែន បានចេញបញ្ជាឲ្យអាជ្ញាធរគ្រប់លំដាប់ថ្នាក់ទាំងអស់បង្កើនការប្រុងប្រយ័ត្ន និងចេញប្រតិបត្តិការព្រមៗគ្នា ដើម្បីបង្ការ និងបង្រ្កាបចំពោះអំពើប្លន់ប្រដាប់អាវុធ និងអំពើជូញដូរគ្រឿងញៀន ដែលកើតឡើងនៅក្នុងប្រទេសកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ