យុវជន១៦ប្រទេសស្វែងយល់វប្បធម៌គ្នាស្របពេលសមាហរណកម្មអាស៊ានឈានចូលមកដល់
យុវជនមកពី១៦ប្រទេស បានជជែកពិភាក្សាគ្នាពីវប្បធម៌ចម្រុះជាតិសាសន៍ នៅខេត្តសៀមរាប ចំពេលថ្ងៃបុណ្យចូលឆ្នាំខ្មែរ។ ជាការជួបជុំយុវជនអន្តរជាតិចំនួនជាង១៥០នាក់ មកពីប្រទេសមហាអំណាចនិងអាស៊ាន ដែលផ្តួចផ្តើមដោយយុវជនខ្មែរ។ គោលបំណងសំខាន់នៃការជួបជុំជជែកគ្នារឿងវប្បធម៌រយៈពេល៣ថ្ងៃមកនេះ គឺដើម្បីស្វែងយល់ពីគ្នា និងគោរពឲ្យតម្លៃគ្នាទៅវិញទៅមក។ នេះបើតាមការបញ្ជាក់របស់ លោក ហ៊ុន ម៉ានី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤១
វេទិកាមហោស្របវប្បធម៌យុវជនអន្តរជាតិនេះ បានចាប់ផ្តើមពីថ្ងៃទី១២ដល់ទី១៧ខែមេសា ដែលមានអ្នកចូលរួមចំនួនជាង១៥០នាក់។ យុវជនទាំងនោះមកពីប្រទេសមហាអំណាចចំនួន៦ដូចជា ចិន ជប៉ុន រុស្ស៊ី កូរ៉េ អូស្ត្រាលី ឥណ្ឌា និងប្រទេសទាំង១០នៃសមាគមអាស៊ាន ដោយក្នុងនោះយុវជនចំនួនប្រមាណ១០ៗនាក់ ត្រូវបានអញ្ជើញមកពីប្រទេសនីមួយៗ។
ទោះបីជាវេទិកានេះរៀបចំស្របនឹងពិធីបុណ្យចូលឆ្នាំថ្មីក្តី ប៉ុន្តែលោក ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានបញ្ជាក់ថា មហោស្រពវប្បធម៌យុវជនអន្តរជាតិមិនមែនជាកម្មវិធីរបស់ព្រឹត្តិការណ៍អង្គរសង្គ្រាន្តនោះទេ។ ពោលគឺជាពិធីដាច់ដោយឡែកពីគ្នា ដោយគ្រាន់តែប្រើឆាកជាមួយគ្នាតែប៉ុណ្ណោះ។
ការរៀបចំវេទិកានេះឡើង គឺដើម្បីអបអរសារទសមារណកម្មអាស៊ានឆ្នាំ២០១៥ និងដើម្បីពង្រីងនិងផ្សារភ្ជាប់ទំនាក់ទំនងរវាងយុវជននិងយុវជន។ នេះបើតាមលោកប្រធានសហភាពសហព័ន្ធយុវជនកម្ពុជា។ មិនតែប៉ុណ្ណោះ លោក ហ៊ុន ម៉ានី បានលើកឡើងថា ការជួបគ្នាយុវជនជាលក្ខណៈអន្តរជាតិពេលនេះ បានអនុញ្ញាឲ្យពួកគេស្វែងយល់នូវបទពិសោធ ស្គាល់ពីវប្បធម៌អារ្យធម៌របស់គ្នាទៅវិញទៅមក ព្រមទាំងស្គាល់គ្នាក្នុងក្របខណ្ឌតំបន់ក៏ដូចជានៅលើឆាកអន្តរជាតិផងដែរ សំដៅដល់ការកាច់ចង្កូតនយោបាយទន់ភ្លន់ជាងមុននាពេលអនាគត ប្រកបដោយការគោរពភាពខុសៗគ្នានៃវប្បធម៌។
គួរជម្រាបជូនថា នៅថ្ងៃដំបូងគឺថ្ងៃទី១៣មេសា ជាការជជែកពិភាក្សារបស់យុវជន ក្រោមប្រធានបទ«សាមគ្គីភាព ឯកភាព ជាកម្លាំងនៃការកសាងវប្បធម៌ចម្រុះ» ដោយបែងចែកគ្នាជាក្រុមតូចៗនិងចុងក្រោយជាក្រុមធំទាំងអស់គ្នា។
ចំណែកនៅថ្ងៃទី១៤ជាថ្ងៃទី២នៃវេទិកាយុវជន គឺជាការតាំងពិព័រណ៌វប្បធម៌ ប្រពៃណីទំនៀមទម្លាប់នៃប្រទេសនីមួយៗ ព្រមទាំងដំណើរកម្សាន្តឈ្វេងយល់ពីវប្បធម៌ខ្មែរអារ្យធម៌ខ្មែរ នៅប្រាសាទអង្គរទៀតផង។
ដោយឡែកនៅរាត្រីថ្ងៃទី១៥មេសា គឺជាការសម្តែងសិល្បៈវប្បធម៌នៃប្រទេសនីមួយៗ មួយប្រទេសម្តងៗ ហើយអ្វីជាចំណុចពិសេសនោះគឺ តំណាងយុវជនពីរៗនាក់នៃប្រទេសនីមួយៗ បានសហការគ្នាដើម្បីសម្តែងរបាំរួមគ្នាមួយ ដែលហៅថា Unity Performance។
គួរកត់សម្គាល់ថា វេទិកាមហោស្រពវប្បធម៌យុវជនអន្តរជាតិ ដែលមានយុវជនមកពីប្រទេសមហាអំណាចក្នុងតំបន់ដែលកំពុងតែមានជម្លោះរ៉ាំរ៉ៃជាមួយគ្នាស្រាប់ផងនោះ ពួកគេមិនបានជជែកវែកញែកគ្នារឿងបញ្ហានយោបាយ សេដ្ឋកិច្ច ឬជម្លោះព្រំដែនសមុទ្រនោះឡើយ។
រីឯការជជែកពិភាក្សារបស់យុវជនរឿងវប្បធម៌ចម្រុះជាតិសាសន៍ដែលអស់រយៈពេល៣ថ្ងៃកន្លងទៅនេះ នឹងផ្សព្វផ្សាយលទ្ធផលនៅថ្ងៃទី១៧មេសា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ