លោក កឹម សុខា ចូលសួរសុខទុក្ខ និងស្អំចិត្តសមាជិកបក្សកំពុងជាប់ឃុំក្នុងពន្ធនាគារ
ដូចការគ្រោងទុក នៅព្រឹក ថ្ងៃព្រហស្បតិ៍នេះ លោក កឹម សុខា ប្រធានស្តីទី គណបក្សសង្រ្គោះជាតិ បានដឹកនាំក្រុមតំណាងរាស្រ្តជាច្រើនរូប ចូលសួរសុខទុក្ខតំណាងរាស្រ្ត និងសកម្មជនរបស់ខ្លួន ដែលកំពុងជាប់ឃុំខ្លួន នៅមណ្ឌលអប់រំកែប្រែទី១ ក្នុងសង្កាត់ដង្កោរ ខណ្ឌដង្កោរ រាជធានីភ្នំពេញ។ ហាក់ប្រុងប្រយត្នឆ្លើយឆ្លងនឹងអ្នកកាសែត លោក កឹម សុខា បានថ្លែងត្រឹមពីរពាក្យថា «បរិយាកាសល្អ» ក្រោយអ្នកសារព័ត៌មានព្យាយាមជាលើកទីពីរស្នើសុំការអត្ថាធិប្បាយរបស់ថ្នាក់ដឹកនាំបក្សប្រឆាំងរូបនេះ ដោយលោកបង្វែរសំណួរនៅសល់ទៅកាន់តំណាងរាស្រ្តបក្សសង្រ្គោះជាតិផ្សេងទៀត។
ចុះផ្សាយនៅថ្ងៃ៖
លោក កឹម សុខា ប្រធានស្តីទីបក្សសង្រ្គោះជាតិ នៅវេលាម៉ោងជាង ១០ព្រឹក ថ្ងៃទី០៨ ខែធ្នូ នេះ បានដើរចេញពី អគារមណ្ឌលអប់រំកែប្រែទី១ ក្នុងសង្កាត់ដង្កោរ ខណ្ឌដង្កោរ រាជធានីភ្នំពេញ។ មណ្ឌលដែលលោក កឹម សុខា និងតំណាងរាស្រ្តបក្សប្រឆាំងផ្សេងទៀត បានមកដើម្បីសាកសួរសុខទុក្ខ តំណាងរាស្រ្ត និងសកម្មជន របស់ខ្លួន ទាំង ១៥នាក់ ដែលកំពុងជាប់ឃុំ។
ក្នុងសំលៀកពាក់អាវស ខោខ្មៅ លោក កឹម សុខា ញញឹមស្ងួត សំដៅមករករថយន្តរបស់លោក ដែលកំពុងបញ្ឆេះចាំ ហើយរួតបិទសំណាញ់ខ្មៅ ដោយមិនរវល់ឆ្លើយតបនឹងសំណួររបស់អ្នកកាសែត កំពុងរង់ចាំព្រោងព្រៀតនៅមុខច្រកចូលមណ្ឌល ដែលដាក់ខណ្ឌដោយបារ៉ាស់ របស់ប៉ុស្តិ៍ត្រួតពិនិត្យ និងទាហានជាច្រើននាក់ក្នុងឯកសណ្ឋាន។
គឺលោក អ៊ូ ច័ន្ទឬទ្ធិ តំណាងរាស្រ្តបក្សសង្រ្គោះជាតិ ដែលត្រូវឆ្លើយតបសំណួររបស់អ្នកកាសែតជំនួសលោក កឹម សុខា។ បើតាមលោក អ៊ូ ច័ន្ទឬទ្ធិ វត្តមានពេលនេះ គឺលោក កឹម សុខា និងតំណាងរាស្រ្តអមដំណើរ ១១រូបផ្សេងទៀត បានចូលជួបសួរសុខទុក្ខ សកម្មជនបក្សសង្រ្គោះជាតិ ដែលកំពុងជាប់ឃុំ និងផ្តល់ព័ត៌មានចុងក្រោយ ពិសេសអំពីជំនួប «បញ្ហាជាតិ» រវាងមេដឹកនាំបក្សសង្រ្គោះជាតិ និងបក្សប្រជាជនកម្ពុជា នាពេលថ្មីៗនេះ។ លោកបញ្ជាក់ថា សកម្មជនកំពុងជាប់ឃុំ បានសម្តែងក្តីរីករាយ និងឯកភាពចំពោះថ្នាក់ដឹកនាំ លោក កឹម សុខា ដែលបានលើកបញ្ហា សកម្មជនបក្សដែលកំពុងជាប់ពន្ធនាគារ ទាំង ១៥រូប ទៅចរចាជាមួយលោកនាយករដ្ឋមន្រ្តី ហ៊ុន សែន កាលពីថ្ងៃពុធ ដើម្បីឲ្យបានដោះលែងពួកគេនៅចុងឆ្នាំ ២០១៦នេះ។
ចេញពីមណ្ឌលកែប្រែភ្លាម លោក កឹម សុខា ក៏បានស្កាត់ទៅជួប លោក ស៊ាង ចែត មេឃុំស្រក មកពីគណបក្សសម រង្ស៊ី នៃស្រុកកំពង់សៀម ខេត្តកំពង់ចាម ដែលកំពុងរងចាំ នៅវត្តអង្គមេត្រី (កៀកនឹង ពន្ធនាគារ នេះដែរ) ដើម្បីសូត្រមន្តរំដោះគ្រោះ និងលើករាសីទាំងអស់គ្នា។ លោក ស៊ាង ចែត ត្រូវបានតុលាការ ដោះលែងចេញពីពន្ធនាគារ នៅម៉ោង ៩ ថ្ងៃទី០៨ ខែធ្នូ ឆ្នាំ២០១៦ នេះ តាមព្រះរាជក្រឹត្យ លើកលែងទោស របស់ព្រះមហាក្សត្រ ដែលធ្វើឡើងតាមសំណើសម្តេច ហ៊ុន សែន នាយករដ្ឋមន្រ្តីនៃកម្ពុជា កាលពី ថ្ងៃទី០៧ ខែធ្នូ ឆ្នាំ២០១៦។ លោក ស៊ាង ចែត ដែលត្រូវតុលាការ ផ្តន្ទាទោស ដាក់ពន្ធនាគាររយៈពេល ៥ឆ្នាំ ពីបទសូកប៉ាន់សាក្សី តាមមាត្រា ៥៤៨ នៃក្រមព្រហ្មទណ្ឌ កាលពីថ្ងៃទី ៥ ខែធ្នូ បន្ទាប់ពី អង្គភាពប្រឆាំងអំពើពុករលួយ ឃាត់ខ្លួន កាលពីថ្ងៃទី ២៤ ខែមេសា ឆ្នាំ២០១៦ តាមចម្លើយ របស់កញ្ញា ខុម ចាន់តារ៉ាទី ហៅ ស្រីមុំ បរិហារថា ជាអ្នកហាមនាង មិនឲ្យប្រាប់ការពិត ដល់សមត្ថកិច្ច អំពីទំនាក់ទំនងរវាងនាង និងលោក កឹម សុខា។
មុនពេលចាកចេញពីវត្តអង្គមេត្រី លោក ឡុង រី អង្គរក្ស និងតំណាងរាស្រ្ត បក្សសង្រ្គោះជាតិ បានហុចកញ្ចប់ថវិកា ក្នុងស្រោមសំបុត្រពណ៌ស រៀបចំជាស្រេច ជូនលោក កឹម សុខា ដើម្បីប្រគល់ជូន ស៊ាង ចែត មេឃុំស្រក លោក ស៊ាង ចែត មុនពេលដើរសំដៅរករថយន្តបញ្ជេះចាំជាស្រេច។ គឺទីនេះហើយ ដែលលោក កឹម សុខា ដាច់ចិត្តបង្ហើបមាត់ បន្លឺពាក្យថា «បរិយាកាសល្អ» ក្រោយអ្នកសារព័ត៌មានព្យាយាមជាលើកទីពីរស្នើសុំការអត្ថាធិប្បាយរបស់ប្រធានស្តីទីបក្សសង្រ្គោះជាតិ ក្រោយជំនួបសម្ងាត់ជាមួយនឹងលោកនាយករដ្ឋមន្រ្តី កាលពីថ្ងៃម្សិលមិញ។
គួរជម្រាបថា លោក ស៊ាង ចែត នៅតែអះអាងថា ខ្លួនលោកជា មនុស្សស្អាតស្អំ ហើយនឹងត្រឡប់ទៅស្រុកកំណើតវិញ ធ្វើជាមេឃុំស្រក បន្តទៀត ខណៈពលរដ្ឋមូលដ្ឋាននៅតែត្រូវការរូបលោក ហើយតំណែងជាមេឃុំស្រក មិនទាន់រុះរើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ