យុវជនខ្មែរកម្ពុជាក្រោម ដាក់ញ្ញត្តិជាថ្មីសុំដំណោះស្រាយពីនាយករដ្ឋមន្ត្រី និងបក្សប្រឆាំង
តំណាងយុវជនខ្មែរកម្ពុជាក្រោម ចំនួន៤នាក់ នៅព្រឹកថ្ងៃពុធ ទី០៣មិថុនានេះ បាននាំគ្នាយកញ្ញត្តិ ស្តីពីបញ្ហារបស់ខ្មែរកម្ពុជាក្រោម ទៅដាក់នៅស្នាក់ការគណបក្សសង្គ្រោះជាតិ និងទីស្តីការគណៈរដ្ឋមន្ត្រី។ ជាការដាក់ញ្ញត្តិ ដើម្បីស្នើសុំឲ្យរដ្ឋាភិបាល និងគណបក្សប្រឆាំង ជួយអន្តរាគមលើបញ្ហាដែលពលរដ្ឋខ្មែរកម្ពុជាក្រោម កំពុងតែជួបប្រទះ ទាំងនៅក្នុងទឹកដីខ្មែរកម្ពុជាក្រោម និងនៅក្នុងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០១:៤៩
តំណាងយុវជន មកពីបណ្តាញយុវជនខ្មែរកម្ពុជាក្រោម នៅព្រឹកថ្ងៃទី ០៣មិថុនា បាននាំគ្នាយកញ្ញត្តិ និងរបាយការណ៍កម្រាស់ ២០ទំព័រ ទៅដាក់នៅស្នាក់ការគណបក្សសង្គ្រោះជាតិ បំណងឲ្យលោកសម រង្ស៊ី ប្រធានគណបក្ស ពិនិត្យ និងមានអន្តរាគម។ និងទៅដាក់នៅទីស្តីការគណៈរដ្ឋមន្ត្រី ដើម្បីលោកនាយករដ្ឋមន្ត្រីហ៊ុន សែន ផ្តល់ដំណោះស្រាយសមស្របមួយ ដល់ពលរដ្ឋខ្មែរកម្ពុជាក្រោម។
លោកសឺន ជុំជួន នាយកកម្មវិធីសមាគមខ្មែរកម្ពុជាក្រោមដើម្បីសិទ្ធិមនុស្ស និងអភិវឌ្ឍន៍ បានប្រាប់វិទ្យុបារាំងថា នេះមិនមែនជាលើកទី១ដែរ ដែលក្រុមយុវជនខ្មែរកម្ពុជាក្រោម បានដាក់ញ្ញត្តិសុំអន្តរាគមន៍ពីបញ្ហាខ្មែរកម្ពុជាក្រោមនេះ។ ប៉ុន្តែពួកគេ មិនដែលទទួលបានដំណោះស្រាយសមរម្យណាមួយនៅឡើយទេ ពីថ្នាក់ដឹកនាំ។
តាមតំណាងសមាគមខ្មែរកម្ពុជាក្រោមរូបនេះ ការដាក់ញ្ញត្តិទៅគណបក្សកាន់អំណាច និងបក្សប្រឆាំងនៅពេលនេះ គឺដោយសារបក្សទាំងពីរ បានបង្កើតវប្បធម៌សន្ទនានឹងគ្នា។ ដូច្នេះយុវជនខ្មែរកម្ពុជាក្រោម សង្ឃឹមថា វប្បធម៌នេះ នឹងអាចធ្វើឲ្យប្រមុខដឹកនាំទាំងពីរ បង្កើតការពិភាក្សារួមគ្នា ពីបញ្ហារបស់ពលរដ្ឋខ្មែរកម្ពុជាក្រោមដែរ។
បញ្ហារបស់ខ្មែរកម្ពុជាក្រោម ដែលបើតាមលោកសឺន ជុំជួន គឺរួមមានការរំលោភសិទ្ធិមនុស្ស របស់អាជ្ញាធរវៀតណាម សិទ្ធិទទួលបានព័ត៌មាន ការគំរាមកំហែងចំពោះសាសនា វប្បធម៌ ប្រពៃណី និងការអប់រំ ដល់ប្រជាពលរដ្ឋ ដែលរស់នៅក្នុងទឹកដីខ្មែរកម្ពុជាក្រោម។ សម្រាប់ពលរដ្ឋខ្មែរក្រោម ដែលមករស់នៅទឹកដីកម្ពុជាវិញ គឺពួកគេជួបការលំបាក ក្នុងការតាំងទីលំនៅ ដែលរដ្ឋាភិបាល នៅមិនទាន់មានដំណោះស្រាយនៅឡើយទេ។
ការដាក់ញ្ញត្តិរបស់យុវជនខ្មែរកម្ពុជាក្រោម នៅពេលនេះ ក៏ស្របពេលដែលនៅថ្ងៃទី ០៤មិថុនា សហគមន៍ខ្មែរកម្ពុជាក្រោម នឹងប្រារព្ធពិធីរាប់បាត្រព្រះសង្ឃចំនួន ១៩៤៩អង្គ និងប្រារព្ធទិវាកាន់ទុក្ខជាតិ ថ្ងៃបាត់បង់ទឹកដីខ្មែរកម្ពុជាក្រោមផងដែរ។ ក្រុមយុវជនខ្មែរកម្ពុជាក្រោម ចង់ឲ្យប្រមុខដឹកនាំប្រទេស មានការយល់ដឹងបន្ថែមពីទុក្ខលំបាករបស់ពលរដ្ឋខ្មែរក្រោម ដែលតែងតែចង់រក្សាទឹកដី មិនឲ្យបាត់បង់បន្ត និងមិនចង់ឲ្យមានការគាបសង្កត់ពីបរទេស ខណៈពួកគេ ក៏ជាជនជាតិខ្មែរដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ