ឆមាសទី១ឆ្នាំនេះ៖ ខ្យល់កន្ត្រាក់ និងរន្ទះបាញ់បានសម្លាប់មនុស្សជិត៨០នាក់ និងរបួសជាង២០០នាក់
នៅក្នុងឆមាសទី១ឆ្នាំ២០១៦នេះ គ្រោះខ្យល់កន្ត្រាក់ និងរន្ទះបាញ់នៅទូទាំងប្រទេសកម្ពុជា បានសម្លាប់ជីវិតមនុស្សចំនួន៧៩នាក់ និងរងរបួសចំនួន២០១នាក់។ ក្រៅពីនេះ គ្រោះមហន្តរាយនេះ ក៏បានបំផ្លាញផ្ទះសម្បែងរបស់ពលរដ្ឋអស់ជាច្រើនខ្នងផងដែរ។ នេះបើតាមលោកកែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ ដែលបានថ្លែងបញ្ជាក់ប្រាប់វិទ្យុបារាំងអន្តរជាតិនៅព្រឹកថ្ងៃពុធនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៩
និយាយដាច់ដោយឡែក នៅក្នុងឆមាសទី១ ឆ្នាំ២០១៦នេះ គ្រោះខ្យល់កន្ត្រាក់នៅទូទាំងប្រទេសកម្ពុជា បានកើតឡើងចំនួន ១៦៣លើកដោយធ្វើឲ្យរលំ និងខូចខាតធ្ងន់ធ្ងរផ្ទះសម្បែងប្រជាពលរដ្ឋចំនួន ១ពាន់២រយ៨ខ្នង ផ្ទះរបើកដំបូលចំនួន ៥ពាន់៦រយ៩ខ្នង សាលារៀនខូតខាតចំនួន៣៤អាគារ និងអាគារផ្សេងៗទៀតបានខូចខាតចំនួន ៣២អគារ។ ក្រៅពីនេះ ក៏មានការខូចខាតដើមកៅស៊ូទំហំ ៤០០ហិកតានៅក្នុងខេត្តរតនៈគិរី មណ្ឌលគិរី និងខេត្តត្បូងឃ្មុំផងដែរ។ គ្រោះមហន្តរាយធម្មជាតិនេះ ក៏បានសម្លាប់ជីវិតចំនួន ១៩នាក់ និងរងរបួសចំនួន ១៣៩នាក់។ ចំនួននេះ បើប្រៀបធៀបនឹងឆមាសទី១នៅក្នុងឆ្នាំ២០១៥ កន្លងទៅ គឺមានការធ្លាក់ចុះ ដោយកាលពីឆ្នាំទៅ មានមនុស្សស្លាប់ចំនួន ១២នាក់ និងអ្នករងរបួសចំនួន ១១៥នាក់។
ចំណែកគ្រោះរន្ទះបាញ់វិញ បានសម្លាប់ជីវិតមនុស្សចំនួន ៦០នាក់ក្នុងនោះស្រីចំនួន ១៣ នាក់ និងមានអ្នករងរបួសចំនួន ៦២នាក់។ ចំនួននេះ ក៏មានការថយចុះដែរ បើប្រៀប ធៀបទៅនឹងរយៈពេលដូចគ្នាកាលឆ្នាំ២០១៥ ដោយកាលណោះ មានមនុស្សស្លាប់៤៤នាក់ និងអ្នករបួសមានចំនួន ៥១នាក់។ ក្រៅពីជីវិតមនុស្ស គ្រោះមហន្តរាយនេះ ក៏បានសម្លាប់សត្វគោក្របីចំនួន ៤៨ក្បាល និងខូចខាតផ្ទះសម្បែងចំនួន៨ ខ្នងផងដែរ។ បើតាមគណៈកម្មាធិការជាតិគ្រប់គ្រងគ្រោះមហន្តរាយ ខេត្តដែលទទួលរងគ្រោះដោយសាររន្ទះបាញ់ធ្ងន់ធ្ងរជាងគេ គឺខេត្តពោធិ៍សាត់ បាត់ដំបង បន្ទាយមានជ័យ និងខេត្តឧត្តរមានជ័យ។
បើទោះបីគ្រោះមហយន្តរាយទាំងពីរនេះ បានសម្លាប់ជីវិតមនុស្សតិចជាងឆ្នាំមុនក៏ដោយ ក៏ប៉ុន្តែលោកកែវ វី នាយកខុទ្ទកាល័យគណៈកម្មាធិការជាតិគ្រប់គ្រងគ្រោះមហន្តរាយ បានលើកឡើងថា គ្រោះធម្មជាតិនេះនឹងនៅតែបន្តកើតឡើងទៀតរហូតដល់ចប់រដូវវស្សា។ ដូច្នេះ លោកបានជំរុញឲ្យប្រជាពលរដ្ឋខ្មែរទាំងអស់បន្តតាមដានពីស្ថានភាពអាកាសធាតុជាប់ជានិច្ច តាមរយៈសេចក្តីជូនដំណឹងរបស់ក្រសួងធនធានទឹក និងឧតុនិយម។ ធ្វើដូចនេះ ប្រជាពលរដ្ឋអាចត្រៀមបង្ការបានមុន ដើម្បីកាត់បន្ថយគ្រោះថ្នាក់ ដែលបង្កឡើងដោយគ្រោះមហន្តរាយធម្មជាតិនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ