ម្រេចកំពតត្រូវបានទទួលស្គាល់ជាផ្លូវការនិងការពារដោយសហភាពអឺរ៉ុប
ចុះផ្សាយនៅថ្ងៃ៖
ស្តាប់ - ០៥:០៥
សហភាពអឺរ៉ុបបានចុះបញ្ជីផលិតផលសម្គាល់ភូមិសាស្ត្រម្រេចកំពត ជាលើកដំបូងសម្រាប់ប្រទេសកម្ពុជា នៅលើទីផ្សារសហភាពអឺរ៉ុប ដែកមានសមាជិក២៨ប្រទេស។ ដើម្បីរក្សាគុណភាពនិងកេរ្តិ៍ឈ្មោះនេះ អ្នកពាក់ព័ន្ធនានា ដូចជាសហគមកសិករ ពាណិជ្ជករឈ្មួញកណ្តាល និងរដ្ឋាភិបាល ត្រូវមានការប្រឹងប្រែងបន្ថែមទៀត ឲ្យសក្តិសមជាម្ចាស់នៃផលិតផលសម្គាល់ភូមិសាស្ត្រ ដែលមានរសជាតិឈ្ងុយ ឆួល គ្មានគូរប្រៀប។
សហភាពអ៊ឺរ៉ុបបានប្រកាសកាលពីថ្ងៃចន្ទទី២៩កុម្ភៈថ្មីៗនេះថា ក្រុមសហភាពជាង២០ប្រទេសនេះ បានសម្រេចនូវការចុះបញ្ជី«ម្រេចកំពត» ជាទំនិញសម្គាល់ភូមិសាស្ត្រ ដែលផ្តល់នូវកិច្ចការពារស្របច្បាប់នៅក្នុងសហភាពអឺរ៉ុប។ គណៈកម្មការអឺរ៉ុបបានលើកឡើងថា«ម្រេចកំពត ឬPoivre de Kampot» ត្រូវបានចុះឈ្មោះនៅក្នុងទីផ្សារសហភាពអឺរ៉ុប ជាសូចនាករភូមិសាស្ត្រ ការពារឬ (PGI) ដែលនេះជាផលិតផលដំបូងរបស់កម្ពុជា ដែលទទួលបានការទទួលស្គាល់បែបនេះ។
ជាការពិតកេរ្តិ៍ឈ្មោះរបស់ផលិតផលសំគាល់ភូមិសាស្ត្រមួយ ដែលផ្តោតសំខាន់ទៅលើគុណភាព ឬភាពត្រឹមត្រូវរបស់ផលិតផលនោះត្រូវបានផ្សារភ្ជាប់យ៉ាងជិតស្និទ្ធទៅនឹងប្រភពនៃភូមិសាស្ត្រដើមរបស់វា។ សូចនាករភូមិសាស្ត្រមានសារៈសំខាន់ខ្លាំងណាស់នៅក្នុងសហភាពអឺរ៉ុប ដែលជាកន្លែងសំបូរទៅដោយផលិតផល កសិកម្ម ឯកទេស និងផលិតផលក្នុងស្រុកដែលមានផលិតផលល្បីៗជាច្រើនទៀត ដែលបានផ្សារភ្ជាប់យ៉ាងជិតស្និទ្ធទៅនឹងកន្លែង ដែលជាប្រភពដើមរបស់ពួកគេ មានដូចជាការហ្វេកូឡុំប៊ី ស្រាសាំប៉ាញ ឬតែដាជែលលីង ជាដើម។
ងាកមកប្រទេសកម្ពុជាវិញ តាមដែលគេធ្លាប់ដឹងទំនិញសម្គាល់ភូមិសាស្ត្រខ្មែរ មានច្រើនគួរសមដែរ ដូចជាស្ករត្នោតកំពង់ស្ពឺ ម្រេចកំពត ធូរ៉េនកំពត ប្រហុកសៀមរាបជាដើម។ ក៏ប៉ុន្តែទំនិញសម្គាល់ភូមិសាស្ត្រ ដែលមានការទទួលស្គាល់ជាផ្លូវការមានតែពីរមុខទេ គឺស្ករត្នោតកំពង់ស្ពឺ និងម្រេចកំពត។ ហើយទើបតែម្រេចកំពតមួយទេ ដែលទទួលស្គាល់ផ្លូវការ ថែមទាំងមានការការពារពីសហភាពអឺរ៉ុប ដូចដែលបានប្រកាសនៅពេលនេះ។
ការផ្តល់តម្លៃនេះក្នុងនាមជាម្ចាស់ប្រទេស ពិតជាមានមោទនភាពពេញលេញហើយ។ ក៏ប៉ុន្តែទន្ទឹមគ្នានេះ ប្រទេសកម្ពុជាក៏ត្រូវមានករណីកិច្ចឆ្លើយតបចំពោះការលើកតម្កើងពីសហភាពអឺរ៉ុបផងដែរ។ អ្វីដែលគេអាចធ្វើបាននោះគឺទាក់ទងទៅនឹងកសិករដោយផ្ទាល់តែម្តង។ កសិករដែលមានការបង្កើតជាសហគមន៍អ្នកដាំម្រេចកំពតគប្បីយល់ថា ការប្រកាសការពារផលិតផលសម្គាល់ភូមិសាស្ត្រខ្មែរនៅលើទឹកដី ដែលមានទីផ្សារសម្រាប់មនុស្សប្រើប្រាស់ជាង៥០០លាននាក់នោះ គឺជាឱកាសមួយលើកទឹកចិត្តបន្ថែមទៀតក្នុងការផលិតនូវផលិតផលម្រេចកំពតនេះប្រកបដោយគុណភាព។
ដូច្នេះ កសិករនៅខេត្តកំពតគួរប្រឹងប្រែងផលិតម្រេច ឲ្យស្របទៅតាមការណែនាំពីផ្នែកពាក់ព័ន្ធ ចៀសវាងការក្លែងបន្លំ ដោយយកម្រេចដែលដាំដុះពីខាងក្រៅ ឬម្រេចនាំមកពីប្រទេសវៀតណាម ដែលមិនមានគុណភាពមកលាយឡំគ្នា ដើម្បីបង្កើនបរិមាណ មិនបានគិតពីទស្សនៈវិស័យយូរអង្វែងនៃផលចំណេញ។
ប្រតិបត្តិករ ដែលទ្រទ្រង់ដល់ការដាំដុះម្រេចកំពត និងនាំផលិតផលម្រេចនេះចេញទៅលក់នៅទីផ្សារសហភាពអឺរ៉ុប ក៏មានតួនាទីមួយចំនួនដែរ ក្នុងការជម្រុញឲ្យមានការដាំដុះប្រកប ដោយបច្ចេកទេស ត្រឹមត្រូវ កំណត់ដោយបទដ្ឋានគុណភាពមួយដែលអាចទទួលយកបាន។
ដោយឡែកផ្នែករដ្ឋាភិបាលជាពិសេសក្រសួងពាណិជ្ជកម្ម និងក្រសួងកសិកម្ម ក៏មានចំណែកសំខាន់ដែរ ក្នុងការចូលរួម អប់រំ ណែនាំ និងផ្តល់បច្ចេកទេសក្នុងការដាំដុះ ជម្រុញទីផ្សារ សម្រាប់កសិករ ខ្មែរនៅខេត្តកំពត។ រដ្ឋក៏មានភារកិច្ចផងដែរក្នុងការលុបបំបាត់ការក្លែងបន្លំម្រេចកំពតទាំងនៅក្នុងនិងក្រៅប្រទេសដើម្បីរក្សាកេរ្តិ៍ឈ្មោះ ដែលទទួលបានដោយកំរនេះ។
ជាការពិត ក្រសួងពាណិជ្ជកម្ម ក្រោមកំណែទម្រង់នាអាណត្តិទី៥នេះ អាចចាត់ទុកថាជាការកំរើកឡើងវិញនូវសសៃសសូង ដែលស្ពឹកស្រពន់នាពេលកន្លងមក។ ក៏ប៉ុន្តែគេនៅចាំបានថានៅពេលដែលប្រទេសកម្ពុជាត្រូវបានបញ្ចូលទៅក្នុងបញ្ជីសមាជិកពាណិជ្ជកម្មពិភពលោក (OMC)កាលពីឆ្នាំ២០០៤ កាលណោះ រដ្ឋនៅមិនទាន់បានរៀបចំឲ្យកសិករខ្មែរត្រៀមលក្ខណៈ ឲ្យបានត្រឹមត្រូវនៅឡើយ។ ហើយមួយទៀតកាលពីឆ្នាំ២០១០កន្លងទៅ ប្រទេសចិនបានអនុគ្រោះដល់កម្ពុជាដោយផ្តល់ដល់ប្រទេសកំពុងអភិវឌ្ឍន៍នេះ នាំចូលទៅចិននូវមុខទំនិញជាង៤០០មុខ ក៏ប៉ុន្តែកម្ពុជា មិនមានលទ្ធភាពនោះទេ ដែលនេះត្រូវគេអត្ថាធិប្បាយថាជាឱកាសមួយ ដែលមានចន្លោះប្រហោងគួរឲ្យសោកស្តាយ។
ដូច្នេះភាពអនុគ្រោះខាងពាណិជ្ជកម្ម ដូចជាការលើកកំពស់ផលិតផលខ្មែរពីសហភាពអ៊ឺរ៉ុបលើ គុណភាពទំនិញសម្គាល់ភូមិសាស្ត្រម្រេចកំពតនាពេលនេះ គួរតែមានការចាប់យកដោយត្រេកអរផងនិងដោយប្រយ័ត្នប្រយែងផង ព្រមទាំងមានការធានាអះអាងដ៏ធំពីសំណាក់រដ្ឋាភិបាលដែរ ដើម្បីជាទំនុកចិត្តនៅក្នុងឱកាសនៃការច្បាមយក កេរ្តិ៍ឈ្មោះនេះ។ ម្យ៉ាងទៀត គេអាចចាត់ទុកថានេះគឺជាជោគជ័យមួយ របស់ប្រទេសកម្ពុជា តាមរយៈនេះនឹងអាចជួយផ្លាស់ប្តូរដល់ផលិតផលកម្ពុជា ដែលមានគុណភាពខ្ពស់ផ្សេងៗទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ