ក្រសួងវប្បធម៌មិនមែន ហាមបញ្ចាំងតែខែ្សវីដេអូស្តីពីលោកឈុតវុទ្ធី ប៉ុណ្ណោះទេ!
ខ្សែភាពយន្តឯកសារដែលមានចំណងជើងថា I am Chut Wutty ឬជាភាសាខ្មែរមានន័យថា ខ្ញុំគឺ ឈុត វុទ្ធី ត្រូវបានក្រសួងវប្បធម៌ និងវិចិត្រសិល្បៈហាមឃាត់មិនអោយបញ្ចាំងនៅមេត្តាហោស៍នោះទេ។ នេះបើយោងតាមលិខិតចុះថ្ងៃទី ១៨ ខែមេសា របស់ក្រសួងវប្បធម៌ និងវិចិត្រសិល្បៈផ្ញើទៅនាយកមជ្ឈមណ្ឌលវប្បធម៌កម្ពុជា-អាល្លឺម៉ង់ ឬមេត្តាហោស៍។ យ៉ាងណាក៏ដោយ នាយកដ្ឋានសិល្បៈភាពយន្តនិងផ្សព្វផ្សាយវប្បធម៌ បានបញ្ជាក់ថាមិនមែនមានតែខ្សែវីដេអូ មួយនេះទេ ដែលត្រូវបានហាមឃាត់មិនអោយបញ្ចាំង គឺមានវីដេអូផ្សេងទៀតក៏ត្រូវហាមឃាត់ប្រសិនបើមេត្តាហោស៍មិនបាន សុំការអនុញ្ញាតិបញ្ចាំងពីក្រសួង។រាយការណ៍ដោយប៉ុន សោភ័ណ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
ក្រសួងវប្បធម៌ នៅក្នុងលិខិតចុះថ្ងៃទី ១៨ ខែមេសាបានបញ្ជាក់ថា មូលហេតុដែលក្រសួងមិនអោយ បញ្ចាំងខ្សែភាពយន្តឯកសារនេះ ដោយសារតែពុំទាន់មានការស្នើសុំការពិនិត្យខ្លឹមសារ និងការអនុញ្ញាតិថតពីក្រសួង-ស្ថាប័នមានសមត្ថកិច្ចនូវឡើយទេ។
ខ្សែវីដេអូ I am Chut Wutty ឬក៏ខ្សែវីដេអូផ្សេងទៀត នឹងអាចចាក់បញ្ចាំងបាន ប្រសិនបើមេត្តាហោស៍ គោរពទៅតាមកិច្ចព្រមព្រៀងដែលបានចុះហត្ថលេខាជាមួយក្រសួងវប្បធម៌ និងវិចិត្រសិល្បៈ គឺមេត្តាហោស៍ត្រូវ ដាក់ជូនក្រសួងវប្បធម៌ពិនិត្យសិន មុននឹងដាក់បញ្ចាំង ហើយខ្សែវីដេអូនោះទៀតសោតត្រូវមានប្រភពច្បាស់លាស់។ នេះបើតាមការបញ្ជាក់របស់លោក ស៊ិន ចាន់សាយ៉ា ប្រធាននាយកដ្ឋានសិល្បៈភាពយន្តនិងផ្សព្វផ្សាយវប្បធម៌។
លោក ប្រធាននាយកដ្ឋានសិល្បៈភាពយន្តនិងផ្សព្វផ្សាយវប្បធម៌ បានអោយដឹងដែរថា ជាច្រើនលើកច្រើនសារក្រសួងវប្បធម៌បានជូនដំណឹងដល់មេត្តាហោស៍ពិនិត្យមើលឡើងវិញពីសកម្មភាពរបស់ខ្លួន។ លោកថាលើកនេះគឺជាការរម្លឹកចុងក្រោយរបស់ក្រសួងវប្បធម៌ចំពោះមេត្តាហោស៍ ប្រសិនបើមេត្តាហោស៍មិនគោរពតាមច្បាប់ នោះក្រសួងនឹងចាត់វិធានការតាមផ្លូវច្បាប់។
លោក ស៊ិន ចាន់សាយ៉ា បានបញ្ជាក់ថា កន្លងមកក្រសួងវប្បធម៌បានទទួលការត្អូញត្អែរយ៉ាងច្រើនពីស្ថាប័ននានា ដោយសារតែមានការលួចចាក់បញ្ចាំងខ្សែភាពយន្តដែលត្រូវបានផលិតឡើងដោយមិនមានការសុំច្បាប់។
សូមបញ្ជាក់ ខែ្សវីដេអូ I am Chut Wutty ដែលមានរយៈពេល54នាទី នេះ គ្រោងបញ្ចាំងនៅមេត្តាហោស៍នាយប់ថ្ងៃពុធទី20ខែមេសា ។ ខ្សែវីដេអូនេះ គឺបង្ហាញអំពីសង្គ្រាមប្រឆាំងនឹងការកាប់ព្រៃឈើខុសច្បាប់នៅកម្ពុជា របស់លោក ឈុត វុទ្ធី។ លោកឈុត វុទ្ធី ជាសកម្មជនព្រៃឈើ ដែលត្រូវគេបាញ់សម្លាប់កាលពីថ្ងៃទី២៦ ខែមេសា ឆ្នាំ២០១២ នៅខេត្តកោះកុង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ