សហជីពនិងអ្នកសេដ្ឋកិច្ចហៅការអំពាវនាវរបស់នាយករដ្ឋមន្ត្រី ដែលកុំឲ្យដំឡើងថ្លៃផ្ទះជួល គឺគ្មានប្រសិទ្ធភាព!
ភ្លាមៗបន្ទាប់ពីលោកនាយករដ្ឋមន្ត្រី ហ៊ុន សែន អំពាវនាវជាថ្មីទៀតឲ្យម្ចាស់ផ្ទះជួលទាំងអស់កុំដំឡើងថ្លៃផ្ទះជួលនោះ ទាំងសហជីព និងអ្នកសេដ្ឋកិច្ចបានលើកឡើងប្រហាក់ប្រហែលគ្នាថា នេះជាការអំពាវនាវគ្មានប្រសិទ្ធិភាព ព្រោះរដ្ឋគ្មានយន្តការអនុវត្តឲ្យបានច្បាស់លាស់។
ចុះផ្សាយនៅថ្ងៃ៖
ស្តាប់ - ០២:២៧
លោក គង់ អាទិត្យ អនុប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជាបានរិះគន់ថា បើគ្រាន់តែអំពាវនាវកុំឲ្យដំឡើងថ្លៃផ្ទះជួលតែម្ចាស់ផ្ទះជួល មិនអនុវត្តផងវាគឺជាការអំពាវនាវមួយគ្មានប្រសិទ្ធភាព។ ដូច្នេះប្រមុខរដ្ឋាភិបាលគួរតែឲ្យមន្ត្រីមូលដ្ឋានចុះធ្វើស្ថិតិឲ្យបានច្បាស់នៅតំបន់រោងចក្រថា ការអំពាវនាវរបស់គាត់មានប្រសិទ្ធកម្រិតណា។
លោក គង់ អាទិត្យ មើលឃើញថា រដ្ឋាភិបាលអាចដោះស្រាយបញ្ហាកុំឲ្យម្ចាស់ផ្ទះជួលដំឡើងថ្លៃផ្ទះបាន តាមរយៈការចរចាជាមួយម្ចាស់ផ្ទះជួល។ បន្ថែមពីលើនេះទៀត លោក គង់ អាទិត្យ ទាយទុកជាមុននៅឆ្នាំ ២០១៧ខាងមុខនេះចលនានៃការដំឡើងថ្លៃផ្ទះជួលនឹងចាប់ផ្ដើមកើតមាន ព្រោះឆ្នាំ២០១៧ជាឆ្នាំ ដែលប្រាក់ខែកម្មករត្រូវបានដំឡើង។
ផ្ទុយមកវិញលោក មឿន តុលា នាយកប្រតិបត្តិមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថា សង់ត្រាល់ បានលើកឡើងថា រដ្ឋាភិបាលធ្វើអ្វីមួយតែងតែគ្មានប្រសិទ្ធភាពប្រៀបបានការប្រើប្រាស់ថ្នាំមិនចំមុខជំងឺ។ បន្ថែមពីលើការអំពាវនាវនេះរដ្ឋាភិបាលគួរតែពិចារណានៅក្នុងការសាងសងផ្ទះសម្រាប់ជួលឲ្យកម្មករ ឬនិស្សិតដូចបណ្ដាប្រទេសផ្សេង ដែលគេមានរួចហើយ។ ហើយម្យ៉ាងទៀតលោក តុលា មើលឃើញថា អាជ្ញាធរមូលដ្ឋានពេលខ្លះបានទៅទារលុយពីម្ចាស់ផ្ទះជួល ដែលចំណុចនេះលោកចាត់ទុកថា ការអំពាវនាវរបស់នាយករដ្ឋមន្ត្រីរឹតតែគ្មានប្រសិទ្ធភាព។
សម្រាប់លោក មឿន តុលា យល់ថា បើកាលណារដ្ឋាភិបាលនៅតែបន្តស្រែកដូច្នេះបញ្ហាកុំឲ្យឡើងថ្លៃផ្ទះជួលនៅតែគ្មានប្រសិទ្ធភាព។ ព្រោះកម្ពុជាប្រទេសសេដ្ឋកិច្ចទីផ្សារសេរី។ ទីផ្សារសេរីបើកាលណាមានតម្រូវការច្រើនការផ្គត់ផ្គង់តិចនោះ បញ្ហាតម្លៃនឹងឡើងថ្លៃទៅតាមនឹងហើយ។
លោក ចាន់ សុផល អ្នកស្រាវជ្រាវផ្នែកសេដ្ឋកិច្ចយល់ឃើញថា ការអំពាវនាវរបស់ប្រមុខរដ្ឋាភិបាល ជាចំណុចមួយល្អនៅក្នុងការរំលេចចេញនូវការចំណាយ ដែលចេះតែកើនឡើងសម្រាប់កម្មកររោងចក្រ។ ប៉ុន្តែយ៉ាងណាក៏ដោយលោក ចាន់ សុផល មើលឃើញថានៅក្នុងប្រទេសសេដ្ឋកិច្ចទីផ្សារសេរីរដ្ឋាភិបាលមិនអាចកំណត់ថ្លៃលើផ្ទះជួលបានទេ។ គឺអាចទុកឲ្យម្ចាស់ផ្ទះជាអ្នកចរចាដោយផ្ទាល់ជាមួយកម្មកររកចំណុចឯកភាពរួម។ ប៉ុន្តែរដ្ឋាភិបាលអាចលើកទឹកចិត្តឬបង្កឲ្យមានរូបភាពនៃការសាងសងផ្ទះជួលឲ្យបានថែមទៀតតាមរយៈការឧបត្ថម្ភទុនទៅឲ្យពលរដ្ឋណា ដែលមានបំណងបង្កើតផ្ទះជួលប្រសិនបើពួកគេយល់ថា ការធ្វើបែបនេះនាំឲ្យមានការចំណេញ។
សូមបញ្ជាក់ថា នៅឆ្នាំ២០១៧ខាងមុខនេះ ប្រាក់ខែអប្បបរមារបស់ កម្មករ-កម្មការិនី ក្នុងវិស័យកាត់ដេរ និងស្បែកជើង នឹងឡើងដល់ ១៥៣ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ