តើជាទំនួលខុសត្រូវរបស់រដ្ឋាភិបាលឬក៏និស្សិត ជុំវិញបញ្ហាទីផ្សារការងារនៅកម្ពុជា?
ចុះផ្សាយនៅថ្ងៃ៖
ស្តាប់ - ០៣:១៦
កង្វះទីផ្សារការងារសម្រាប់និសិ្សត ដែលទើបតែបញ្ចប់ការសិក្សានៅកម្ពុជាមិនមែនជារឿងថ្មីនោះទេ។ មិនមែនជារឿងថ្មី ព្រោះថាមាននិស្សិតកម្ពុជាមិនតិចនោះទេ ដែលគ្មានលទ្ធភាពនឹងរកការងារធ្វើនៅពេល ដែលខ្លួនបញ្ចប់ថ្នាក់បរិញ្ញាបត្រ។ និស្សិតមួយចំនួនត្អូញត្អែរថា ទីផ្សារការងារនៅកម្ពុជាតូចចង្អៀត ម្លោះហើយទើបពួកគេត្រូវប្រឈមមុខ និងការអត់ការងារធ្វើ។ ប៉ុន្តែផ្ទុយទៅវិញ ខាងក្រុមនិយោជក ដែលជាម្ចាស់ក្រុមហ៊ុន និងស្ថាប័ននានា បែរជាចេញមករអ៊ូរទាំដែរថា ខ្លួនពិបាកស្វែងរក និងជ្រើសរើសបុគ្គលិក ដែលមានគុណសម្បត្តិគ្រប់គ្រាន់មកធ្វើការទៅវិញ។ តើអ្វីទៅជាបញ្ហាពិតប្រាកដនៅក្នុងរឿងនេះ?
កន្លងមកវិទ្យុបារាំងធ្លាប់បានវិភាគជូនលោកអ្នកស្តាប់ម្តងរួចមកហើយពីគម្លាតការងាររវាងនិយោជិត ដែលជាសិស្សនិស្សិតកម្ពុជា និងនិយោជក ដែលជាម្ចាស់ក្រុមហ៊ុន និងសហគ្រាសនានា។ បញ្ហានៅត្រង់ថា និស្សិតមួយចំនួនត្អូញត្អែរថាគ្មានការងារធ្វើគ្រប់គ្រាន់។ រីឯម្ចាស់ក្រុមហ៊ុននិងថៅកែវិញរអ៊ូថាពិបាករកបុគ្គលិក ដែលមានសមត្ថិភាពធ្វើការងារឲ្យខ្លួនទៅវិញ។
លោករដ្ឋមន្ត្រីក្រសួងអប់រំ ហង់ ជួនណារ៉ុន បានទទួលស្គាល់ការគុណភាពនៃការអប់រំនៅកម្ពុជាពិតជានៅមានកម្រិត អញ្ចឹងហើយទើបបច្ចុប្បន្ននេះ លោកខិតខំធ្វើកំណែទម្រង់យ៉ាងណា ឲ្យគុណភាពអប់រំនៅកម្ពុជារឹងមាំឡើងវិញ។ ប៉ុន្តែទន្ទឹមនឹងកំណែទម្រង់របស់ក្រសួង លោករដ្ឋមន្ត្រីក៏បានរំលឹកទៅដល់និស្សិតគ្រប់រូបផងដែរថា ការសិក្សាគ្មានអ្នកណា អាចរៀនជំនួសបានឡើយ អញ្ចឹងមានតែត្រូវខិតខំប្រឹងប្រែងរៀនសូត្រដោយខ្លួនឯងទើបទទួលបានចំណេះដឹងពិតប្រាកដ។
ភាពធូររលុង និងគ្មានច្បាប់ទម្លាប់នៅតាមមហាវិទ្យាល័យមួយចំនួន បានជួយទាញទម្លាក់គុណភាពសិក្សារបស់សិស្សនិស្សិតខ្មែរ ខណៈដែលនិស្សិតខ្លួនឯងផ្ទាល់ក៏បណ្តែតបណ្តោយការសិក្សារបស់ខ្លួនទៅតាមនោះដែរ។ មាននិស្សិតជាច្រើនដែលបញ្ចប់ថ្នាក់បរិញ្ញាបត្រហើយមិនចេះទាំងភាសាអង់គ្លេស និងកុំព្យូទ័រ។ នេះនិយាយតែពីជំនាញរឹងតែប៉ុណ្ណោះ។ ដោយឡែកជំនាញទន់ ដែលមានដូចជាផ្នែកទំនាក់ទំនង ការធ្វើការជាក្រុម ការរៀនអភិវឌ្ឍបុគ្គលលក្ខណៈដោយខ្លួនឯងជាដើមនោះ ក៏និស្សិតខ្មែរនៅខ្វះខាតដែរ។
«ចេះប្រាកដ ប្រាក់រត់តាមហៅ» រាល់អ្វីដែលបានលើកឡើងពីខាងលើ មិនមែនមានន័យថា និស្សិតកម្ពុជាសុទ្ធតែគ្មានសមត្ថិភាពធ្វើការឲ្យគេទាំងអស់នោះទេ។ មាននិស្សិតមិនតិចនោះទេ ដែលមានគេត្រូវការ ហើយក៏ត្រូវបានអញ្ជើញទៅ ធ្វើការ ជាមួយនឹងប្រាក់ខែខ្ពស់ថែមទៀតផង។ បុគ្គលិកដែលមានចំណេះដឹងពិតប្រាកដ ហើយប្រើប្រាស់ជំនាញរបស់ខ្លួនបានត្រឹមត្រូវទៀតនោះ មិនដែលរអ៊ូថា គ្មានការងារធ្វើនោះទេ គឺមានតែគ្មានពេលបែងចែកពេលវេលា ធ្វើការឲ្យគេទៅវិញនោះទេ។
មានយុវជនខ្មែរមួយចំនួន រហូតមានឱកាសជ្រើសរើសកន្លែងណាដែលខ្លួនចង់ធ្វើការ ហើយរើសទាំងថ្នាក់ដឹកនាំ ដែលខ្លួនចង់រៀនសូត្រតាម និងគោរពស្រលាញ់ថែមទៀតផង។ ប៉ុន្តែដើម្បីអាចចាប់យកឱកាសទាំងអស់នេះបាន យុវជនខ្លួនឯងត្រូវប្រាកដថាខ្លួនពិតជាមានសមត្ថិភាព និងទទួលយកការងារអស់ទាំងអស់នោះ ហើយនិងចេះសម្របខ្លួនបានគ្រប់កាលៈទេសៈ និងបរិយាកាសការងារ ហើយអាចនឹងចុះសម្រុងជាមួយនឹងក្រុមការងារ និងចេះបត់បែនធ្វើការងារជាមួយមនុស្សគ្រប់ជំពូក។
«ចេះមកពីរៀន មានមកពីរក» យុវជនខ្មែរគួរតែសិក្សាស្វែងយល់ឲ្យបានច្បាស់ពីទីផ្សារការងារនៅកម្ពុជា ហើយត្រូវខិតខំសិក្សារៀនសូត្រ និងអភិវឌ្ឍន៍ខ្លួនឲ្យបានល្អ ដោយផ្តើមចេញពីការទំនាក់ទំនង និងរៀនបង្កើតបណ្តាញល្អៗ នៅក្នុងសង្គម។ ត្រូវស្វែងយល់ពីព័ត៌មាន និងហេតុការណ៍នានា ដែលកើតមានឡើងនៅក្នុងសង្គម ទើបជួយធ្វើឲ្យការសម្រេចចិត្តរបស់ខ្លួនត្រឹមត្រូវ។
ជាពិសេសនោះមិនត្រូវរំលងចោលភាសាអង់គ្លេស និងចំណេះដឹងប្រើប្រាស់កុំព្យូរទ័រ និងអ៊ីនធឺណិត ដែលជាចំណេះដឹងយ៉ាងចំបាច់បំផុតសម្រាប់ការងារនៅពេលបច្ចុប្បន្ននេះ។ ហើយចំណេះដឹងអស់ទាំងនេះ ក៏ជាមធ្យោបាយនាំយុវជនខ្មែរ ទៅរកកន្លែងការងារមួយដែលល្អ ហើយទទួលបានប្រាក់កម្រៃខ្ពស់ផងដែរ។ កន្លងមករដ្ឋមន្ត្រីក្រសួងសាធារណៈការ និងដឹកជញ្ជូនថ្មី លោក ស៊ុន ចាន់ថុល ក៏ធ្លាប់បានក្រើនរំលឹកឲ្យនិស្សិតខ្មែរខិតខំសិក្សាភាសាអង់គ្លេសឲ្យបានគ្រប់គ្នាផងដែរ ដើម្បីពង្រីកចំណេះដឹង និងក្លាយជាផ្នែកមួយនៃការជួយអភិវឌ្ឍន៍សង្គមខ្មែរផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ