លោកនាយករដ្ឋមន្រ្តី ហ៊ុន សែន ប្រកាសប្តូរជំហររឿងច្បាប់សញ្ជាតិតែមួយ
លោកនាយករដ្ឋមន្ត្រី ហ៊ុន សែន បានប្រកាសនៅថ្ងៃទី៧មករានេះថា គណបក្សកាន់អំណាចរបស់លោក នឹងមិនស្នើធ្វើវិសោធនកម្មច្បាប់ ស្តីពី គណបក្សនយោបាយ ដែលឈានទៅកំណត់ប្រធានគណបក្សនយោបាយត្រូវតែមានសញ្ជាតិតែមួយនោះទេ។ សម្រាប់គណបក្សប្រឆាំង បានស្វាគមន៍ចំពោះសេចក្តីសម្រេចចិត្តនេះ។
ចុះផ្សាយនៅថ្ងៃ៖
ស្តាប់ - ០២:៤២
គេកំរនឹងបានឃើញណាស់ថា បុរសខ្លាំងកម្ពុជា លោកនាយករដ្ឋមន្រ្តី ហ៊ុន សែន បានផ្លាស់ប្តូរជំហរនៅវិនាទីចុងក្រោយ ទៅលើសេចក្តីសម្រេចចិត្តរបស់ខ្លួន ក្នុងនាមជានាយករដ្ឋមន្រ្តីរបស់ប្រទេសកម្ពុជាជាង៣០ឆ្នាំ។ ប៉ុន្តែជាថ្មីម្តងទៀត គឺនៅក្នុងមីទ្ទិញរម្លឹកខួបអនុស្សាវរីយ៍លើកទី៣៧ ឆ្នាំ ថ្ងៃជ័យជម្នះ៧មករាឆ្នាំ២០១៦នេះ លោកនាយករដ្ឋមន្រ្តី ហ៊ុន សែន បានប្រកាសផ្លាស់ប្តូរជំហរដ៏គួរឲ្យភ្ញាក់ផ្អើលថា គណបក្សកាន់អំណាចរបស់លោក នឹងមិនស្នើសុំធ្វើវិសោធនកម្មច្បាប់ ស្តីពី គណបក្សនយោបាយ ដែលលោកចង់បាននោះទេ។
គួររំលឹកជូនថា កាលពីថ្ងៃទី២៨ធ្នូ២០១៥កន្លងទៅ លោកនាយករដ្ឋមន្រ្តី ហ៊ុន សែន បានប្រកាសថា ចាប់ពីឆ្នាំ២០១៦តទៅ មេដឹកនំាគណបក្សនយោបាយខ្មែរទំាងអស់ ត្រូវតែមានសញ្ជាតិតែមួយ។ ប៉ុន្តែគម្រោងនៃការស្នើធ្វើវិសោធនកម្មច្បាប់ ស្តីពី គណបក្សនយោបាយ ដែលក្រុមអ្នកវិភាគមើលឃើញថា គឺជាដំណើររាំងខ្ទប់ប្រធានគណបក្សប្រឆាំង លោក សម រង្ស៊ី មិនឲ្យធ្វើជាប្រធានគណបក្សប្រឆាំង ដោយសារលោក សម រង្ស៊ី មានសញ្ជាតិបារាំងនិងខ្មែរផងនេះ ត្រូវបានផ្អាកទៅវិញ។ លោកនាយករដ្ឋមន្រ្តីបានពន្យល់ថា ការផ្លាស់ប្តូរជំហរនេះ គឺដើម្បីបន្តបើកឱកាសឲ្យអ្នកដែលមានសញ្ជាតិច្រើនទាំងនោះ អាចចូលរួមធ្វើនយោបាយនៅក្នុងប្រទេសកម្ពុជាតទៅទៀត។ លោកនាយករដ្ឋមន្រ្តីបានបញ្ជាក់ថា គណបក្សប្រជាជនកម្ពុជា មិនភ័យខ្លាចចំពោះការប្រកួតប្រជែងរបស់គណបក្សនយោបាយទាំងនោះទេ។
យ៉ាងណាក៏ដោយ ក្នុងនាមជាប្រធានគណបក្សកាន់អំណាច លោកនាយករដ្ឋមន្រ្តី ហ៊ុន សែន បានអំពាវនាវឲ្យប្រធានគណបក្សនយោបាយដែលមានសញ្ជាតិច្រើនទាំងអស់ ចូលមកប្រកួតប្រជែងជាមួយគណបក្សកាន់អំណាច នៅក្នុងការបោះឆ្នោតឃុំ-សង្កាត់ នៅឆ្នាំ២០១៧ខាងមុខ។ តែទន្ទឹមគ្នានេះ ប្រមុខរដ្ឋាភិបាលកម្ពុជាបានប្រកាសថា កម្ពុជាមិនមែនជាចំណាប់ខ្មាំងសម្រាប់ទណ្ឌិតម្នាក់ពីរនាក់នោះទេ។ ការថ្លែងរបស់លោកនាយករដ្ឋមន្រ្តីដោយមិនចំឈ្មោះ តែទំនងជាបានសំដៅទៅលើរូបលោក សម រង្ស៊ី ប្រធានគណបក្សសង្រ្គោះជាតិ ដែលគេដឹងថា កំពុងរស់នៅក្រៅប្រទេស ដោយសារជាប់បណ្តឹងនៅតុលាការដល់ទៅ៣។
យ៉ាងណាក៏ដោយ លោក យឹម សុវណ្ណ អ្នកនាំពាក្យគណបក្សសង្រ្គោះជាតិ បានស្វាគមន៍ចំពោះសេចក្តីសម្រេចនេះថា ស្របទៅតាមគោលជំហរដើមរបស់គណបក្សប្រឆាំង។ លោកយឹម សុវណ្ណ ក៏បានប្រកាសមិនអត្ថាធិប្បាយទៅលើបញ្ហានេះទៀតដែរ។
សូមបញ្ជាក់ថា នៅក្នុងមីទ្ទិញរម្លឹកខួបអនុស្សាវរីយ៍លើកទី៣៧ឆ្នាំ ថ្ងៃជ័យជម្នះ៧មករាឆ្នាំ២០១៦នេះ លោកនាយករដ្ឋមន្រ្តី ហ៊ុន សែន ក៏បានប្រកាសពីការបន្តពង្រឹងវប្បធម៌សន្ទនារវាងគណបក្សដែលឈ្នះឆ្នោត និងសន្យាលុបចោលនូវទស្សនៈទឹកឡើងត្រីស៊ីស្រមោច ទឹកហោចស្រមោចស៊ីត្រីផងដែរ។ តែជាមួយគ្នានេះ គណបក្សប្រជាជនកម្ពុជា នឹងប្រឆាំងចំពោះល្បិចចាប់ដៃជាន់ជើង។ មីទ្ទិញរម្លឹកខួបអនុស្សាវរីយ៍ថ្ងៃជ័យជម្នះ៧មករាឆ្នាំ២០១៦នេះ បានប្រារព្ធធ្វើឡើងនៅទីស្នាក់ការកណ្តាលគណបក្សប្រជាជនកម្ពុជាក្នុងរាជធានីភ្នំពេញ ដោយមានការចូលរួមពីសមាជិក-សមាជិកាគណបក្សប្រមាណជាង១ម៉ឺននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ