លោកហ៊ុន សែនមិនខ្លាចស្លាប់ នឹងចូលពន្យល់ក្រុមបាតុករដែលគ្រោងធ្វើបាតុកម្មប្រឆាំងរូបលោកនៅអាមេរិកនោះទេ
គម្រោងធ្វើបាតុកម្មប្រឆាំងលោកនាយករដ្ឋមន្ត្រីហ៊ុន សែននៅពេលលោកទៅចូលរួមកិច្ចប្រជុំកំពូលពិសេសអាស៊ាន-អាមេរិកក្នុងរយៈពេលពីរថ្ងៃ ពីថ្ងៃទី១៥ដល់១៦កុម្ភៈនោះ មិនបានធ្វើឲ្យលោកហ៊ុន សែនខ្លាចរអានោះទេ។ ផ្ទុយទៅវិញ លោកថែមទាំងហានទៅចាប់ដៃក្រុមបាតុករ បើទោះបីជាមានគ្រោះថ្នាក់ដល់ស្លាប់ក៏ដោយ ក៏លោកមិនខ្លាចដែរ។ លើសពីនេះទៅទៀតលោកក៏បានអំពាវនាវឲ្យប្រជាពលរដ្ឋខ្មែររស់នៅអាមេរិក ត្រូវរួមគ្នាដើម្បីផលប្រយោជន៍ជាតិ បើទោះបីជាកាន់បក្សណា ឬកាន់សាសនាអ្វីក៏ដោយ។ នេះបើតាមការប្រកាសរបស់លោកហ៊ុន សែន នៅក្នុងពិធីសំណេះសំណាលជាមួយនឹងពលរដ្ឋខ្មែរនៅអាមេរិក នៅរសៀលថ្ងៃទី១៤ កុម្ភៈ ត្រូវនឹងព្រឹកព្រលឹមថ្ងៃទី១៥ កុម្ភៈនេះ សម្រាប់ម៉ោងនៅកម្ពុជា។
ចុះផ្សាយនៅថ្ងៃ៖
ស្តាប់ - ០១:៤៥
បន្ទាប់ពីធ្វើដំណើរទៅដល់រដ្ឋកាលីហ្វ័រញ៉ា សហរដ្ឋអាមេរិកភ្លាម លោកនាយករដ្ឋមន្ត្រីហ៊ុន សែនបានធ្វើពិធីសំណេះសំណាលជាមួយនឹងប្រជាជនខ្មែរនៅអាមេរិកប្រមាណជាង ៥០០នាក់ ក្នុងរយៈពេលជាង២ម៉ោង។ លោកនាយករដ្ឋមន្ត្រី បានលើកឡើងនូវរឿងរ៉ាវប្រវត្តិសាស្ត្ររវាងកម្ពុជា និងអាមេរិក ហើយបន្តរហូតមកដល់ទំនាក់ទំនងការទូតរវាងប្រទេសទាំងពីរនៅពេលបច្ចុប្បន្ន។
លោកហ៊ុន សែនមិនភ្លេចនោះទេ ពីរឿងដែលលេចលឺថាមានការធ្វើបាតុកម្មប្រឆាំងរូបលោកនៅពេលដែលទៅដល់ទឹកដីអាមេរិកនោះ។ លោកមិនភ្លេច ហើយលោកថែមទាំងប្រកាសថាលោកមិនខ្លាចស្លាប់នឹងចូលទៅពន្យល់ក្រុមបាតុករ ទាំងអស់នោះដែរ ប្រសិនបើមានបាតុកម្មពិតមែននោះ។
សម្លេងរបស់លោកហ៊ុន សែន៖
ក្រៅពីបញ្ហាបាតុកម្មនេះ បុរសខ្លាំងកម្ពុជា ដែលកាន់អំណាចជាង៣០ឆ្នាំមកនេះ ក៏បានអំពាវនាវឲ្យប្រជាពលរដ្ឋខ្មែរនៅអាមេរិករួបរួមគ្នាដើម្បីផលប្រយោជន៍ជាតិ បើទោះបីជាកាន់បក្សណា ឬកាន់សាសនាអ្វីក៏ដោយ។ លោកហ៊ុន សែនក៏បានបញ្ជាក់នៅក្នុងទំព័រហ្វេសប៊ុកផ្លូវការរបស់លោកផងដែរថា វត្តមានរបស់លោកនៅសហរដ្ឋអាមេរិកនៅពេលនេះ គឺដោយសារតែកម្ពុជាជាសមាជិកអាស៊ាន ហើយមានភារៈកិច្ចរួមជាមួយនឹងសមាជិកអាស៊ានផ្សេងទៀត ដើម្បីធ្វើការជាមួយនឹងអាមេរិក ក្នុងគោលដៅលើកកំពស់កិច្ចសហការឲ្យកាន់តែខ្ពស់ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ