ពលរដ្ឋខ្មែរមានអត្រាមហារីកថ្លើមខ្ពស់ បណ្តាលមកពីការទទួលទានគ្រឿងស្រវឹងច្រើនឬ?
ចុះផ្សាយនៅថ្ងៃ៖
ស្តាប់ - ០៥:០០
ការបង្ហាញពីកម្ពុជាមានអត្រាជំងឺថ្លើម និងមហារីកថ្លើមខ្ពស់ជាងប្រទេសនានានៅក្នុងតំបន់អាស៊ី ភាគអាគ្នេយ៍ របស់អង្គការសុខភាពពិភពលោក ត្រូវបានគេមើលឃើញថាជាប់ទាក់ទងទៅនឹងឥរិយាបទនៃការទទួលទានគ្រឿងស្រវឹង។ ការទទួលទានគ្រឿងស្រវឹងរបស់ពលរដ្ឋខ្មែរ មានចរិកលើសពីអ្វីដែលជាការសប្បាយ និងមិនសូវជាមានការគិតគូរពីការប្រឈមចំពោះ សុខភាពរបស់ខ្លួនទៅអនាគត។
ផ្តើមចេញពីអង្គសិក្ខាសាលាមួយរយៈពេល ៣ថ្ងៃ នៅមន្ទីរពេទ្យកាល់ម៉ែត្រ ចាប់ពីថ្ងៃទី ៦ដល់ថ្ងៃទី ៨ខែកុម្ភៈឆ្នាំ ២០១៧ ស្តីពីបច្ចេកទេស Endoscopies ក្នុងការធ្វើរោគវិនិច្ឆ័យ និងព្យាបាលជំងឺមហារីក ប្រព័ន្ធរំលាយអាហារ និងថ្លើម ហើយមានការកត់សម្គាល់ថាអត្រាប្រជាជនកម្ពុជាបានកើត និងស្លាប់ ដោយសារជំងឺមហារីកថ្លើមខ្ពស់ជាងគេនៅតំបន់អាស៊ីអាគ្នេយ៍នោះ ធ្វើឲ្យមានការគិតថាបច្ច័យអាក្រក់ដែលធ្វើឲ្យកើតជំងឺទាំងនេះ កំពុងញ៉ាំញីសង្គមខ្មែរខ្លាំងក្លានៅឡើយ។
នោះគឺការទទួលទានចំណីអាហារមិនមានអនាម័យ និងភេសជ្ជៈ មានសុរានិងស្រាបៀរ ដែលជាគ្រឿងស្រវឹងដ៏ពេញនិយម។ ការបង្ហាញរបស់អង្គការសុខភាពពិភពលោក ដែលថា ជំងឺមហារីកថ្លើមកើតមានខ្ពស់ចំពោះប្រជាជនកម្ពុជា ក្នុងចំណោមប្រជាជាតិ នៅក្នុងតំបន់ ត្រូវបានក្រុមវេជ្ជបណ្ឌិតនានា គិតថាប្រជាជនខ្មែរ ទទួលទានស្រាច្រើនក្នុងមួយថ្ងៃៗ និងមានឥរិយាបទ ខុសប្លែកពីជាតិសាសន៍ដទៃ។
ជាការកត់សម្គាល់ ជនជាតិខ្មែរមួយចំនួន ទទួលទានស្រា ឬស្រាបៀរ ប្រៀបបានការធ្វើអត្តឃាតខ្លួនឯងដូច្នោះដែរ។ ចំណុចនេះត្រូវបានគេឃើញនៅក្នុងកម្មវិធីសប្បាយៗនានា ឬក៏ពិធីបុណ្យធំៗ គឺនៅពេលដែលមានការលើកកែវ ហាក់ដូចជាលើកសម្លាប់គ្នា ពោលគឺលើកឲ្យដាច់ ឲ្យអស់ពីកែវ ដើម្បីអួតគ្នា រកអ្នកខ្លាំង រកអ្នកខ្សោយ ហើយទីបំផុតបង្កើតបរិយាកាសហ៊ោកញ្ជ្រៀវឡើង ប្រកបដោយក្តីរីករាយ ទាំងមុខស្ពឹក ភ្នែកបើកមិនចង់រួច។
វាជាប្រពៃណីទៅហើយនៅពេល ដែលមានការជួបជុំញាតិមិត្ត តាមរយៈពិធីនីមួយៗដែលមានការទទួលគ្រឿងស្រវឹង ប្រពៃណីបែបនេះ ត្រូវគេមើលឃើញថាជាកំហុសឆ្គងជុំវិញបញ្ហាសុខភាពសាធារណៈ។ ទិដ្ឋភាពដូច្នេះ ខុសប្លែកពីពលរដ្ឋនៅប្រទេសដទៃ ដែលការទទួលទានគ្រឿងស្រវឹងរបស់គេ បង្ហាញពីការសប្បាយពិតៗ ដោយមិនទទួលទានច្រើនហួសហេតុពេក ឬក៏មិនទទួលទានដែលនឹងអាចបង្កគ្រោះថ្នាក់ដល់ខ្លួន។
មួយវិញទៀត នៅប្រទេសមួយចំនួនលើពិភពលោក ការផ្សាយពាណិជ្ជកម្មគ្រឿងស្រវឹង គឺមិនមានតែម្តង។ ប្រទេសមួយចំនួនទៀត ការផ្សាយពាណិជ្ជកម្មគឺគ្រាន់តែបង្ហាញត្រឹមម៉ាកស្រារបស់គេប៉ុណ្ណោះ។ ផ្ទុយទៅវិញនៅប្រទេសកម្ពុជា ការផ្សាយពាណិជ្ជកម្មគ្រឿងស្រវឹង គឺធ្វើឡើងតាមបែបជម្រុញ ជាហេតុធ្វើឲ្យអាកប្បកិរិយា ឬ ឥរិយាបទនៃការក្រេបគ្រឿងស្រវឹងក៏ប្រែប្រួលទៅតាមបរិបទនៃការផ្សាយដូច្នេះដែរ។ ជាឧទាហរណ៍ ការទិញគ្រឿងស្រវឹងច្រើនកេស នឹងត្រូវថែមប៉ុន្មានកេស ហើយនឹងមានត្រូវរង្វាន់ទៀតផង ដែលការធ្វើដូចនេះ គឺជាការអូសទាញ និងជម្រុញឲ្យមានការទទួលទានកាន់តែច្រើន។
ទោះយ៉ាងណាគេមិនអាចបន្ទោសទៅលើក្រុមហ៊ុនអាជីវកម្មលើគ្រឿងស្រវឹងបានទេលើករណីនេះ គឺវាអាស្រ័យទៅលើការគិតរបស់អ្នកទទួលទានផ្ទាល់ ខណៈដែលមានការបើកដៃឲ្យក្រុមហ៊ុនស្រាបៀរផ្សាយពាណិជ្ជកម្មដោយចំហរ ក្នុងចំណោមពលរដ្ឋខ្មែរដែលចំណេះដឹងរបស់ពួកគាត់នៅមានកំរិតនៅឡើយ។
ទាក់ទងទៅនឹងការទទួលទានគ្រឿងស្រវឹងនេះដែរ កន្លងមកអង្គការចលនាសុខភាពកម្ពុជា បានរកឃើញថាមានផលប៉ះពាល់លើកត្តា ៤យ៉ាងធំៗ។ ទី១. គ្រឿងស្រវឹងបណ្តាលឲ្យកើតមានជំងឺជាង ២០០មុខ។ ទី២.គឺធ្វើឲ្យខាតបង់ដល់ថវិកាគ្រួសារ ដែលកម្ពុជានៅមិនទាន់មានការស្រាវជ្រាវឲ្យប្រាកដប្រជានៅឡើយថាមានថវិកាសរុបប៉ុន្មាន ដែលត្រូវបាត់បង់ទៅលើ គ្រឿងស្រវឹង។ ទី៣. គឺអំពើហិង្សាក្នុងគ្រួសារ ដែលអំពើហិង្សានេះ កើតឡើងកាន់តែញឹកញាប់ ហើយកាន់តែមានសភាពធ្ងន់ធ្ងរទៅៗ។ ចំណុចទី ៤ចុងក្រោយ គឺការបាត់បង់ជីវិតប្រមាណជា ៣០០នាក់ ក្នុងមួយឆ្នាំគឺជាគ្រោះថ្នាក់ចរាចរណ៍ដោយសេពគ្រឿងស្រវឹង និងធ្វើឲ្យខាតបង់ថវិកាប្រមាណជា ៤០លានដុល្លារ។
ជាសរុបមក ការលើកឡើងរបស់អង្គការសុខភាពពិភពលោក ដែលថាពលរដ្ឋកម្ពុជា មានអត្រាកើតជំងឺមហារីកថ្លើមខ្ពស់ជាងគេ នៅក្នុងតំបន់អាស៊ី គឺវាស៊ីគ្នាទៅនឹងទឡ្ហីករណ៍របស់ក្រុមគ្រូពេទ្យ និងអ្នកជំនាញនានា ដែលថាបញ្ហានេះ វាជាប់ទាក់ទងយ៉ាងច្បាស់ទៅនឹងការទទួលទានគ្រឿងស្រវឹងមួយទំហឹងរបស់ពលរដ្ឋខ្មែរ។
ដូច្នេះ ការទទួលទានគ្រឿងស្រវឹង គឺជាតម្រូវការខានមិនបានរបស់ពលរដ្ឋលើពិភពលោក ក៏ប៉ុន្តែតម្រូវការគ្រឿងស្រវឹង គួរតែធ្វើឡើងនៅក្នុងរូបភាពមួយច្បាស់លាស់ មិនច្រើនហួសហេតុពេក ពោលគឺមិនធ្វើឲ្យប៉ះពាល់ដល់សុខភាព។ ជាការពិតការក្រេបគ្រឿងស្រវឹង គឺជានិមិត្តរូបនៃការសប្បាយ ការរាប់អានគ្នា តែគេគួរគិតពីបញ្ហាប្រឈម ដែលនឹងអាចកើតមានឡើងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ