តុលាការបន្តសំណុំរឿងលោកកឹម សុខា ទៅចៅក្រមស៊ើបសួរ
ក្រុមមេធាវីលោកកឹម សុខា បានប្រាប់ឱ្យដឹងនៅថ្ងៃទី០១ មិថុនានេះថាសាលាដំបូងរាជធានីភ្នំពេញបានបញ្ជូនសំណុំរឿងចម្រូងចម្រាស់លោក កឹម សុខា ទៅកាន់ចៅក្រមស៊ើបសួរ ដើម្បីបន្តសំណុំរឿង ដែលអ្នកអះអាងថាជារឿងនយោបាយ។ ទន្ទឹមនឹង ក្រុមអ្នកច្បាប់របស់បក្សប្រឆាំងស្នើឱ្យទម្លាក់ចោលការចោទប្រកាន់ និងមិនចាត់ការលើសំណុំរឿងនេះ។
ចុះផ្សាយនៅថ្ងៃ៖
ស្តាប់ - ០១:៤២
រហូតមកដល់ពេលនេះ សំណុំរឿងលោកកឹម សុខាប្រធានស្តីទីគណបក្សសង្គ្រោះជាតិបានចូលទៅដល់ដៃចៅក្រមស៊ើបសួរហើយ បន្ទាប់ពីរដ្ឋសភា ដែលមានតែគណបក្សប្រជាជនបានអនុម័តឱ្យបន្តនីតិវិធីលើករណីរឿងអាស្រូវស្នហា។ ទន្ទឹមនឹងនេះ ក្រុមអ្នកច្បាប់ការពារក្តីឱ្យលោក កឹម សុខា បានស្នើឱ្យតុលាការមិនចាត់ការ។ ជាសមាជិកម្នាក់ក្នុងចំណោមក្រុមមេធាវីកាពារក្តី លោកហែម សុជាតិ បានគូសបញ្ជាក់ថា រហូតមកដល់ពេលនេះ តុលាការនៅមិនទាន់មានចំណាត់ការណាបន្ថែមនោះទេក្រៅពីបញ្ជូនសំណុំរឿងទៅកាន់ចៅក្រមស៊ើបសួរ។ បើតាមមេធាវីរូបនេះ តុលាការបានចោទលោកកឹម សុខា ទៅតាមមាត្រា៥៣៨ ពីបទបដិសេធមិនចូលខ្លួនជាសាក្សីក្នុងសំណុំរឿងសច្ចាកម្ម ដែលប្តឹងដោយកញ្ញា ស្រីមុំ។ តុលាការមិនអាចសុំការអត្ថាធិប្បាយបន្ថែមបាននៅឡើយ។
ចំពោះការបញ្ជូនសំណុំរឿងនេះ ក្រុមមេធាវីបក្សប្រឆាំងបានមើលឃើញថា ជាការចោទដែលមិនសមហេតុផលព្រោះថា លោកកឹម សុខា ដែលជាតំណាងរាស្ត្រមិនទាន់ត្រូវបានដកអភ័យឯកសិទ្ធនៅឡើយ បើទោះបីជាបក្សកាន់អំណាចកាលពីថ្ងៃទី៣០ មិថុនា បានបោះឆ្នោតអនុម័តឱ្យបន្តដំណើរការតុលាការ។ រដ្ឋសភាកម្ពុជា នៅថ្ងៃទី ១ មិថុនា បានគូសបញ្ជាក់ថា ខ្លួនមានសិទ្ធក្នុងការបញ្ចេញមតិ និងអនុម័តដោយឯករាជ្យ ព្រោះថាវាអ្វីដែលបានចែងក្នុងបទបញ្ជាផ្ទៃក្នុងរបស់សភាត្រង់បញ្ញត្តិត្រង់ប្រការ៤១ថ្មី។
សូមរំលឹកថា ករណីផ្ទាល់ខ្លួនលោកកឹម សុខា បានក្លាយទៅជាជម្លោះនយោបាយតានតឹងមួយកម្រិតទៀត ដែលបានសហគមន៍ជាតិ និងអន្តរជាតិ បានសម្តែងក្តីព្រួយបារម្ភយ៉ាងខ្លាំងចំពោះដំណើរលទិ្ធប្រជាធិបតេយ្យ និងការបោះឆ្នោត។ ជាការព្រួយបារម្ភព្រោះថាចុងក្រោយនេះ គណបក្សប្រឆាំងបានកែនស្នាមមេដៃអ្នកគាំទ្ររបស់ខ្លួនថ្វាយព្រះមហាក្សត្រដើម្បីសុំព្រះរាជអន្តរាគមន៍ព្រោះតែយល់ថាបក្សប្រឆាំងខ្លួនរងភាពអយុត្តិធម៌។
បើទោះបីជាសហគមន៍អន្តរជាតិ ដែលរួមទាំងអង្គការសហប្រជាជាតិផង ស្នើឱ្យភាគីទាំងពីរចរចា និងបញ្ចប់ដំណើរការនីតិវិធីតុលាការលើករណីលោក កឹមសុខា ប៉ុន្តែពេលនេះតុលាការបានបញ្ជូនសំណុំរឿងបន្តទៅចៅក្រម ស៊ើបសួរ និងបន្តស្វែងរកចាប់ខ្លួនលោក កឹមសុខា ទន្ទឹមនឹងបក្សប្រឆាំងត្រៀមរៀបចំមហាបាតុកម្មទ្រង់ទ្រាយធំដើម្បីការពារលោក កឹម សុខា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ