តំណាងរាស្ត្រដែលរងគ្រោះក្នុងអំពើហិង្សា បាក់ឆ្អឹងច្រើនកន្លែង និងរហែកក្រដាសត្រចៀក
លោក កឹម សុខា ដែលបានដឹកនាំមន្ត្រីគណបក្សសង្គ្រោះជាតិមួយក្រុម ទៅសួរសុខទុក្ខលោក ញ៉យ ចំរើន និងលោក គង់ សុភា នៅប្រទេសថៃ តាំងពីល្ងាចម្សិលមិញ បានប្រាប់នៅថ្ងៃនេះថា ជនរងគ្រោះក្នុងអំពើហិង្សាកាលពីថ្ងៃចន្ទ បាក់ឆ្អឹងច្រើនកន្លែង និងរហែកក្រដាសត្រចៀក។ ចំពោះអំពើហិង្សាមកលើអ្នកតំណាងរាស្ត្រទាំងពីររូបនោះ គណបក្សខ្លះដែលនៅក្រៅរដ្ឋសភាបានបញ្ចេញសេចក្តីថ្លែងការណ៍ជាបន្តបន្ទាប់។
ចុះផ្សាយនៅថ្ងៃ៖
ស្តាប់ - ០២:៣៤
លោក កឹម សុខា បានប្រាប់នៅព្រឹកថ្ងៃពុធថា ជំងឺរបស់សមាជិកសភាខាងគណបក្សសង្គ្រោះជាតិពីររូបដែលរងគ្រោះដោយសារការវាយដំដ៏ហិង្សាពីសំណាក់មនុស្សមួយក្រុមកាលពីថ្ងៃចន្ទ មាន«សភាពធ្ងន់ធ្ងរ»។ លោកអនុប្រធានគណបក្សសង្គ្រោះជាតិបញ្ជាក់តាមហ្វេសប៊ុកថា លោក ញ៉យ ចំរើន តំណាងរាស្ត្រមណ្ឌលកំពង់ចាម «បាក់ឆឹ្អងកដៃខាងស្តាំ និងបាក់ឆ្អឹងរង្វង់ភ្នែកខាងស្តាំ» រីឯលោក គង់ សភា តំណាងរាស្ត្រមណ្ឌលស្វាយរៀង «បាក់ឆ្អឹងខ្ទង់ច្រមុះ និងរហែកក្រដាសត្រចៀក»។
ការវះកាត់ដើម្បីព្យាបាលត្រូវបានធ្វើកាលពីថ្ងៃអង្គារ និងត្រូវបន្តធ្វើនៅព្រឹកថ្ងៃពុធទៀត។ នេះបើតាមលោក កឹម សុខា ដែលបានដឹកនាំមន្ត្រីជាន់ខ្ពស់គណបក្សសង្គ្រោះជាតិមួយក្រុម ចាកចេញពីកម្ពុជានៅល្ងាចថ្ងៃអង្គារ ដើម្បីទៅសួរសុខទុក្ខជនរងគ្រោះ។ អំឡុងពេលចេញដំណើរទៅប្រទេសថៃនោះ អនុប្រធានគណបក្សប្រឆាំង បានផ្តល់ដំណឹងថា លោក«ព្រួយបារម្ភយ៉ាងខ្លាំង» ត្បិតតំណាងរាស្ត្ររងគ្រោះទាំងពីររូប ស្ថិតក្នុង«ស្ថានភាពធ្ងន់ធ្ងរ» បន្ទាប់ពីមាន«ការវាយដំយ៉ាងសាហាវឃោឃៅពីសំណាក់បាតុករ ជាជនពាលក្នុងក្បួនបាតុកម្មហិង្សានៅមុខរដ្ឋសភា កាលពីថ្ងៃទី២៦ ខែតុលា»។
ទោះបីជាអ្នកនាំពាក្យរដ្ឋាភិបាលកម្ពុជា និងសាលារាជធានីភ្នំពេញ បានអះអាងជាបន្តបន្ទាប់នៅថ្ងៃអង្គារ និងថ្ងៃពុធថា អំពើហិង្សានោះបានកើតឡើង«បន្ទាប់ពីក្រុមបាតុករបានរំសាយរួចរាល់ហើយ»ក្តី ក៏គណបក្សនៅក្រៅរដ្ឋសភាយ៉ាងតិចពីរ បានភ្ជាប់ព្រឹត្តិការណ៍នៅថ្ងៃចន្ទ ទៅនឹងទំនាស់រវាងគណបក្សកាន់អំណាច និងគណបក្សប្រឆាំងដែរ។
ជាក់ស្តែង គណបក្សប្រជាធិបតេយ្យមូលដ្ឋានបានថ្លែងនៅថ្ងៃពុធថា ខ្លួន«មានការព្រួយបារម្ភចំពោះពាក្យសម្ដីវាយប្រហារ មាក់ងាយ និងគំរាមគ្នា រវាងមេដឹកនាំគណបក្សប្រជាជនកម្ពុជា និង[មេដឹកនាំគណបក្ស]សង្គ្រោះជាតិ ដែលអាចនឹងបង្កឱ្យមានអំពើហិង្សាច្រើនថែមទៀតនៅកម្ពុជា»។ មុននេះមួយថ្ងៃ គណបក្សសម្ព័ន្ធដើម្បីប្រជាធិបតេយ្យ ក៏បានពន្យល់ថា អំពើហិង្សាដែលគណបក្សនេះ អះអាងថាមានលក្ខណៈ«នយោបាយ»នោះថា ដោយសារតែអ្នកនយោបាយ«ឆ្លៀតកេងចំណេញលើគ្នាទៅវិញទៅមក»តាមរយៈ«អំណាចប្រមូលផ្តុំទៅលើតែអ្នកដឹកនាំ»។
សូមរម្លឹកថា កាលពីថ្ងៃចន្ទ ទី២៦ ខែតុលា ឆ្នាំ២០១៥ មនុស្សរាប់ពាន់នាក់បានធ្វើបាតុកម្មនៅឯវិមានរដ្ឋសភា និងនៅឯគេហដ្ឋានរបស់លោក កឹម សុខា ដើម្បីទាមទារឱ្យអនុប្រធានគណបក្សសង្គ្រោះជាតិរូបនេះបោះបង់តំណែងអនុប្រធានរដ្ឋសភាចោល។ បាតុកម្មនោះត្រូវបានរៀបចំឡើងក្នុងរយៈពេលមួយថ្ងៃ ក្រោយពីអនិកជនខ្មែរនៅអឺរ៉ុបប្រមាណជា២០០នាក់ បានប្រមូលផ្តុំគ្នា ស្រែកទាមទារឱ្យលោកនាយករដ្ឋមន្ត្រី ហ៊ុន សែន ដែលស្ថិតក្នុងដំណើរទស្សនកិច្ចផ្លូវការនៅប្រទេសបារាំង ចុះចេញពីអំណាច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ