ខួប២ឆ្នាំនៃការចាប់ខ្លួន៖ ឱពុកនិងកូនស្រីស្នើរួមគ្នាឲ្យបញ្ឈប់ការយកខ្មែរគ្នាឯងជាឈ្នាន់និងរបាំង
គិតត្រឹមថ្ងៃទី២ខែកញ្ញាម្សិលមិញ ជាពេលវេលា២ឆ្នាំគត់នៃការចាប់ខ្លួន លោក កឹម សុខា កាលពីថ្ងៃទី២ខែកញ្ញាឆ្នាំ២០១៧។ ជុំវិញខួប២ឆ្នាំនៃការចាប់ខ្លួននេះ រដ្ឋាភិបាលតាមរយៈទីស្តីការគណៈរដ្ឋមន្រ្តី នៅថ្ងៃទី២ខែកញ្ញា បង្ហាញវិដេអូអំពីមូលហេតុនៃការចាប់ខ្លួន លោក កឹម សុខា ដែលការចេញផ្សាយនេះ ជួនចំពេលលោក កឹម សុខា និងកូនស្រី គឺកញ្ញា កឹម មនោវិទ្យា ស្នើឲ្យបញ្ឈប់ការយកខ្មែរគ្នាឯងជាឈ្នាន់និងរបាំង។
ចុះផ្សាយនៅថ្ងៃ៖
ស្តាប់ - ០២:០៧
បន្ទាប់ពីរក្សាភាពស្ងៀមស្ងាត់មិនលូកលាន់សំណុំរឿងនយោបាយបច្ចុប្បន្ន លោក កឹម សុខា ប្រធានអតីតគណបក្សសង្គ្រោះជាតិ នៅថ្ងៃទី២ខែកញ្ញាម្សិលមិញបានបង្ហាញសារនយោបាយជាថ្មីដោយរំឭកឡើងវិញចំពោះហេតុការណ៍ដែលសមត្ថកិច្ចចូលចាប់ខ្លួនលោកដល់ក្នុងផ្ទះ ទាំងកណ្តាលអាធ្រាត្រ កាលពី២ឆ្នាំមុន។
តាមរយៈសំណេររំលេចឡើងក្នុងទំព័រហ្វេសបុក លោក កឹម សុខា បានទាញភ្ជាប់ការចាប់ខ្លួនរូបលោកទៅនឹងការត្រៀមចិត្តទុកជាមុនហើយថា តួនាទីជាមេដឹកនាំបក្សប្រឆាំង តែងនាំមកនូវគ្រោះថ្នាក់ និងការឈឺចាប់រាប់មិនអស់ តែអ្នកដឹកនាំគឺជាអ្នកដែលលះបង់មុនគេ និងច្រើនជាងគេ ដើម្បីជាគំរូដល់អ្នកគាំទ្រ។ បើតាមលោក កឹម សុខា អ្នកដឹកនាំដែលមានគុណធម៌ មិនដែលរុញច្រានឲ្យអ្នកគាំទ្រខ្លួនធ្វើអ្វីដែលខ្លួនមិនហ៊ានធ្វើឡើយ។
ប៉ុន្តែយ៉ាងណាក៏ដោយ លោក កឹម សុខា ដែលកំពុងជាប់ឃុំនៅក្នុងផ្ទះ នៅតែបន្តស្នើឲ្យខ្មែរគ្រប់និន្នាកាបញ្ឈប់នូវនយោបាយ យកខ្មែរគ្នាឯង និងជោគវាសនាប្រទេសជាតិជាឈ្នាន់និងរបាំងតទៅទៀត ព្រោះបើតាម លោក កឹម សុខា ខ្មែរគ្រប់ស្រទាប់វណ្ណៈបានឈឺចាប់គ្រប់គ្រាន់ហើយ។
ឆ្លៀតក្នុងឱកាសនេះដែរ កូនស្រីលោកកឹម សុខា កញ្ញា កឹម មនោវិទ្យា បានបង្ហាញសារតាមបណ្តាញសង្គម ទ្វីតធ័រ ពីក្រៅប្រទេសថា ខួប២ឆ្នាំនៃការចាប់ខ្លួនលោក កឹម សុខា ដែលជាឱពុកគ្មានបុគ្គលណាអាចប៉ះប៉ូវសងគ្រួសារនាងបានឡើយ។ ដូច្នេះហើយអ្វីដែលរូបកញ្ញាត្រូវការ គឺបញ្ឈប់ កុំឲ្យមានអំពើអយុត្តិធម៌កើតឡើងលើខ្មែរគ្រប់គ្នាតទៀត។
តែជាការកត់សម្គាល់ជួនចំពេល លោក កឹម សុខា និង កូនស្រី ស្នើឲ្យបញ្ឈប់ការយកខ្មែរគ្នាឯងជាឈ្នាន់និងរបាំង អង្គភាពប្រតិកម្មរហ័សរបស់ ទីស្តីការគណៈរដ្ឋមន្រ្តី នៅថ្ងៃទី២ខែកញ្ញា ដដែល បានបង្ហាញវីដេអូដោយពន្យល់មូលហេតុ នៃការចាប់ខ្លួន លោក កឹម សុខា។ ខ្លឹមសារវិដេអូដែលមានរយៈពេលជាង២នាទី បង្ហាញថា ការចាប់ខ្លួនលោក កឹម សុខា អតីតប្រធាននៃអតីតគណបក្សសង្រ្គោះជាតិ គឺជាប់ពាក់ព័ន្ធនឹងការឃុបឃិតជាមួយបរទេសដើម្បីផ្តួលរំលំរដ្ឋាភិបាលស្របច្បាប់។ នេះបើតាមគណៈរដ្ឋមន្រ្តី។
សូមជម្រាបថា លោក កឹម សុខា ត្រូវបានចោទប្រកាន់ពីបទ «សន្និដ្ឋិភាពជាមួយបរទេស» តាមមាត្រា ៤៤៣ នៃក្រមព្រហ្មទណ្ឌកម្ពុជា ដែលជាទោស «ក្បត់ជាតិ» តាមរយៈការឃុបឃិតជាមួយបរទេស ដើម្បីប៉ុនប៉ងផ្តួលរំលំរដ្ឋាភិបាលស្របច្បាប់។ ប៉ុន្តែត្រូវបានលោកបដិសេធ ខណៈដែលមជ្ឈដ្ឋានជាតិ និងសហគមន៍អន្តរជាតិមួយចំនួនយល់ថា នេះគឺជាការចោទប្រកាន់ដោយគ្មានភ័ស្តុតាងត្រឹមត្រូវ ហើយថា ជារឿងនយោបាយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ