រដ្ឋាភិបាលកម្ពុជាប្រារព្ធខួប ២៥ឆ្នាំ នៃកិច្ចព្រមព្រៀងសន្តិភាពទីក្រុងប៉ារីស ២៣តុលា ១៩៩១
ខុសប្លែកពីរាល់ឆ្នាំ ខួបលើកទី ២៥ឆ្នាំ នៃកិច្ចព្រមព្រៀងសន្តិភាពទីក្រុងប៉ារីសនៅឆ្នាំនេះ ត្រូវបានប្រារព្ធធ្វើឡើងយ៉ាងទូលំទូលាយ រាប់ចាប់តាំងពីរដ្ឋាភិបាល ក្រុមអង្គការសង្គមស៊ីវិល រួមទាំងគណបក្សប្រឆាំងផង។ នៅថ្ងៃនេះ ក្រសួងការបរទេសកម្ពុជាសហការជាមួយស្ថានទូតបារាំងប្រចាំនៅកម្ពុជា បានរៀបចំពិធីរំលឹកខួប នៃកិច្ចព្រមព្រៀងនេះនៅឯក្រសួងការបរទេសកម្ពុជា ដោយបានលើកឡើងពីសមិទ្ធផលជាច្រើន ក្រោយកិច្ចព្រមព្រៀង ២៥ឆ្នាំមក។
ចុះផ្សាយនៅថ្ងៃ៖
ស្តាប់ - ០២:៣៥
ពិធីអបអរសាទរខួប ២៥ឆ្នាំនៃកិច្ចព្រមព្រៀងសន្តិភាពទីក្រុងប៉ារីស ដែលត្រូវបានរៀបចំធ្វើឡើងនៅឯទីស្តីការក្រសួងការបរទេសកម្ពុជា នៅថ្ងៃទី ២០តុលាឆ្នាំ២០១៦នេះ ត្រូវបានធ្វើឡើង ដោយមានការចូលរួមពីតួអង្គ និងសាក្សីសំខាន់ៗនៃដំណាក់ចរចាដំបូងៗ ដែលក្នុងនោះក៏មានវត្តមានរបស់ឯកអគ្គរដ្ឋទូតលោក Jean-David Levitte ឯកអគ្គរដ្ឋទូតបារាំងប្រចាំនៅកម្ពុជា លោក Jean-Claude Poimboeuf និងវត្តមានរបស់តំណាងស្ថានទូតឥណ្ឌូនេស៊ី ដែលជាសហប្រធាននៃសន្និសីទទីក្រុងប៉ារីសនេះផង។
នៅក្នុងសុន្ទរកថាស្វាគមន៍របស់លោកទេសរដ្ឋមន្រ្តី ប្រាក់ សុខុន រដ្ឋមន្រ្តីក្រសួងការបរទេសកម្ពុជា លោកបានរំលឹកពីវីរៈភាព អ្នកដែលបង្កើតកិច្ចព្រមព្រៀងនេះ គឺសម្តេចឪ នរោត្តមសីហនុ និងលោកនាយករដ្ឋមន្ត្រីហ៊ុនសែន។ ក្រៅពីនេះ លោកទេសរដ្ឋមន្ត្រី ក៏បានលើកឡើងពីសមទ្ធិផលរយៈពេល ២៥ឆ្នាំ ក្រោយកម្ពុជាបានចុះកិច្ចព្រមព្រៀង ដូចជា ការបង្កើតសង្គមប្រជាធិបតេយ្យ ការលើកកម្ពស់សិទ្ធិមនុស្ស ការបញ្ចេញទ័ពកម្ពុជាទៅរក្សាសន្តិភាពនៅប្រទេសមួយចំនួន។ មិនត្រឹមតែប៉ុណ្ណោះកម្ពុជា ក៏កំពុងពង្រឹងខ្លួនឯង ដើម្បីឈានទៅរកសង្គមដ៏ទំនើបមួយ។
សូមបញ្ជាក់ថា កិច្ចព្រមព្រៀងសន្តិភាពទីក្រុងប៉ារីស ថ្ងៃទី ២៣តុលាឆ្នាំ ១៩៩១ គឺជាកិច្ចព្រមព្រៀង ដែលក្រុមប្រដាប់អាវុធ ៤ភាគីរបស់ខ្មែរ បានអង្គុយចុះហត្ថលេខាបញ្ចប់សង្គ្រាមស៊ីវិលជាងពីរទស្សវត្សនៅកម្ពុជា ដោយមានការគាំទ្រពីបណ្តាប្រទេសជាមិត្ត ពិសេស គឺប្រទេសបារាំង និងឥណ្ឌូនេស៊ី។ ប៉ុន្តែកិច្ចព្រមព្រៀងកាលណោះ មិនទាន់បញ្ចប់សង្រ្គាមស៊ីវិលនៅកម្ពុជាទាំងស្រុងនោះទេ គេត្រូវរងចាំរហូតដល់ឆ្នាំ ១៩៩៨។
ថ្លែងមកពីខេត្តប៉ៃលិន ដែលជាអតីតតំបន់សមរភូមិខ្មែរក្រហមកាន់កាប់ កាលពីថ្ងៃម្សិលមិញ លោកនាយករដ្ឋមន្រ្តី ហ៊ុន សែន បានអះអាងថា បើគ្មានការចរចារវាង “សីហនុ-ហ៊ុនសែន” ជាមុនទេនោះ គឺគ្មានទេ កិច្ចព្រមព្រៀងក្រុងប៉ារីស ហើយបើគ្មាននយោបាយឈ្នះឈ្នះ ក៏គ្មានដែរ សន្តិភាពនៅកម្ពុជាដូចពេលបច្ចុប្បន្ននេះ។
គួរជម្រាបជូនថា ខួប ២៥ឆ្នាំនៃកិច្ចព្រមព្រៀងសន្តិភាពទីក្រុងប៉ារីសឆ្នាំនេះ ត្រូវបានប្រារព្ធធ្វើឡើងយ៉ាងទូលំទូលាយរាប់ចាប់តាំងពីរដ្ឋាភិបាលកម្ពុជា អង្គការសង្គមស៊ីវិល និងគណបក្សប្រឆាំងផង។ គណបក្សប្រឆាំងធំជាងគេនៅកម្ពុជា គ្រោងនឹងប្រារព្ធពិធីនេះ នៅឯទីលានប្រជាធិបតេយ្យ នៅព្រឹកថ្ងៃទី ២៣តុលាខាងមុខ ក៏ប៉ុន្តែរហូតមកទល់នឹងពេលនេះ នៅមិនទាន់ទទួលបានភ្លើងខៀវពីអាជ្ញាធរនៅឡើយទេ។
សូមបញ្ជាក់ដែរថា ក្នុងរយៈពេល ២៥ឆ្នាំមកនេះ ភាគីគណបក្សប្រឆាំង និងអង្គការសង្គមស៊ីវិលនៅកម្ពុជានៅតែរិះគន់ថា រដ្ឋាភិបាលកម្ពុជានៅតែមិនទាន់អាចអនុវត្តឲ្យបានពេញលេញនូវខ្លឹមសារនៃកិច្ចព្រមព្រៀងនេះនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ