ប្រធានយុវជនគណបក្សប្រឆាំង ច្រានចោលលិខិតអនាមិក ទាមទារឲ្យដាក់ទោសកូនស្រីលោកកឹម សុខា
ជុំវិញការរិះគន់របស់កញ្ញា កឹម មនោវិទ្យា កូនស្រីរបស់លោកកឹម សុខា អនុប្រធានគណបក្សសង្គ្រោះជាតិ សរសេរម្តងហើយម្តងទៀតតាមបណ្តាញសង្គម Twitter រិះគន់ទៅលើមេបក្សរបស់ខ្លួនគឺលោក សម រង្ស៊ី លិខិតទាមទារឲ្យដាក់ពិន័យកញ្ញាកឹម មនោវិទ្យា មួយក្រោមឈ្មោះថាតំណាងយុវជនគណបក្សសង្គ្រោះជាតិត្រូវបានគេផ្សព្វផ្សាយ។ ក៏ប៉ុន្តែ ប្រធានចលនាយុវជនគណបក្សសង្គ្រោះជាតិលោក ហ៊ីង សុខសាន បានចេញមុខមកបដិសេធថា នោះគឺជាលិខិតក្លែងក្លាយ។
ចុះផ្សាយនៅថ្ងៃ៖ កែប្រែថ្ងៃទី៖
ភ្លាមៗបន្ទាប់ពីមានលិខិតមួយច្បាប់ ដែលបានចុះផ្សាយតាមប្រព័ន្ធផ្សព្វផ្សាយ ក្នុងស្រុកនិងបណ្តាញសង្គមកាលពីរាត្រីថ្ងៃពុធ លោកហ៊ីង សុខសាន ប្រធានចលនាយុវជនគណបក្សសង្គ្រោះជាតិ បានសរសេរនៅលើទំព័រហ្វេសប៊ុករបស់លោកដោយបដិសេធយ៉ាងដាច់អហង្ការថា នេះពិតជាឯកសារក្លែងក្លាយ។ លោក សុខសាន ថារហូតមកដល់ពេលនេះ លោកនៅតែជាតំណាង យុវជនគណបក្សសង្គ្រោះជាតិស្របច្បាប់នៅឡើយ ហើយចលនាយុវជនគណបក្សសង្គ្រោះជាតិ ពុំដែលបានចេញ ឯកសារបែបនេះឡើយ។
បន្ថែមពីលើអ្វី ដែលសរសេរលើបណ្តាញសង្គមរបស់លោក ប្រធានចលនាយុវជនគណបក្សប្រឆាំងរូបនេះបញ្ជាក់ថាលិខិត ដែលចេញផ្សាយនេះមានចំណុចខុសជាច្រើនគួរកត់សម្គាល់នោះគឺ លិខិតត្រូវមានហ្គ្រិសពីលោក លោកត្រូវសុំសេចក្តីសម្រេចពីប្រធាន និងអនុប្រធានបក្សមុននឹងចេញផ្សាយលិខិតផ្លូវការ ខុសទម្រង់ បច្ចេកទេស និងការរចនាលើទំព័រលិខិតជាដើម។
សូមរំលឹកថា ការដែលមានលិខិតក្លែងក្លាយនេះឡើង គឺបន្ទាប់ពីកញ្ញាកឹម មនោវិទ្យា កូនស្រីរបស់លោកកឹម សុខា ដែលមានតំណែងជាអនុប្រធានផ្នែកកិច្ចការសាធារណៈរបស់គណបក្សបានសរសេររិះគន់លោកសម រង្ស៊ី ដែលជាប្រធានគណបក្សសង្គ្រោះជាតិប្រមាណជា ៣លើក តាមប្រព័ន្ធ Twitter របស់នាង។ ការសរសេរនោះមានខ្លឹមសារដូចជា «បំណងនេះគ្មានភាពស្មោះត្រង់ទេ» នៅពេលដែលលោកសម រង្ស៊ី ប្រកាសវិលមកប្រទេសកម្ពុជាវិញ ដើម្បីចូលខ្លួនទៅក្នុងពន្ធនាគារ ជាថ្នូរនឹងការដោះលែងមន្ត្រី សកម្មជនគណបក្ស និងមន្ត្រីអង្គការសង្គមស៊ីវិល ដែលកំពុងជាប់ទោសសព្វថ្ងៃ។
ចុងក្រោយនេះ នៅពេលដែលអាជ្ញាធរចេញសេចក្តីប្រកាសហាមឃាត់ដំណើរវិលចូលប្រទេសកម្ពុជាវិញរបស់លោកសម រង្ស៊ី កញ្ញាកឹម មនោវិទ្យា បានសរសេរបន្ថែមលើបណ្តាញTwitter របស់នាងជាភាសាអង់គ្លេសថា អស់រយៈពេលមួយឆ្នាំមកហើយ គឺនៅពេលនេះ លោកសម រង្ស៊ី អាចប្រកាសជាផ្លូវការនូវការនិរទេសខ្លួន និងមានហេតុផលស្របច្បាប់ក្នុងការស្ថិតនៅបរទេសបន្តទៀត។ កញ្ញាបញ្ជាក់ថា រដ្ឋាភិបាលខ្មែរនឹងហៅស្ថានភាពនេះថា ជាការឈ្នះៗ គឺសម រង្ស៊ី ក៏ឈ្នះ គណបក្សប្រជាជនកម្ពុជាក៏ឈ្នះ។ ទោះយ៉ាងនេះក្តី មន្ត្រីជាន់ខ្ពស់គណបក្សសង្គ្រោះជាតិតែងប្រាប់អ្នកកាសែតថា វាជាសិទ្ធិរបស់សមាជិកគ្រប់ៗរូបក្នុងការបញ្ចេញមតិផ្ទាល់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ