ក្រសួងព័ត៌មាននឹងមានវិធានការផ្លូវច្បាប់ចំពោះអ្នកចែកចាយព័ត៌មានមិនពិតតាមបណ្តាញសង្គម
ក្រសួងព័ត៌មានកម្ពុជា ក្រោយពីចេញសេចក្តីប្រកាសគ្រប់គ្រងការផ្សព្វផ្សាយតាមប្រព័ន្ធអ៊ីនធឺណិត បានបញ្ជាក់នៅថ្ងៃនេះ ថាខ្លួននឹងចាត់វិធានការផ្លូវច្បាប់ចាប់ពីថ្ងៃស្អែកតទៅ ចំពោះអ្នកចែកចាយព័ត៌មានមិនពិតតាមបណ្តាញទំនាក់ទំនងសង្គម។ ជាសេចក្តីប្រកាស ដែលក្រុមអង្គការក្រៅរដ្ឋាភិបាលរិះគន់។
ចុះផ្សាយនៅថ្ងៃ៖
ស្តាប់ - ០២:១៣
លោក ផុស សុវណ្ណ អគ្គនាយកនៃអគ្គនាយកដ្ឋានព័ត៌មាន និងសោតទស្សន៍នៃក្រសួងព័ត៌មាន បានថ្លែងក្នុងឱកាសផ្សព្វផ្សាយសេចក្តីប្រកាសរបស់អន្តរក្រសួងថា ចាប់ពីថ្ងៃទី៥ ខែកក្កដា តទៅក្រសួងនឹងមានវិធានការខ្លះៗហើយ តាមរយៈការអនុវត្តប្រកាសរបស់អន្តរក្រសួង ទៅលើអ្នកចែកចាយព័ត៌មានមិនពិត និងប៉ះពាល់ដល់សន្តិសុខជាតិ។ បើតាមលោក ផុស សុវណ្ណ ក្រសួងព័ត៌មានបានប្រុងប្រៀបយូរណាស់មកហើយ ប៉ុន្តែចង់ទុកឱកាស ដើម្បីសិក្សាជាមួយក្រសួងពាក់ព័ន្ធ ថាតើព័ត៌មានប្រភេទណា និងកម្រិតណា ដែលក្រសួងគួរចាត់វិធានការ ឬមិនគួរ?
លោក ផុស សុវណ្ណ បញ្ជាក់ជាថ្មីថា សេចក្តីប្រកាសរបស់អន្តរក្រសួងមិនមានចេតនាណាមួយរឹតបន្តឹងចំពោះអ្នក ដែលមាននិន្នាការផ្ទុយពីរដ្ឋាភិបាលនោះទេ ព្រោះច្បាប់នៅក្នុងប្រទេសកម្ពុជាបានធានាសេរីភាពក្នុងការបញ្ចេញមតិ។
សូមបញ្ជាក់ថា ប្រកាសរួមគ្នានៃក្រសួង៣ កាលពីចុងខែឧសភា មានគោលដៅ ប្រឆាំង ទប់ស្កាត់ រាល់ការផ្សព្វផ្សាយរាល់ខ្លឹមសារព័ត៌មាន ឬសារជាអក្សរ សំឡេង វីដេអូ និងទម្រង់ផ្សេងៗទៀត នៅតាមគេហទំព័រនិងបណ្ដាញសង្គមក្នុងប្រទេសកម្ពុជា ដែលមានចេតនាបង្កជាចលាចល។ ជាចលាចល បណ្ដាលឲ្យអន្តរាយដល់វិស័យការពារជាតិ សន្តិសុខជាតិ ទំនាក់ទំនងជាមួយប្រទេសដទៃ សេដ្ឋកិច្ចជាតិ សណ្ដាប់ធ្នាប់សារធារណៈ ការរើសអើង និងវប្បធម៌ ប្រពៃណីជាតិ។
បើតាមប្រកាសអន្ដរក្រសួងកម្រាស់៤ទំព័រដដែល ស្ថាប័ន និងអង្គភាពជំនាញនីមួយៗត្រូវបំពេញកាតព្វកិច្ចតាមភារកិច្ចរៀងៗខ្លួន និងត្រូវសហការគ្នា ដើម្បីសម្រេចឲ្យបាននូវគោលដៅខាងដើម។ ក្នុងនោះ ក្រសួងព័ត៌មានត្រូវគ្រប់គ្រងព័ត៌មានដែលផ្សព្វផ្សាយតាមប្រព័ន្ធអេឡិចត្រូនិក, ចាត់វិធានការចំពោះប្រព័ន្ធផ្សព្វផ្សាយតាមអេឡិចត្រូនិកណា ដែលមានច្បាប់អនុញ្ញាត តែផ្សព្វផ្សាយលើ្មសច្បាប់, ព្រមទាំងផ្ដល់ព័ត៌មានដល់ក្រសួងប្រៃសណីយ៍ ឲ្យចាត់វិធានការបិទប្រព័ន្ធផ្សព្វផ្សាយតាមអេឡិចត្រូនិកដែលបើកអាជីវកម្មដោយខុសច្បាប់ ឬផ្សាយព័ត៌មានដោយចេតនាដើម្បីបង្កចលាចលនៅក្នុងសង្គម។ រីឯក្រសួងមហាផ្ទៃវិញ មានភារកិច្ចសិក្សា ស្រាវជ្រាវ ស្វែងរក និងឈានទៅបង្ក្រាបគេហទំព័រ និងបណ្ដាញសង្គមណា ដែលផ្សព្វផ្សាយល្មើសច្បាប់។
ជាការកត់សម្គាល់សេចក្តីប្រកាសរបស់អន្តរក្រសួងត្រូវបានអង្គការសង្គមស៊ីវិលនៅក្នុងប្រទេសកម្ពុជា បានធ្វើការរិះគន់ថារដ្ឋាភិបាលធ្វើជ្រុល ហើយស្នើឲ្យរដ្ឋាភិបាលចាត់វិធានការអប់រំប្រជាពលរដ្ឋពីការប្រើប្រាស់អ៊ីនធឺណិតឲ្យបានត្រឹមត្រូវវិញ ទើបប្រសើរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ