រយៈពេលជិត១សប្តាហ៍លោកកឹម សុខា ចុះមូលដ្ឋានបានជិត១០ខេត្តក្រុង
គិតមកដល់ពេលនេះមានរយៈពេលជិត១សប្តាហ៍ហើយ ដែលលោកកឹម សុខា ប្រធានស្តីទីគណបក្សប្រឆាំងសម្រុកចុះមូលដ្ឋាន ក្រោយពេលដែលលោកទទួលបានការលើកលែងទោសពីព្រះមហាក្សក្រកម្ពុជា កាលពីចុងឆ្នាំ២០១៦កន្លងទៅ។ ដំណើរចុះមូលដ្ឋានរបស់លោកគឺធ្វើឡើង ខណៈដែលការបោះឆ្នោតឃុំសង្កាត់ជិតឈានមកដល់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
ប្រធានស្តីទីគណបក្សសង្រ្គោះជាតិលោកកឹម សុខា ចាប់តាំងពីថ្ងៃទី២២ ខែមករា មកបានផ្តើមយុទ្ធនាការចុះមូលដ្ឋានរបស់ខ្លួនជាបន្តបន្ទាប់ក្នុងខេត្តក្រុងប្រមាណ៨ ដើម្បីជួបអ្នកគាំទ្រ ថ្នាក់ដឹកនាំគណបក្សនៅតាមមូលដ្ឋាន និងដើម្បីជ្រើសរើសបេក្ខជនឈរឈ្មោះសម្រាប់ការបោះឆ្នោតជ្រើសរើសក្រុមប្រឹក្សាឃុំ សង្កាត់ នាពេលខាងមុខ។ នេះបើតាមទំព័រហ្វេសប៊ុករបស់លោកកឹម សុខា។
នៅថ្ងៃទី២៧ ខែមករា លោក កឹម សុខាបានជួបប្រជុំក្រុមការងារជាមួយថ្នាក់ដឹកនាំមូលដ្ឋានក្នុងខេត្តប៉ៃ លិន ហើយលោកកឹម សុខា បានកត់សម្គាល់ថាខេត្តប៉ៃលិន គឺជាមូលដ្ឋាននៃការផ្លាស់ប្តូរ។ លោកកឹម សុខា បានសរសេរក្នុងទំព័រហ្វេសប៊ុករបស់លោកថា ឆន្ទៈប្រជាពលរដ្ឋក្នុងខេត្តប៉ៃលិន គឺស្របនឹងគោលនយោបាយរបស់គណបក្សប្រឆាំងមួយនេះ។
លោកអេង ឆៃអ៊ាងមន្ត្រីជាន់ខ្ពស់គណបក្សសង្រ្គោះជាតិថា ការចុះមូលដ្ឋានរបស់ថ្នាក់ដឹកនាំគណបក្សសង្រ្គោះជាតិគឺមិនមានរឿងអ្វីចម្លែកនោះទេ ព្រោះនេះគឺជារឿងធម្មតារបស់មេដឹកនាំគណបក្សនយោបាយនីមួយៗ ដែលត្រូវផ្សារភ្ជាប់ខ្លួនឯងទៅនឹងថ្នាក់ដឹកនាំមូលដ្ឋាន ហើយនេះគឺជារឿងចាំបាច់។ លោកបន្ថែមថាក្នុងឋានៈលោកកឹម សុខា ជាប្រធានស្តីទី ដូច្នេះលោកត្រូវចុះមូលដ្ឋាន ដើម្បីសួរសុខទុក្ខផង និងស្តាប់មតិយោបល់របស់អ្នកនៅមូលដ្ឋានផង។
លោកអេង ឆៃអ៊ាង បញ្ជាក់ទៀតថានៅក្នុងខែកុម្ភៈខាងមុខនេះលោកកឹម សុខានឹងចុះមូលដ្ឋានជួបបេក្ខជនឈរឈ្មោះក្រុមប្រឹក្សាឃុំ សង្កាត់នៅតាមបណ្តាខេត្តទូទាំងប្រទេសកម្ពុជា ក្រោយពីគណបក្សនេះ បានរៀបចំបេក្ខជនឈរឈ្មោះក្រុមប្រឹក្សាឃុំ សង្កាត់បានប្រមាណ៩៥ភារយហើយ តាមខេត្តនីមួយៗ។ ការចុះជួបបេក្ខជនក្រុមប្រឹក្សាឃុំ សង្កាត់របស់គណបក្ស លើកទី២ ក៏មានការចូលរួមពីលោកសម រង្សីប្រធានគណបក្សប្រឆាំង តាមប្រព័ន្ធវីដេអូខនហ្វឺរិនដែរ។
សូមបញ្ជាក់ថា កាលពីថ្ងៃទី២២ ខែមករា លោក កឹម សុខា ប្រធានស្តីទីគណបក្សសង្គ្រោះជាតិ បានចាប់ផ្តើមចុះមូលដ្ឋានសាជាថ្មី ក្រោយពីលោកបានទទួលការលើកលែងទោសពីព្រះមហាក្សត្រកាលពីខែតុលាឆ្នាំ២០១៦។ ខេត្តព្រះសីហនុ និងខេត្តកំពតដែលស្ថិតនៅភាគនិរតីនៃកម្ពុជា គឺជាទឹកដីដំបូងគេដែលប្រធានស្តីទីគណបក្សប្រឆាំងបានធ្វើដំណើរទៅ។
ទន្ទឹមនឹងដំណើរឆ្ពោះទៅកាន់មូលដ្ឋានរបស់លោក កឹម សុខា រដ្ឋសភាជាតិនឹងបើកកិច្ចប្រជុំនៅថ្ងៃទី៣១មករាខាងមុខ ដើម្បីសម្រេចធ្វើវិសោធនកម្មបទបញ្ជាផ្ទៃក្នុងនៃរដ្ឋសភាត្រង់ប្រកា៤៨ថ្មី (បី) លុបចោលតំណែងប្រធានក្រុមមតិភាគតិចនៃរដ្ឋសភារបស់លោក កឹម សុខា ដែលមានឋានៈស្មើនាយករដ្ឋមន្រ្តី។ សេចក្តីសម្រេចនេះ គឺធ្វើឡើងតាមសំណើរបស់ក្រុមអ្នកតំណាងរាស្រ្តគណបក្សប្រជាជនកម្ពុជាចំនួន៥៥រូប ដែលបានចោទប្រកាន់គណបក្សប្រឆាំងថា គ្មានភាពស្មោះត្រង់ក្នុងការចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ