អន្តោប្រវេសន៍ខុសច្បាប់នឹងលែងជាបញ្ហាអាស្រ័យលើឆន្ទៈនៃការអនុវត្តច្បាប់
ចុះផ្សាយនៅថ្ងៃ៖
ស្តាប់ - ០៥:២០
យុទ្ធនាការបង្រ្កាបជនអន្តោប្រវេសន៍ខុសច្បាប់គ្រប់ជាតិសាសន៍នៅកម្ពុជាហាក់ដូចជាមានការមមាញឹកខ្លាំង ចាប់តាំងពីឆ្នាំ២០១៤កន្លងទៅនេះ។ ការដោះស្រាយបញ្ហាអន្តោប្រវេសន៍ត្រូវគេមើលឃើញថាជាបញ្ហាអត្ថិភាពរបស់កម្ពុជា ដោយហេតុថាជានិច្ចកាលវាជាប្រធានបទក្តៅ និងរ៉ាំរ៉ៃ ហើយវាអាចមានឥទ្ធិពលលើឆាកនយោបាយខ្មែរទាំងបច្ចុប្បន្ននិងអនាគត។ ក៏ប៉ុន្តែបើអ្នកនយោបាយរួមគ្នាដោះស្រាយបញ្ហានេះឲ្យបានឆាប់ចប់ អ្វីដែលជាការចំណេញគឺផលប្រយោជន៍ជាតិ។ ហើយបញ្ហាអន្តោប្រវេសន៍ខុសច្បាប់នឹងលែងក្លាយជាផ្ទាំងស៊ីបរបស់គណបក្សនានានៅពេលមានការបោះឆ្នោតនាពេលអនាគត។
ស្ទើររៀងរាល់ថ្ងៃប៉ូលិសអន្តោប្រវេសន៍ បានបង្ហាញពីស្នាដៃរបស់ខ្លួនចាត់ការទៅលើជនបរទេសដែលចូលមកលាក់ខ្លួន និងធ្វើការងារខុសច្បាប់នៅក្នុងប្រទេសកម្ពុជា។ សកម្មភាពស្រាវជ្រាវនឹងចាប់បញ្ចូនជនអន្តោប្រវេសន៍ខុសច្បាប់ ហាក់មានការកំរើកខ្លាំងចាប់តាំងពីឆ្នាំ២០១៤កន្លងមក។ ជាការកត់សម្គាល់ ជនអន្តោប្រវេសន៍ចំរុះជាតិសាសន៍ ត្រូវបានរកឃើញនិងបញ្ជូនចេញទៅតាមប្រទេសរបស់គេជាហូរហែរ ដោយអនុវត្តតាមច្បាប់អន្តោប្រវេសន៍កម្ពុជា។
គេមិនដឹងថានេះគឺជាឆន្ទៈពិតប្រាកដរបស់អាជ្ញាធរឬយ៉ាងណា ក្នុងយុទ្ធនាការបោសសំអាតជនអន្តោប្រវេសន៍ខុសច្បាប់នៅកម្ពុជាខណៈដែលមានការរិះគន់ខ្លាំងពីមហាជន ពីការបណ្តែតបណ្តោយឲ្យជនបរទេសលាក់ខ្លួននៅកម្ពុជា និងដណ្តើមការងារខ្មែរទៀតផង។
នៅក្នុងហេតុផលនយោបាយបញ្ហាជនអន្តោប្រវេសន៍ខុសច្បាប់ជានិច្ចកាលតែងក្លាយជាប្រធានបទនៃការវាយប្រហាររបស់គណបក្សប្រឆាំង ជាពិសេសនៅអំឡុងពេលមានការបោះឆ្នោតម្តងៗ។ រីឯតួលេខវិញ ក៏មានការយល់ឃើញផ្សេងៗគ្នាដែរ ដោយបក្សប្រឆាំងបានប្រកាន់ខ្ជាប់ថាយ៉ាងហោចណាស់ក៏មានកន្លះលាននាក់ដែរជនអន្តោប្រវេសន៍វៀតណាមដែលរស់នៅក្នុងប្រទេសកម្ពុជាខុសច្បាប់។ ក៏ប៉ុន្តែមិនមានជាទឡ្ហីករណ៍អ្វីច្បាស់លាស់នោះទេ ខណៈដែលរដ្ឋាភិបាលតែងអះអាងថា មានជនអន្តោប្រវេសន៍ចំរុះជាតិសាសន៍ប្រមាណជា១០ម៉ឺននាក់ ក្នុងនោះក៏មានជនបរទេសដែលប្រើប្រាស់លិខិតស្នាមមិនប្រក្រតីខុសច្បាប់ផងដែរ។
ក៏ប៉ុន្តែបញ្ហាតួលេខមិនថ្វីទេ ដរាបណាមិនមានការឯកភាពរវាងខ្មែរ ដែលមាននិន្នាការផ្ទុយគ្នាលើផលប្រយោជន៍ប្រទេសជាតិ។ អ្វីដែលគួរធ្វើចំពោះមុខគឺឆន្ទៈពិតប្រាកដក្នុងការការពារបូរណភាពទឹកដី និងវិធានការ ទប់ស្កាត់ការហូរចូលជនបរទេសខុសច្បាប់មកក្នុងប្រទេសកម្ពុជា។
កន្លងមកបញ្ហាអន្តោប្រវេសន៍នៅកម្ពុជាត្រូវគេមើលឃើញថា មានស្ថានភាពមិនច្បាស់លាស់។ ការអនុវត្តច្បាប់អន្តោប្រវេសន៍គឺជាចំណោទដ៏សំខាន់មួយដែលគេតែងចោទសួរទៅលើមន្ត្រីអនុវត្តន៍ច្បាប់ ជាពិសេសរបៀបធ្វើការងារអន្តោប្រវេសជនរបស់មន្ត្រីតាមច្រកព្រំដែន។
ជាទូទៅប្រទេសណាក៏មានបញ្ហាជនអន្តោប្រវេសន៍ដែរ ក៏ប៉ុន្តែប្រសិទ្ធិភាពនៃការអនុវត្តច្បាប់ជាកត្តាសំខាន់ក្នុងការកំណត់នូវភាពជាក់លាក់នៃការគ្រប់គ្រងតាមប្រទេសរៀងៗខ្លួន។
សម្រាប់កម្ពុជាកន្លងមកត្រូវគេមើលឃើញថា មានភាពធូររលុង បើទោះណាជាកម្ពុជាមានច្បាប់ស្តីពីការគ្រប់គ្រងជនអន្តោប្រវេសន៍ហើយក៏ដោយ។ អ្វីដែលជាការព្រួយបារម្មណ៍របស់អ្នកជាតិនិយមមួយក្រុមនោះ គឺបញ្ហាទឹកដីនិងការបាត់បង់អធិបតេយ្យភាពជាមួយប្រទេសជិតខាង ដោយហេតុថាជាប្រទេសដែលមានព្រំដែនជាប់គ្នា។
សន្តិសុខសម្រាប់បច្ចុប្បន្ននិងទៅអនាគតក៏មិនអាចមើលរំលងបានទេ។ បញ្ហានេះបានបង្ហាញជាឧទាហរណ៍ច្បាស់ៗកាលពីពេលកន្លងទៅគឺមេខ្លោងភេរវករអន្តរជាតិ ហាំ បាលី បានចូលមកលាក់ខ្លួននៅប្រទេសកម្ពុជា។ ការអនុញ្ញាតឲ្យសេដ្ឋីជនជាតិរុស្សីមកស្នាក់នៅបង្កជាក្រុមជាពួក នៅលើកោះមួយចំនួននៅខេត្តព្រះសីហនុ ដោយផុតកំណត់ទិដ្ឋាការរហូតទៅដល់ពីរឆ្នាំក៏ជាការបង្កការព្រួយបារម្ភសម្រាប់ប្រជាជនម្ចាស់ស្រុកផងដែរ។
ហេតុដូច្នេះ យុទ្ធនាការបោសសម្អាតជនអន្តោប្រវេសន៍ខុសច្បាប់របស់អាជ្ញាធរនៅពេលនេះ ត្រូវបានសាទរពីមហាជន បើទោះណាសកម្មភាពនេះអាចនឹងទទួលបានផលចំណេញខាងនយោបាយ ឬក៏យ៉ាងណានោះ សំខាន់គឺត្រូវធ្វើឡើងក្នុងស្មារតីជាតិមួយពិតប្រាកដ។
បើពុំនោះទេ បញ្ហាជនអន្តោប្រវេសន៍ខុសច្បាប់នេះ នៅតែត្រូវបំពងសម្លេង មិនឈប់ឈររាល់ពេលមានការបោះឆ្នោត។ ពោលគឺសមត្ថកិច្ចគួរតែពង្រឹងការអនុវត្តច្បាប់ ព្រមគ្នាទាំងនៅក្នុងផ្ទៃប្រទេស និងនៅតាមព្រំដែន ដោយចៀសវាងការប្រព្រឹត្តិអំពើពុករលួយ។ ករណីមេភេរវករហាំបាលី និងករណីសេដ្ឋីជនជាតិរុស្សី ដែលទើបតែចាប់បញ្ជូនទៅប្រទេសរុស្សីកាលពីពេលថ្មីៗនេះ រួមទាំងការរកឃើញជាបន្តបន្ទាប់នូវជនបរទេសមានជនជាតិចិន និងវៀតណាម នៅក្នុងសិប្បកម្មនិងកន្លែងបំរើការងារនានាកណ្តាលក្រុងភ្នំពេញ និងតាមបណ្តាខេត្តមួយចំនួន ត្រូវគេសង្ស័យថា សុទ្ធតែមានការជាប់ពាក់ព័ន្ធទៅនឹងអំពើពុករលួយ។
រដ្ឋាភិបាលចង់មិនចង់ត្រូវតែមានយន្តការមួយច្បាស់លាស់លើដំណោះស្រាយស្តីពីជនអន្តោប្រវេសន៍ខុសច្បាប់នៅកម្ពុជា ព្រោះថាវាជាប្រធានបទនយោបាយ ក៏ថាបាន តែវាជាការបង្ហាញច្បាស់លាស់នូវការគោរពនិងអនុវត្តច្បាប់អន្តោប្រវេសន៍ក៏ថាបាន។
ការអនុវត្តច្បាប់អន្តោប្រវេសន៍ពិតប្រាកដនឹងគួរដកពិសោធន៍ជាគំរូនោះ គឺនៅមិនទាន់ទៅណាឆ្ងាយទេ ដោយពលករខ្មែររាប់ម៉ឺននាក់ត្រូវថៃដឹកជញ្ជូនពីប្រទេសគេមកទំលាក់ចោលនៅច្រកទ្វារអន្តរជាតិប៉ោយប៉ែតនិងច្រកទ្វាព្រំដែនដទៃទៀត បន្ទាប់ពីមានការរៀបចំសណ្តាប់ធ្នាប់ក្រោយរដ្ឋប្រហាររបស់កងយោធាថៃដឹកនាំដោយឧត្តមសេនីយ៍ប្រាយុទ្ធ ចាន់អូចារ កាលពីឆ្នាំទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ