ប្រមុខរដ្ឋាភិបាលប្រាប់ឲ្យទូរទស្សន៍និងសិល្បៈករសហការគ្នាដើម្បីផ្សាយពីសិល្បៈខ្មែរនៅក្នុងម៉ោងមាស
លោកនាយករដ្ឋមន្ត្រីហ៊ុន សែន ជាថ្មីម្តងទៀតបានអំពាវនាវឲ្យស្ថានីយ៍ទូរទស្សន៍ក្នុងស្រុក ចាប់អារម្មណ៍នឹងទំរង់សិល្បៈខ្មែរ ព្រមទាំងសហការគ្នាដើម្បីផលិតផ្សាយនៅក្នុងម៉ោងមាស។ ជាមួយគ្នានេះ លោក ហ៊ុន សែន ក៏បានស្នើផងដែរ ដល់ពាណិជ្ជករ ឲ្យជួយលើកស្ទួយសិល្បៈខ្មែរ តាមរយៈការគាំទ្រផ្សាយពាណិជ្ជកម្មនៅចន្លោះម៉ោងសំខាន់ទាំងនោះ។
ចុះផ្សាយនៅថ្ងៃ៖
ស្តាប់ - ០២:២៥
«សម្លេង ហ៊ុន សែន »
ការអំពាវនាវរបស់លោកនាយករដ្ឋមន្ត្រី ហ៊ុន សែន យ៉ាងដូច្នេះបានធ្វើឡើងនៅក្នុងឱកាសនៃទិវាវប្បធម៌ជាតិ៣ មីនា លើកទី១៨ នៅថ្ងៃព្រហស្បតិ៍នេះ ដែលរៀបចំឡើងដោយក្រសួងវប្បធម៌ នៅឯសាលសន្និសីទចតុមុខ។
ជាការកត់សម្គាល់ ការរំលឹកដល់អ្នកមានធនធាន នៅក្នុងប្រទេសកម្ពុជាឲ្យមានការចាប់អារម្មណ៍ជួយផ្សាយពាណិជ្ជកម្មដល់ទូរទស្សន៍ក្នុងស្រុកនានានៅក្នុងចន្លោះម៉ោង៧ដល់ម៉ោង៩យប់ គឺជាម៉ោងមាសដែលក្រសួងព័ត៌មាន បានហាមឃាត់ចាប់ពីដើមឆ្នាំ២០១៦នេះ មិនឲ្យមានការចាក់ផ្សាយភាពយន្តបរទេសនៅក្នុងចន្លោះម៉ោងនោះ។
ការហាមប្រាមមិនឲ្យមានការចាក់ផ្សាយភាពយន្តបរទេស ដែលមានការទាក់ទាញនៅក្នុងម៉ោងសំខាន់ត្រូវបានស្ថានីយ៍ទូរទស្សន៍មួយចំនួន ត្រូវគេមើលឃើញថាមានការប៉ះពាល់ដល់អ្នកគាំទ្ររបស់ខ្លួនលើការផ្សាយពាណិជ្ជកម្ម ដែលជាចំណូលដ៏ចំបងនៃអាជីវកម្មប្រព័ន្ធផ្សព្វផ្សាយបែបរូបភាពនេះ។
តាមរយៈនាទីវប្បធម៌នៅថ្ងៃនេះ ដែលមានការសម្តែងទស្សនីយភាពសិល្បៈជាច្រើនទំរង់ ផងនោះ លោកនាយករដ្ឋមន្ត្រី យល់ថាសិល្បៈទាំងអស់នេះ អាចចូលទៅជំនួសនៅម៉ោងសំខាន់ របស់ស្ថានីយ៍ទូរទស្សន៍នានាដែលបានដកចេញនូវភាពយន្តភាគបរទេស ដោយលោកបរិយាយថា«ផលិតផលសិល្បៈទាំងនេះ គឺជាផលិតផលសម្រាប់ចិញ្ចឹមទូរទស្សន៍ប៉ុន្មានម៉ោងនោះ»។ បន្ថែមពីនេះ លោក ហ៊ុន សែន បានជម្រុញឲ្យអ្នកគ្រប់គ្រងទូរទស្សន៍សហការជាមួយក្រុមសិល្បៈ ដែលអាចទទួលបានផលប្រយោជន៍ទាំងស្ថានីយ៍ទូរទស្សន៍ផង និងសិល្បៈករផង។
ជាការកត់សម្គាល់ បន្ទាប់ពីក្រសួងព័ត៌មាន បានហាមឃាត់មិនឲ្យស្ថានីយ៍ទូរទស្សន៍ក្នុងស្រុក ចាក់ផ្សាយភាពយន្តបរទេសជាពិសេសភាពយន្តថៃនៅក្នុងម៉ោងមាស ដែលគេយល់ថាជាពេលវេលាដែលមានចំណូលខ្ពស់បំផុតពីការផ្សាយពាណិជ្ជកម្មផលិតផលនោះ ស្ថានីយ៍ទូរទស្សន៍ក្នុងស្រុកមួយចំនួនបានគាស់កកាយភាពយន្តខ្មែរចាស់ៗក្នុងទសវត្ស ៨០ ៩០ និងរឿងភាគខ្មែរផលិតនៅទសវត្សចុងក្រោយនេះមកចាក់ផ្សាយ។ ទូរទស្សន៍មួយចំនួនទៀត ចាក់ផ្សាយកម្មវិធីតិចតួច ដែលមានការកែច្នៃជារបស់ខ្មែរក្រៅពីភាពយន្ត ដែលចំណូលពីការផ្សាយពាណិជ្ជកម្មមានការប្រែប្រួលពីលើកមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ