ម្ចាស់ធនាគារ និងគ្រឹះស្ថានមីក្រូហិរញ្ញវត្ថុ អះអាងពីសុវត្ថិភាពម៉ាស៊ីនដកប្រាក់ ក្រោយ សាលាក្រុង ចង់ឲ្យពង្រឹងសុវត្ថិភាពបន្ថែមទៀត
២៤ម៉ោង ក្រោយសារព័ត៌មានក្នុងស្រុកមួយចំនួន ផ្សព្វផ្សាយពី គំនិតផ្តួចផ្តើម លុបបំបាត់ម៉ាស៊ីនដកប្រាក់ (ATM) នៅតាមទីសាធារណៈក្នុងភូមិសាស្រ្តរាជធានីភ្នំពេញ សង្រ្គាមប៉ាកកា រួមនឹងប្រតិកម្មតាមបណ្តាញសង្គមជាច្រើននៅតែបន្តកើតមាន បើទោះបីជា សាលាក្រុងបានបដិសេធន៍ចំពោះព័ត៌មាននេះក៏ដោយ។ មន្រ្តីសាលាក្រុងចង់ឲ្យម្ចាស់ធនាគារ ដែលដាក់តាំងទូ ATM គួរពង្រឹងសុវត្ថិភាព និងទទួលខុសត្រូវច្រើនជាងមុន។ តែម្ចាស់ធនាគារ និងគ្រឹះស្ថានមីក្រូហិរញ្ញវត្ថុអះអាងថា ATM របស់ពួកគេ ទោះបីបញ្ឈរនៅលើទីតំាងឯកជន និងសាធារណក្តី សុទ្ធតែមានប្រព័ន្ធសុវត្ថិភាពរឹងមាំស្រាប់ហើយ។
ចុះផ្សាយនៅថ្ងៃ៖
ស្តាប់ - ០៣:២៧
បណ្តាញសារព័ត៌មានក្នុងស្រុកមួយចំនួន មានជាអាទិ៍ Fresh News, កោះសន្តិភាព ជាដើម បានរាយការណ៍ថា ក្នុងកិច្ចប្រជុំគណៈបញ្ជាការឯកភាព រាជធានីភ្នំពេញ កាលពីថ្ងៃទី២០ មីនា អភិបាលរាជធានីភ្នំពេញ លោក ប៉ា សុជាតិវង្ស បានថ្លែងថា ម៉ាស៊ីនដកប្រាក់ (ATM) គួរតែលុបបំបាត់ មិនឲ្យដាក់នៅតាមទីសាធារណៈនោះទេ បើមិនមានអ្នកការពារ អ្នកមើលថែ បង្កឲ្យមានបទល្មើស។ កាសែត បានភ្ជាប់បំណងលុបបំបាត់ ម៉ាស៊ីនដកប្រាក់ របស់ លោក អភិបាលរាជធានីភ្នំពេញ ទៅនឹង ហេតុការណ៍បំផ្ទុះ ទូរម៉ាស៊ីនដកប្រាក់ ATM មួយ នៅក្នុងខណ្ឌទួលគោក រាជធានីភ្នំពេញ កាលពីយប់ថ្ងៃទី ១៨ ខែមីនា ឆ្នាំ២០១៧ ដែលបង្កឲ្យមានភាពភ្ញាក់ផ្អើល។
ក្រោយមានប្រតិកម្មជាច្រើនពីពលរដ្ឋ និងអ្នកប្រើប្រាស់បណ្តាញសង្គមហ្វេសប៊ុក អភិបាលរងរាជធានីភ្នំពេញ លោក មាន ចាន់យ៉ាដា បានបញ្ជាក់ប្រាប់វិទ្យុបារាំង នៅថ្ងៃពុធនេះថា គ្មានការលុបបំបាត់ ម៉ាស៊ីនដកប្រាក់ ក្នុងរាជធានីភ្នំពេញ ដូចការផ្សព្វផ្សាយខុស របស់សារព័ត៌មានក្នុងស្រុកមួយចំនួននោះទេ។ លោកអភិបាលរង បន្ថែមថា សាលារាជធានីភ្នំពេញ គ្រាន់តែស្នើសុំឲ្យ ម្ចាស់ធនាគារ ដែលដាក់តាំងទូ ATM នៅតាមទីសាធារណៈ គួរមានទំនួលខុសត្រូវ និងគិតគូរពីបញ្ហាសន្តិសុខរបស់អ្នកទៅដកប្រាក់ កុំដាក់ចោលគ្មានអ្នកការពារ នាំឲ្យមានហានិភ័យ។ បើតាម លោក មាន ចាន់យ៉ាដា ដើម្បីរក្សាសុវត្ថិភាពទូរម៉ាស៊ីនដកប្រាក់ សាលាក្រុង រួមទាំង ម្ចាស់ធនាគារ នឹងចុះទៅពិនិត្យមើលដោយផ្ទាល់នៅលើទីតាំងស្នើសុំដាក់តាំងទូរម៉ាស៊ីនដកប្រាក់ ដើម្បីពង្រឹងសុវត្ថិភាពម៉ាស៊ីនដកប្រាក់។
លោក ហួត អេងតុង ប្រធានសមាគមគ្រឹះស្ថានមីក្រូហិរញ្ញវត្ថុកម្ពុជា ដែលមាន សមាជិកសរុប ៨៣ គ្រឹះស្ថានឯកជន បញ្ជាក់ថា ម៉ាស៊ីន ATM បានជួយច្រើនដល់ការអភិវឌ្ឍវិស័យហិរញ្ញវត្ថុនៅកម្ពុជា ពិសេសផ្តល់ភាពងាយស្រួលច្រើនដល់ពលរដ្ឋ ដើម្បីដកប្រាក់ របស់ពលរដ្ឋ ដែលបានផ្ញើនៅ គ្រឹះស្ថានមីក្រូហិរញ្ញវត្ថុ និងជាការលើកទឹកចិត្តឲ្យពលរដ្ឋប្រើប្រាស់សេវាហិរញ្ញវត្ថុ។ លោក ហួត អេងតុង យល់ថា ហេតុការណ៍បំផ្ទុះ ទូរម៉ាស៊ីនដកប្រាក់ ATM កន្លងមក គ្រាន់តែជា រឿងចៃដន្យប៉ុណ្ណោះ ហើយមិនអាចយកប្រាក់ចេញពី ម៉ាស៊ីនបានឡើយ ពោលគឺ គ្រាន់តែខូចខាតគ្រឿងបន្លាស់អេឡិចត្រូនិចខាងក្រៅប៉ុណ្ណោះពីព្រោះ ក្នុងម៉ាស៊ីនដកប្រាក់ មាន ទូរដែកមួយយ៉ាងរឹងមាំដើម្បីការពារប្រាក់អថិជន។
លោក អ៊ិន ចាន់នី ប្រធាននាយកប្រតិបត្តិ នៃធនាគារ អេស៊ីលីដា ដែលមានការិយាល័យចំនួន ២៣៦ ទូទាំងប្រទេស បញ្ជាក់ថា គ្រប់ ម៉ាស៊ីនដកប្រាក់ចល័ត Automated Teller Machine (ATM) របស់ ធនាគារអេស៊ីលីដា គឺដាក់បញ្ឈរនៅលើទីតាំងឯកជន ហើយមានប្រព័ន្ធការពារសុវត្ថិភាពគ្រប់គ្រាន់។ មានសុវត្ថិភាពពីព្រោះ គ្រប់ម៉ាស៊ីន ATM ទាំងអស់ សុទ្ធតែមានកាម៉េរ៉ាថតសកម្មភាព ព្រមទាំងមានប្រព័ន្ធចាប់រូបភាព ដែលអាចឃ្លាំមើលពីទីស្នាក់ការកណ្តាល ២៤ម៉ោងផងដែរ។ យ៉ាងណាក៏ដោយ លោក អ៊ិន ចាន់នី បន្ថែមថា កងកម្លាំងសមត្ថកិច្ចសាធារណ គួរតែជួយការពារបន្ថែមទៅនឹងវិធានការការពាររបស់គ្រឹះស្ថានឯកជន ដែលបានបំពេញកាតព្វកិច្ចបង់ពន្ធរួចរាល់។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជា ថ្លែងសាទរចំពោះការផ្តួចផ្តើមជជែករកដំណោះស្រាយរួមមួយដើម្បីផ្តល់សុវត្ថិភាពបន្ថែមទៀតដល់ ម៉ាស៊ីនដកប្រាក់ រវាងសាលាក្រុង និងម្ចាស់ធនាគារ គ្រឹះស្ថានហិរញ្ញវត្ថុ ប៉ុន្តែសមត្ថកិច្ចសាធារណៈក៏គួរតែពង្រឹងគុណភាពសេវាសាធារណបន្ថែមទៀតដូចគ្នាដែរ។ លោក ផ្តល់យោបល់ថា ដើម្បីរួមចំណែកដល់ការការពារសុវត្ថិភាព ទូរATM និងអ្នកដកប្រាក់ សាលាក្រុង គួរតែពង្រីកការដាក់ភ្លើងបំភ្លឺនៅតាមទីសាធារណឲ្យបានច្រើនជាងមុន បន្តដាក់ពង្រាយសមត្ថកិច្ចដើរល្បាតទីក្រុង ឲ្យបានញឹកញាប់ និងអនុវត្តវិធានការត្រួតពិនិត្យអាវុធជាតិផ្ទុះនៅពេលយប់ គួរធ្វើឲ្យបានសកម្មជាងមុន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ