អង្គការសង្គមស៊ីវិល ៨ ទាមទារឱ្យរដ្ឋាភិបាលកម្ពុជា ដោះលែងមេដឹកនាំបក្សប្រឆាំង
កាលពីថ្ងៃពុធ (ម្សិលមិញ) អង្គការសង្គមស៊ីវិល ដែលធ្វើការផ្នែកសិទ្ធិមនុស្សនៅកម្ពុជា ចំនួន ៨ បានចេញសេចក្តីថ្លែងការណ៍រួមគ្នាមួយ ទាមទារឱ្យរដ្ឋាភិបាលទម្លាក់ចោលការចោទប្រកាន់ និងដោះលែងមេដឹកនាំបក្សប្រឆាំង ដើម្បីបំពេញដំណើរការបោះឆ្នោតដោយសេរី និងយុត្តិធម៌នៅពេលខាងមុខ។ តែអ្នកនាំពាក្យគណបក្សប្រជាជនកម្ពុជា បានចាត់ទុកថា នេះគ្រាន់តែជាការព្រួយបារម្ភរបស់អង្គការសង្គមស៊ីវិលមួយចំនួនតូចនៅកម្ពុជា ដែលមានអារម្មណ៍មនោសញ្ចេតនា លម្អៀងទៅរកបក្សប្រឆាំងប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៤០
អង្គការសង្គមស៊ីវិលទាំង ៨ រួមមាន សមាគមអាដហុក អង្គការ GADC អង្គការនិកហ្វិច អង្គការខុមហ្វ្រែល សភាយុវជនខ្មែរ ក្រុមការងារសិទ្ធិលំនៅដ្ឋាន អង្គការ CISA និងអង្គការ ANSA បានចេញសេចក្តីថ្លែងការណ៍រួមគ្នាមួយ កាលពីថ្ងៃម្សិលមិញ ទាមទារឱ្យរដ្ឋាភិបាលដោះលែងមេដឹកនាំបក្សប្រឆាំង លោក សម រង្ស៊ី និងលោក កឹម សុខា ដើម្បីអោយពួកគេអាចចូលរួមដឹកនាំការប្រកួតប្រជែងនយោបាយ និងបំពេញដំណើរការបោះឆ្នោតដោយសេរី និងយុត្តិធម៌ ពេញលេញនៅពេលខាងមុខ។
លោក សម គន្ធាមី នាយកប្រតិបត្តិអង្គការ និកហ្វិច បានថ្លែងថា ការអនុវត្តសាលក្រមទៅលើ មេដឹកនាំបក្សសង្រ្គោះជាតិ គឺរឿងនយោបាយ ដែលតុលាការមិនងាយដោះស្រាយបានឡើយ ទើបទាមទារអោយមានការចរចានយោបាយ ដើម្បីបញ្ចប់រឿង។ លោកបន្ថែមថា អវត្តមានមេដឹកនាំបក្សប្រឆាំង ក្នុងការឃោសនានយោបាយ នឹងប៉ះពាល់យ៉ាងខ្លាំងដល់គុណភាពនៃការប្រកួតប្រជែងក្នុងការបោះឆ្នោតដោយសេរី និងយុត្តិធម៌។ សង្គមស៊ីវិល នឹងនៅតែបន្ត អំពាវនាវស្នើសុំ អោយរដ្ឋាភិបាលពិចារណាទម្លាក់ចោលការចោទប្រកាន់ និងដោះលែងមេដឹកនាំបក្សប្រឆាំង ដើម្បីធ្វើអោយប្រសើរឡើងវិញនូវ ដំណើការប្រជាធិបតេយ្យសេរីពហុបក្ស និងដំណើរការសន្ទនានយោបាយនៅកម្ពុជា
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានបដិសេធភ្លាមៗថា បញ្ហាលោក សម រង្ស៊ី និងលោក កឹម សុខា គឺជារឿងផ្លូវច្បាប់ ដែលកើតចេញពីអំពើល្មើសច្បាប់ របស់អ្នកនយោបាយបក្សសង្រ្គោះជាតិ និងត្រូវតែទទួលខុសត្រូវចំពោះមុខច្បាប់ ស្របតាមនីតិរដ្ឋ។ លោកបានចាត់ទុកថា ការព្រួយបារម្ភរបស់អង្គការសង្គមស៊ីវិលមួយចំនួនតូច គឺជាអារម្មណ៍មនោសញ្ចេតនា លម្អៀងទៅរកបក្សប្រឆាំង ដែលមិនត្រឹមត្រូវតាមទិដ្ឋភាពជាក់ស្តែងនៅកម្ពុជាទេ។
គួរជម្រាបថា សេចក្តីថ្លែងការណ៍ របស់សមាជិកសម័្ពន្ធកំណែទម្រង់ការបោះឆ្នោត នៅកម្ពុជា កាលពីថ្ងៃទី១៤ កញ្ញា បានចេញផ្សាយ ស្របពេលនឹងសេចក្តីថ្លែងការណ៍រួមគ្នារបស់ប្រទេស ៣៦ ស្តីពីកង្វល់លើសិទ្ធិមនុស្សនៅកម្ពុជា។ គឺអំឡុងសម័យប្រជុំ ក្រុមប្រឹក្សាសិទ្ធិមនុស្សរបស់អង្គការសហប្រជាជាតិ លើកទី ៣៣ នៅទីក្រុងហ្សឺណែវ ប្រទេសស្វីស ប្រទេសចំនួន ៣៦ រួមមាន ប្រទេសអាល់បានី អូស្រ្តាលី ជប៉ុន កាណាដា ម៉ាសេដូនី ណ័រវ៉េ ស្វីស ប្រទេសចំនួន ២៨ ជាសមាជិកនៃសហភាពអឺរ៉ុប និងសហរដ្ឋអាមេរិក បានចេញសេចក្តីប្រកាសរួមគ្នា ចំពោះការកើនឡើងភាពតានតឹងនយោបាយ នៅកម្ពុជា នាពេលនេះ ដែលគំរាមកំហែងដល់សកម្មភាពស្របច្បាប់របស់គណបក្សប្រឆាំង និងអង្គការមិនមែនរដ្ឋាភិបាល ធ្វើការផ្នែកសិទ្ធិមនុស្ស។ រដ្ឋទាំង ៣៦ នោះ មានកង្វល់ជាពិសេសទៅលើការប្តឹងទៅតុលាការ ដោយមិនទំនង ប្រឆាំងនឹងអ្នករិះគន់រដ្ឋាភិបាល។ សេចក្តីថ្លែងការណ៍ជាសកលនោះ បានអំពាវនាវអោយរដ្ឋាភិបាលកម្ពុជា ខិតខំជាអតិបរិមា ដើម្បីបង្កើតបរិយាកាសនយោបាយមួយ ដែលក្នុងនោះ គណបក្សប្រឆាំង និងសង្គមស៊ីវិល អាចធ្វើសកម្មភាពបានដោយសេរីនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ