សវនាការសប្តាហ៍ទី៣៖ មេរៀនពីបរទេសនិងការបង្កើតបក្សសិទ្ធិមនុស្សត្រូវបានចោទខ្លាំងលើលោក កឹម សុខា
មិនខុសពីសប្តាហ៍មុនដែរ នៅសប្តាហ៍នេះ សវនាការសំណុំរឿងលោកកឹម សុខា ធ្វើឡើងតែមួយថ្ងៃកន្លះទេ ដោយបញ្ចប់នៅពេលថ្ងៃត្រង់នេះ។ នៅក្នុងសវនាការនៅព្រឹកមិញ លោកកឹម សុខា ត្រូវបានបន្តចោទសួរជាច្រើនជុំវិញការបង្កើតគណបក្សសិទ្ធិមនុស្ស និងសកម្មភាពនយោបាយរបស់លោកក្នុងចន្លោះឆ្នាំ២០០៧ដល់ឆ្នាំ២០១២។ កាលពីម្សិលមិញ លោកត្រូវបានជីកសួរដេញដោលពីអ្វីដែលលោកបានរៀនសូត្រពីបរទេស ជាពិសេសពីអាមេរិក និង សកម្មភាពនយោបាយរបស់លោកចន្លោះឆ្នាំ១៩៩៣ដល់ឆ្នាំ២០០៧។
ចុះផ្សាយនៅថ្ងៃ៖
ស្តាប់ - ០២:៤១
ការបង្កើតគណបក្សសិទ្ធិមនុស្ស និង សកម្មភាពនយោបាយរបស់លោកកឹម សុខា ចន្លោះឆ្នាំ២០០៧ដល់ឆ្នាំ២០១២ ដែលត្រូវចាប់ផ្តើមសវនាការចោទសួរនិងវែកញែកកាលពីរសៀលថ្ងៃពុធ ត្រូវបានបន្តធ្វើនៅព្រឹកថ្ងៃព្រហស្បតិ៍នេះ។ លោកកឹម សុខា ត្រូវបានតំណាងអយ្យការក៏ដូចជាមេធាវីតំណាងរដ្ឋាភិបាលកម្ពុជាបានចោទសួរជាច្រើនជុំវិញការបង្កើតគណបក្សសិទ្ធិមនុស្ស បន្ទាប់ពីលោកបានលាឈប់ពីប្រធានមជ្ឈមណ្ឌលសិទ្ធិកម្ពុជា។ សំណួរសំខាន់ដែលត្រូវបានចោទសួរឡើង គឺប្រភពថវិកាទ្រទ្រង់គណបក្សមួយនេះ។ លោកកឹម សុខា បានអះអាងថា ថវិកាសម្រាប់ទ្រទ្រង់គណបក្សសិទ្ធិមនុស្សរបស់លោក គឺទទួលបានពីអ្នកគាំទ្រ មិនមានការឧបត្ថម្ភពីបរទេសណាមួយនោះឡើយ។
សវនាការនៅព្រឹកមិញ មានជជែកគ្នាខ្លាំងមិនត្រឹមតែរវាងលោកកឹម សុខា ជាមួយនឹងតំណាងអយ្យការទេ ក៏មានការជជែកគ្នាខ្លាំងជាមួយក្រុមមេធាវីតំណាងរដ្ឋាភិបាលកម្ពុជាផងដែរ។ សំណួរខ្លះ ត្រូវបានលោកកឹម សុខា ឆ្លើយតប ខ្លះថា ភ្លេច និងខ្លះទៀតមិនបានឆ្លើយ។ យ៉ាងណាក៏ដោយ ការចោទសួរ និង វែកញែកលើសកម្មភាពរបស់លោកកឹម សុខា នៅចន្លោះឆ្នាំ២០០៧ដល់ឆ្នាំ២០១២នេះ នៅមិនទាន់ចប់សព្វគ្រប់នៅឡើយ គឺបន្តធ្វើនៅសប្តាហ៍ក្រោយទៀត។
ចំណែក កាលពីថ្ងៃពុធដែលថ្ងៃទី១នៃសវនាការសប្តាហ៍ទី៣នេះ លោកកឹម សុខា ត្រូវបានតំណាងអយ្យការ ក៏ដូចជាក្រុមប្រឹក្សាជំនុំជម្រះ និងមេធាវីតំណាងរដ្ឋាភិបាលកម្ពុជាជជីកសួរដោយសំណួរដដែលៗពីសកម្មភាពនយោបាយ និង ការដឹកនាំអង្គការសិទ្ធិមនុស្សនៅចន្លោះឆ្នាំ១៩៩៣ ដល់ឆ្នាំ២០០៧។ តំណាងអយ្យការ និងមេធាវីតំណាងរដ្ឋាភិបាលកម្ពុជា បានចោទសួរលោកកឹម សុខា ពីអ្វីដែលលោកបានរៀនសូត្រពីអ្នកជំនាញការនិងសាស្ត្រាចារ្យនៅអាមេរិកក៏ដូចជាការណែនាំឱ្យសកម្មភាពដូចនៅប្រទេសយូហ្គោស្លាវីជាដើម។
លោកកឹម សុខា បានអះអាងតបថា អ្វីដែលលោកបានរៀនសូត្រនោះ គឺផោ្តតសំខាន់ទៅលើបញ្ហាគោលការណ៍ប្រជាធិបតេយ្យ និង ការគោរពសិទ្ធិមនុស្ស។ បើតាមលោកកឹម សុខា អាមេរិកបានបង្រៀនលោកពីការដឹកនាំបែបប្រជាធិបតេយ្យ គឺការផ្លាស់ប្តូរតាមរយៈការបោះឆ្នោត ហើយលោកមិនបានគិតដល់ការផ្តួលរំលំរដ្ឋាភិបាលដោយវិធីមិនស្របច្បាប់ឡើយ។ ដោយសំណួរបុកសួរពីបញ្ហានេះខ្លាំងពេក លោកកឹម សុខា ក៏បានជំរុញឱ្យតុលាការកោះហៅតំណាងរដ្ឋាភិបាលអាមេរិកមកសួរបញ្ជាក់តែម្តង។ ប៉ុន្តែតុលាការមិនបានធ្វើតាមនោះឡើយ។
នៅមុនចូលសវនាការនាថ្ងៃទី២នៃសប្តាហ៍ទី៣នេះ លោកកឹម សុខា បានប្រាប់អ្នកសារព័ត៌មាននៅមុខគេហដ្ឋានរបស់លោកថា លោកគឺជាមនុស្សស្អាតស្អំ ហើយសហរដ្ឋអាមេរិកក៏បានបញ្ជាក់រួចហើយថា រូបលោក និងអាមេរិកមិនជាប់ពាក់ព័ន្ធគ្នាក្នុងរៀបចំផែនការចង់ផ្តួលរំលំរដ្ឋាភិបាលកម្ពុជាឡើយ។ សូមបញ្ជាក់ថា សវនាការបន្ទាប់របស់លោកកឹម សុខា នឹងធ្វើនៅថ្ងៃពុធ និង ព្រហស្បតិ៍នាសប្តាហ៍ក្រោយបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ