ពិព័រណ៍ចល័តជាវិធីមួយសម្រាប់ផ្តល់សំណងឱ្យជនរងគ្រោះក្នុងរបបខ្មែរក្រហម
សំណងមួយប្រភេទ ក្នុងចំណោមសំណងស្របច្បាប់១១ប្រភេទ ត្រូវបានផ្តល់ឱ្យដើមបណ្ដឹងរដ្ឋប្បវេណី ក្នុងសំណុំរឿង០០២ វគ្គ០០១ នៃអង្គជំនុំជម្រះវិសាមញ្ញក្នុងតុលាការកម្ពុជា។ សំណងជាសមូហភាពនោះធ្វើឡើង ក្នុងរូបភាពជាពិព័រណ៍ចល័តស្តីពីការជម្លៀសដោយបង្ខំ បើទោះបីជាសាលក្រមស្ថាពរ ដែលកាត់ទោសឱ្យអតីតមេដឹកនាំជាន់ខ្ពស់នៃរបបខ្មែរក្រហម មិនទាន់ប្រកាសក៏ដោយ។ ការសម្ពោធពិព័រណ៍ចល័តនោះ បានប្រព្រឹត្តទៅកាលពីព្រឹកថ្ងៃសុក្រនេះ នៅទីក្រុងភ្នំពេញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
អង្គភាពគាំពារជនរងគ្រោះនៃសាលាក្តីខ្មែរក្រហម អង្គការក្តីករុណា និងអង្គការដៃគូជាច្រើនទៀត បានសម្ពោធពិព័រណ៍ចល័តស្តីពីការជម្លៀសដោយបង្ខំ ឬការស្វែងរកយុត្តិធម៌តាមរយៈការសិក្សាអំពីប្រវត្តិសាស្ត្រខ្មែរក្រហម កាលពីព្រឹកថ្ងៃសុក្រ នៅទីក្រុងភ្នំពេញ។ ពិព័រណ៍ចល័តនេះជាមធ្យោបាយមួយ ក្នុងការផ្តល់សំណងសមូហភាពមួយប្រភេទ ក្នុងចំណោមសំណងស្របច្បាប់១១ប្រភេទ ជូនជនរងគ្រោះ នៅក្នុងសំណុំរឿង០០២ វគ្គ០០១ នៃអង្គជំនុំជម្រះវិសាមញ្ញក្នុងតុលាការកម្ពុជា។
លោក ទឹម មិនា នាយកប្រតិបត្តិនៃអង្គការក្តីករុណា បានអះអាងថា នេះជា«ការឆ្លើយតបទៅនឹងបំណងប្រាថ្នារបស់ដើមបណ្ដឹងរដ្ឋប្បវេណី» ក្នុងសំណុំរឿងឧក្រិដ្ឋកម្មប្រឆាំងមនុស្សជាតិ ពាក់ព័ន្ធនឹងការផ្លាស់ទីលំនៅប្រជាជនដោយបង្ខំ និងការសម្លាប់អតីតមន្ត្រីនៃរបបសាធារណរដ្ឋខ្មែរនៅទួលពោធិ៍ជ្រៃ ក្នុងខេត្តពោធិសាត់។ ម្យ៉ាងទៀត បើយោងតាមលោក ទឹម មិនា ការតាំងពិព័រណ៍ចល័តក៏ផ្តល់ឱកាសឱ្យយុវជនជំនាន់ក្រោយ «បានដឹង និងចូលរួមទប់ស្កាត់អំពើបែបនោះកុំឱ្យកើតឡើងទៀត»។
បច្ចុប្បន្ន សាលក្រមដែលកាត់ទោសលោក ខៀវ សំផន និងលោក នួន ជា ឱ្យជាប់ពន្ធនាគារអស់មួយជីវិត កំពុងត្រូវបានក្រុមសហមេធាវីរបស់អតីតមេដឹកនាំជាន់ខ្ពស់នៃរបបកម្ពុជាប្រជាធិបតេយ្យទាំងពីររូប ធ្វើបណ្ដឹងសារទុក្ខ។ ប៉ុន្តែ លោក ពេជ អង្គ ដែលជាសហមេធាវីនាំមុខជាតិ តំណាងដើមបណ្ដឹងរដ្ឋប្បវេណី បានថ្លែងថា៖ «សំណាងដែរ ដោយសារតុលាការអនុញ្ញាតឱ្យចាប់ផ្តើមផ្តល់សំណង»។ លោកមេធាវីរូបនេះអះអាងផងដែរថា «ភាពរងគ្រោះរបស់ដើមបណ្ដឹងរដ្ឋប្បវេណីធំធេងណាស់» ហើយថាទោះបីជាសំណបែបនេះ«មិនគ្រប់គ្រាន់ក្តី» ក៏ការណ៍ដែលមានវេទិកាសម្រាប់ឱ្យជនរងគ្រោះនិយាយអំពីការឈឺចាប់របស់ខ្លួនឱ្យយុវជនបានដឹង គឺជា«ការចាំបាច់»។
ពិព័រណ៍ចល័តស្តីពីការជម្លៀសដោយបង្ខំ មានរយៈពេល៣ថ្ងៃ ហើយគ្រោងនឹងរៀបចំនៅខេត្តសៀមរាបនៅសប្ហាហ៍ក្រោយ បន្ទាប់ពីបានចាប់ផ្តើមធ្វើ តាំងពីខែតុលា នៅខេត្តកំពត និងខេត្តពោធិ៍សាត់។ ពិព័រណ៍នេះក៏គ្រោងនឹងប្តូរទៅធ្វើនៅតាមខេត្តមួយចំនួនទៀត ដូចជាព្រៃវែង ស្ទឹងត្រែង កំពង់ស្ពឺ កំពង់ឆ្នាំង ស្វាយរៀង និងកណ្ដាលដែរ ដោយមានអង្គការយុវសន្តិភាពចូលរួមរៀបចំផង មុននឹងបិទបញ្ចប់នៅខែមករា ឆ្នាំ២០១។ កម្មវិធីនៃការតាំងពិព័រណ៍នៅខេត្តនីមួយៗ មានចាប់តាំងពីការបង្ហាញផ្ទាំងព័ត៌មាន ការអានសៀវភៅ ការមើលឯកសារ ការបញ្ចាំភាពយន្ត និងការធ្វើវេទិកាជាមួយដើមបណ្ដឹងរដ្ឋប្បវេណី ដែលមានវត្តមាន នៅក្នុងពិធីសម្ពោធ នៅព្រឹកថ្ងៃសុក្រដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ