ក្រសួងព័ត៌មាន៖ គ្រប់ទូរទស្សន៍ទាំងអស់មិនអាចផ្សាយរឿងបរទេសនៅម៉ោងមាស
រដ្ឋមន្ត្រីក្រសួងព័ត៌មាន លោក ខៀវ កាញារិទ្ធ បានថ្លែងប្រាប់អ្នកកាសែតថា គ្រប់ស្ថានីយទូរទស្សន៍ក្នុងស្រុកទាំងអស់ នឹងមិនអាចចាក់ផ្សាយភាពយន្ត ឬវណ្ណកម្មបរទេសនៅម៉ោង ៧យប់ ដល់៩យប់ទេ ដោយអនុវត្តចាប់ពីថ្ងៃទី១ វិច្ឆិកា តទៅ។ ការបញ្ឈប់មិនឲ្យមានការចាក់ផ្សាយវណ្ណកម្មបរទេសនៅចន្លោះម៉ោង៧យប់ ដល់៩យប់ គឺដើម្បីចូលរួមលើកស្ទួយវណ្ណកម្មខ្មែរឡើងវិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៧
“យើងខ្ញុំបានរៀបចំជាលិខិតមួយ ដោយសារតែមានការរអ៊ូរទាំ ឬក៏ការរិះគន់ច្រើន ដែលមានទូរទស្សន៍ច្រើនណាស់ដែលចាក់តែកុនបរទេសហួសហេតុពេក។ តែឥឡូវនេះ យើងបានសម្រេច និងសុំឲ្យទូរទស្សន៍ទាំងអស់ គឺពីម៉ោង៧(យប់) ដល់ម៉ោង៩(យប់) គឺឲ្យផ្សាយតែផលិតកម្ម ដែលផលិតក្នុងស្រុក ដើម្បីលើកតម្កើងការងាររបស់យើងផង ក៏ដូចជាលើកតម្កើងមោទនភាពជាតិយើងខ្លះផង។” នេះគឺជាការថ្លែងបញ្ជាក់របស់លោក ខៀវ កាញារិទ្ធ រដ្ឋមន្ត្រីក្រសួងព័ត៌មាន ក្រោយពីកិច្ចប្រជុំសម្រេចបង្កើតគណៈកម្មការ ការងារសោតទស្សន៍ នៅថ្ងៃទី២៥ កញ្ញានេះ នៅក្រសួងព័ត៌មាន។ ការអនុវត្តសេចក្តីសម្រេចនេះ នឹងចាប់ផ្តើមពីថ្ងៃទី១ ខែវិច្ឆកា ឆ្នាំ២០១៥នេះតទៅ។ តែបើស្ថានីយ៍ណាមួយមិនអនុវត្តនោះ ក្រសួងនឹងដកហូតអាជ្ញាប័ណ្ណ។
លោក ឆាយ បូរ៉ា ជាប្រធានសមាគមភាពយន្តកម្ពុជា និងជាផលិតករមួយរូបផងនោះ បានបញ្ជាក់ប្រាប់វិទ្យុបារាំងថា លោកមានការត្រេកអរនឹងការសម្រេចរបស់ក្រសួង ដែលគោរពគោលជំហររបស់ផលិតករ និងសិល្បៈករក្នុងសុ្រក ហើយនេះក៏ជាចំណុចចាប់ផ្តើមមួយរបស់ផលិតករ និងសិល្បៈករក្នុងស្រុកទាំងអស់ផងដែរ។ យ៉ាងណាមិញ កន្លងមកលោកក៏ធ្លាប់បានស្នើទៅកាន់ក្រសួងពាក់ព័ន្ធនានា ហើយកាលពីពេលថ្មីនេះទៀតសមាគមរបស់លោកក៏បានដាក់លិខិតទៅកាន់រដ្ឋាភិបាល ដើម្បីឲ្យដោះស្រាយបញ្ហានេះ។
ផលិតកររូបនេះ បន្ថែមថា បើទោះបីជាមានវិធានការបែបនេះក្តី ប៉ុន្តែផលិតករ និងសិល្បៈករខ្លួនឯងផ្ទាល់ត្រូវតែចូលរួមពង្រឹកគុណភាពវណ្ណកម្មភាពយន្ត និងទេព្យកោសល្យ ដើម្បីឆ្លើយតបនឹងគុណភាព ដែលប្រជាពលរដ្ឋខ្មែរត្រូវការ។ ខ្សែភាពយន្តភាគបរទេសកន្លងមកមិនមានគុណភាពខ្ពស់ រហូតដល់ធ្វើឲ្យផលិតករខ្មែរផលិតមិនបាននោះទេ ពោលគឺយើងអាចធ្វើបាន។ លោកនឹងក្រុមផលិតករ រួមទាំងសិល្បៈករផងនោះ នឹងធ្វើការថ្លែងអំណរគុណមួយចំពោះរដ្ឋាភិបាល និងក្រសួងពាក់ព័ន្ធ។
ចំណែក អគ្គនាយករងនៃស្ថានីយទូរទស្សន៍ថ្មី PNN លោក សោម ឆាយ៉ា បានបញ្ជាក់ថា ជាការពិតទូរទស្សន៍ PNNត្រូវតែអនុវត្តន៍នូវសេចក្តីសម្រេចរបស់ក្រសួង ទោះចង់ ឬមិនចង់។ តែលោកចង់ឲ្យក្រសួងពិចារណា បើក្រសួងចាប់ផ្តើមអនុវត្តហាមមិនឲ្យភាពយន្តភាគបរទេសផ្សាយរយៈពេល២ម៉ោង នោះគ្រប់ស្ថានីយទូរទស្សន៍ ដែលចាក់ផ្សាយភាពយន្តបរទេសអាចនឹងពិបាករកចំណូល។ លោក សោម ឆាយ៉ា ចង់ឲ្យក្រសួងព័ត៌មានអនុវត្តលើកទី១ ក្នុងរយៈពេលតែ១ម៉ោង ពោលគឺចាប់ពីម៉ោង ៧យប់ ទៅម៉ោង៨យប់ ហើយបើទោះបីជាអនុវត្តទាំង២ម៉ោង នោះសុំឲ្យគ្រប់ស្ថានីយទូរទស្សន៍ទាំងអស់អនុវត្តសេចក្តីសម្រេចនេះដូចគ្នា។
សូមបញ្ជាក់ថាការចាក់ផ្សាយភាពយន្តបរទេសជាពិសេសរឿងភាគថៃបានធ្វើឡើងវិញ នៅចុងឆ្នាំ២០១៣ ក្រោយពីរដ្ឋាភិបាលកម្ពុជាបានសម្រេចមិនឲ្យចាក់ផ្សាយរឿងនេះ តាំងពីថ្ងៃទី ២៨ ខែមករា ឆ្នាំ២០០៣មកដោយសារតែមានអំពើហិង្សាមួយរបស់ក្រុមបាតុករខ្មែរ វាយកំទេចស្ថានទូតថៃប្រចាំកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ