ព្រះមហាក្សត្រខ្មែរបានយាងបំពេញទស្សនកិច្ចផ្លូវរដ្ឋនៅឡាវរយៈពេល៣ថ្ងៃ
ព្រះមហាក្សត្រខ្មែរបានយាងចេញពីប្រទេសកម្ពុជា ដើម្បីបំពេញទស្សនកិច្ចនៅក្រៅប្រទេស ជាលើកទី៣ ក្នុងរយៈពេល៣ខែចុងក្រោយនៃឆ្នាំ២០១៥។ ទស្សនកិច្ចផ្លូវរដ្ឋរបស់ព្រះអង្គនៅប្រទេសឡាវ ចាប់ពីថ្ងៃចន្ទនេះ រហូតដល់ថ្ងៃពុធ មិនបង្ហាញកម្មវត្ថុច្បាស់លាស់ទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ព្រះបាទ នរោត្តម សីហមុនី បានយាងចេញពីប្រទេសកម្ពុជានាព្រឹកថ្ងៃចន្ទ ដើម្បីផ្តើមបំពេញទស្សនកិច្ចផ្លូវរដ្ឋរយៈពេល៣ថ្ងៃនៅប្រទេសឡាវ តាមសំណើរបស់លោកប្រធានរដ្ឋ ជូមម៉ាលី សាយ៉ាសន (Choummaly Sayasone)។
មុននេះបន្តិច ព្រះអង្គបានយាងទៅប្រទេសបារាំងពីថ្ងៃទី២២ ខែវិច្ឆិកា ដល់ថ្ងៃទី០៦ ខែធ្នូ ដើម្បីចូលរួមបើកសន្និសីទពិភពលោកស្តីពីការប្រែប្រួលអាកាសធាតុ។ មុននេះទៀត ពោលគឺចាប់ពីថ្ងៃទី១៩ ដល់ថ្ងៃទី២២ ខែតុលា សម្ដេចព្រះបរមនាថបានយាងទៅទីក្រុងវ៉េ (Hue) និងទីក្រុងដាឡាត់ (Dalat) ដើម្បីសម្រាកព្រះកាយក្នុងដំណើរទស្សនកិច្ចក្រៅផ្លូវការ តាមសំណើសុំយាងពីមេដឹកនាំនៃប្រទេសវៀតណាមដែលជាអ្នកជិតខាងកម្ពុជា។
នៅឯអាកាសយានដ្ឋានអន្តរជាតិភ្នំពេញនាព្រឹកថ្ងៃចន្ទ ប្រធានព្រឹទ្ធសភា លោក សាយ ឈុំដែលជាប្រមុខរដ្ឋស្ដីទី ប្រធានរដ្ឋសភា លោក ហេង សំរិន និងលោកនាយករដ្ឋមន្ត្រី ហ៊ុន សែន បានជូនព្រះរាជដំណើរព្រះមហាក្សត្រ។
ព្រះរាជសាររបស់ព្រះករុណា នរោត្តម សីហមុនី មិនបានបង្ហាញកម្មវត្ថុនៃទស្សនកិច្ចផ្លូវរដ្ឋនៅប្រទេសឡាវ ដែលស្ថិតនៅជាប់ព្រំដែនកម្ពុជាទេ ហើយអ្នកនាំពាក្យឱ្យក្រសួងការបរទេសខ្មែរ ក៏មិនបានផ្តល់ព័ត៌មានលម្អិតអំពីរឿងនោះដែរ។
តាមទម្លាប់ ក្រៅពីដើម្បីរឹតចំណងសាមគ្គីភាពជាមួយបណ្ដាប្រទេសជាមិត្ត ដំណើរទស្សនកិច្ចរបស់ឥស្សរជនកំពូលៗរបស់កម្ពុជាទៅក្រៅប្រទេស ត្រូវបានអះអាងថាមានគោលបំណងពង្រឹង និងពង្រីកកិច្ចសហប្រតិបត្តិការទ្វេភាគី ឬពហុភាគីក្នុងតំបន់ ក៏ដូចជាក្នុងពិភពលោក លើវិស័យជាច្រើន។
បច្ចុប្បន្ន កម្ពុជាកំពុងជាប់ដៃដោះស្រាយជម្លោះព្រំដែនជាមួយវៀតណាម ឡាវ និងថៃ ដោយសន្តិវិធី។ ទន្ទឹមនឹងនេះ ជម្លោះដែនសមុទ្រចិនខាងត្បូង រវាងចិន និងសមាជិកអាស៊ានមួយចំនួនទៀត ក៏ទំនងជាអាចត្រូវការតួនាទីសម្របសម្រួលរបស់កម្ពុជាដែរ ព្រោះសមាជិកអាស៊ានចុងក្រោយគេនេះ មិនចង់ឃើញប្រទេសជាប់ជម្លោះធ្វើសង្គ្រាមនឹងគ្នារឿងព្រំដែនទេ។
តាមគម្រោង ព្រះបាទ នរោត្តម សីហមុនី នឹងបញ្ចប់ទស្សនកិច្ចផ្លូវរដ្ឋរបស់ព្រះអង្គក្នុងប្រទេសឡាវ នៅថ្ងៃពុធ ទី២៣ ខែធ្នូ ឆ្នាំ២០១៥៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ