ខ្សែប្រយុទ្ធជម្រើសជាតិជប៉ុន Keisuke Honda ចង់បង្កើតសាលាបាល់ទាត់នៅកម្ពុជា
កីឡាករបាល់ទាត់ជម្រើសជាតិជប៉ុន និងជាខ្សែបម្រើជួរមុខរបស់ក្លិប AC Milan លោក Keisuke Honda ចង់បង្កើតសាលាបាល់ទាត់នៅកម្ពុជា។ នេះជាអ្វីដែលកីឡាកររូបនេះអះអាងប្រាប់លោក សៅ សុខា ប្រធានសហព័ន្ធកីឡាបាល់ទាត់កម្ពុជា បន្ទាប់ពីធ្វើដំណើរមកដល់រាជធានីភ្នំពេញកាលពីថ្ងៃព្រហស្បតិ៍ម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
សាលាបាល់ទាត់ដែលកីឡាករ Keisuke Honda ចង់បង្កើតនៅកម្ពុជានោះ ផ្ដោតគោលដៅ ទៅលើកុមារនិងយុវជនខ្មែរ ដែលមានអាយុចាប់ពី៤ឆ្នាំ រហូតដល់១៨ឆ្នាំ។ លោក Honda បានអះអាងប្រាប់លោក សៅ សុខា ប្រធានសហព័ន្ធកីឡាបាល់ទាត់កម្ពុជា នៅល្ងាចថ្ងៃទី០៩មិថុនា ថា ក្ដីសុបិនរបស់លោក គឺចង់ឃើញកីឡាករបាល់ទាត់កម្ពុជា មានឱកាសបង្ហាញខ្លួននៅក្នុងព្រឹត្តិការណ៍អន្ដរជាតិសំខាន់ៗ ដូចជានៅអឺរ៉ុបជាដើម។
លោក Honda អះអាងថា ខ្លួនមានក្រុមការងារ ដែលអាចបណ្ដុះបណ្ដាលកីឡាករកម្ពុជាបាន។ យ៉ាងណាក៏ដោយ ខ្សែបម្រើជួរមុខរបស់ក្លិប AC Milan រូបនេះ នៅមិនទាន់អាចប្រាប់បានពីចំនួនទឹកប្រាក់ដែលខ្លួនត្រូវចំណាយ ដើម្បីបង្កើតសាលាបាល់ទាត់នេះនៅឡើយទេ។ លោក Honda គូសបញ្ជាក់ថា គម្រោងសាលាបាល់ទាត់នេះ កំពុងស្ថិតនៅក្នុងដំណាក់កាលសិក្សាបឋមនៅឡើយ។ ប៉ុន្តែលោកចង់ឲ្យគម្រោងនេះលេចចេញជារូបរាងកាន់តែឆាប់តាមដែលអាចធ្វើទៅបាន។
គួរជម្រាបជូនថា កីឡាករ Keisuke Honda បានបង្កើតសាលាបាល់ទាត់នៅក្នុងប្រទេសជប៉ុន និងមានគម្រោងបង្កើតសាលាបាល់ទាត់នៅសហរដ្ឋអាមេរិកផងដែរ។ នៅបណ្ដាប្រទេសផ្សេងទៀត ដូចជាថៃ និងវៀតណាមជាដើម កីឡាករជម្រើសជាតិជប៉ុនរូបនេះ ធ្លាប់ចែករំលែកបទពិសោធដល់កុមាររាប់សិបនាក់ ដែលចូលចិត្តកីឡាបាល់ទាត់។ នៅកម្ពុជា កាលពីល្ងាចថ្ងៃទី០៩មិថុនា កីឡាករ Honda ក៏បានចែករំលែកបទពិសោធដល់យុវជនកម្ពុជាចំនួន៤០នាក់ នៅវិទ្យាល័យឥន្ទ្រទេវីផងដែរ។ កីឡាករវ័យ២៩ឆ្នាំរូបនេះ ប្រាប់យុវជនកម្ពុជាឲ្យមានក្ដីស្រមៃខ្ពស់បំផុត ដើម្បីអនាគតបាល់ទាត់កម្ពុជា។
សូមរំលឹកថា នេះគឺជាលើកទីពីរហើយ ដែលកីឡាករ Keisuke Honda ធ្វើដំណើរមកកម្ពុជា។ កីឡាកររូបនេះ ធ្វើដំណើរកម្ពុជាជាលើកទី១កាលពីខែវិច្ឆិកាឆ្នាំ២០១៥កន្លងទៅ ដើម្បីប្រកួត ជម្រុះកីឡាបាល់ទាត់ពិភពលោក World Cup ប្រចាំតំបន់អាស៊ីជុំទី២ ដោយយកឈ្នះម្ចាស់ផ្ទះកម្ពុជាក្នុងលទ្ធផល ២ ទល់នឹង ០៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ