កឹម សុខា អះអាងថាបក្សប្រឆាំងមិនបានត្រៀមធ្វើអំពើហិង្សានៅមុនឬក្រោយបោះឆ្នោតឡើយ
លោក កឹម សុខា ប្រធានគណបក្សសង្គ្រោះជាតិ លើកឡើងថា បក្សរបស់ខ្លួនគ្មានគម្រោងធ្វើអំពើហិង្សាឡើយ បើទោះបីជានៅមុន ឬក្រោយបោះឆ្នោត។ បើតាមលោក កឹម សុខា គណបក្សសង្គ្រោះជាតិត្រូវបានគេមួលបង្កាច់ និងលាបពណ៌ ថាបានបង្កអំពើហិង្សា។
ចុះផ្សាយនៅថ្ងៃ៖
ស្តាប់ - ០២:០០
គណបក្សសង្គ្រោះជាតិបានកោះប្រជុំថ្នាក់ដឹកនាំគណបក្សសង្គ្រោះជាតិទូទាំងរាជធានី ខេត្ត កាលពីព្រឹកមិញនៅស្នាក់ការគណបក្ស នៅចាក់អង្រែ ក្រុងភ្នំពេញ។ ការប្រជុំនេះធ្វើឡើងនៅខណៈពេលគណបក្សនេះត្រូវបានក្រសួងមហាផ្ទៃប្រកាសស៊ើបអង្កេតទៅលើប្រភពថវិកា។ ហើយក៏ចំពេលរដ្ឋាភិបាលកម្ពុជាបានប្រកាសបិទស្ថានីយ៍វិទ្យុមួយចំនួន និងអង្គការ NDI ផងដែរ។
តាមរយៈសេចក្ដីប្រកាសព័ត៌មានរបស់គណបក្សសង្គ្រោះជាតិនៅថ្ងៃទី៣០ សីហា នេះ លោក កឹម សុខា ថ្លែងថា គណបក្សសង្គ្រោះជាតិ មិនបានគិត មិនបានត្រៀម និងមិនធ្វើសកម្មភាពណាដែលជាអំពើហិង្សា នៅមុន ឬក្រោយបោះឆ្នោតដូចការមួលបង្កាច់នោះឡើយ។
លោក កឹម សុខា ក៏បានបញ្ជាក់ផងដែរថា ស្ថានភាពបច្ចុប្បន្នរបស់កម្ពុជាបច្ចុប្បន្នកំពុងធ្វើឲ្យមជ្ឈដ្ឋានជាតិ និងអន្ដរជាតិ យល់ឃើញថា នឹងធ្វើឲ្យប៉ះពាល់ ដល់ដំណើរការ ភាពសេរី ភាពត្រឹមត្រូវ និងយុត្តិធម៌ ក្នុងការបោះឆ្នោតជ្រើសរើសតំណាងរាស្រ្ត នៅឆ្នាំ២០១៨ខាងមុខ។ ក្រៅពីនេះ លោកក៏បានស្នើឲ្យថ្នាក់ដឹកនាំគណបក្សនេះ រក្សាសកម្មភាពបក្សរបស់ខ្លួនតាមគោលការណ៍គណបក្សដែលបានកំណត់ដើម្បីឈានទៅដល់ការឆ្ពោះការបោះឆ្នោតនៅឆ្នាំក្រោយ។
សូមបញ្ជាក់ថា កាលជួបប្រជុំរបស់លោក កឹម សុខា ជាមួយថ្នាក់ដឹកនាំគណបក្សសង្គ្រោះជាតិនៅពេលនេះ ធ្វើឡើងនៅពេល រដ្ឋាភិបាលកម្ពុជាបានប្រកាសរឹតបណ្ដឹងអង្គការក្រៅរដ្ឋាភិបាល និងមានការបិទប្រព័ន្ធផ្សព្វផ្សាយមួយចំនួនដែលធ្វើការពាក់ព័ន្ធជាមួយគណបក្សគណបក្សប្រឆាំង។ ថ្មីៗនេះរដ្ឋាភិបាលកម្ពុជា បានសម្រេចបញ្ឈប់សកម្មភាពរបស់វិទ្យាស្ថានជាតិប្រជាធិបតេយ្យ(NDI) និងបិទស្ថានីយ៍វិទ្យុដែលលក់ម៉ោងផ្សាយឱ្យវិទ្យុអាស៊ីសេរី សម្លេងសហរដ្ឋអាមេរិក និងវិទ្យុសម្លេងប្រជាធិបតេយ្យ។ ចំណាត់ការរបស់រដ្ឋាភិបាលកម្ពុជាត្រូវបានអ្នកវិភាគមួយរូបចាត់ទុកថា គឺជាចំណាត់ការដើម្បីបោសសំអាតឧបសគ្គរាំងផ្លូវរបស់គណបក្សប្រជាជនកម្ពុជា ឆ្ពោះទៅរកជ័យជម្នះនៅក្នុងការបោះឆ្នោតជាតិឆ្នាំក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ