បេក្ខជន១០៥នាក់ដាក់ពាក្យសុំធ្វើជាអគ្គលេខាធិការនិងអគ្គលេខាធិការង គជប ថ្មី
គិតត្រឹមល្ងាចថ្ងៃទី២៥ធ្នូឆ្នាំ២០១៥នេះ គណៈកម្មាធិការជាតិរៀបចំការបោះឆ្នោត បានទទួលពាក្យពីបេក្ខជនប្រមាណជា១០៥នាក់ ស្នើសុំធ្វើជាអគ្គលេខាធិការ និងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត ហៅកាត់ថា គជប។ ក្នុងនោះក៏មានលោក ទេព នីថា អគ្គលេខាធិការ គជប ចាស់ ដែលរងការរិះគន់ផងដែរ។ ការទទួលពាក្យនឹងត្រូវផុតកំណត់នៅល្ងាចថ្ងៃទី២៦ធ្នូ។
ចុះផ្សាយនៅថ្ងៃ៖
ស្តាប់ - ០២:០៤
ក្នុងចំណោមបេក្ខជនដែលបានដាក់ពាក្យសុំធ្វើជាអគ្គលេខាធិការគណៈកម្មាធិការជាតិរៀបចំការបោះឆ្នោត គជប ថ្មី ចំនួន២១នាក់ ក្នុងនោះក៏មានលោក ទេព នីថា អគ្គលេខាធិការគណៈកម្មាធិការជាតិរៀបចំការបោះឆ្នោតចាស់ផងដែរ។ លោក ទេព នីថា ដែលរងការរិះគន់ពីគណបក្សប្រឆាំងចំពោះតួនាទីរបស់គាត់នាពេលកន្លងមកនោះ បានដាក់ពាក្យសុំធ្វើជាអគ្គលេខាធិការ គ.ជ.ប ជាថ្មី កាលពីថ្ងៃទី ១៨ ធ្នូ ឆ្នាំ២០១៥។ ជាមួយគ្នានេះ នៅមានអតីតសមាជិក គ.ជ.ប មួយចំនួនទៀត ក៏បានដាក់ពាក្យផងដែរ ក្នុងនោះរួមមាន លោក កុសៈឡៈទីប៉ោ អគ្គលេខាធិការង គ.ជ.ប និងលោក ម៉ៅ សុភារិទ្ធ អតីតសមាជិក គ.ជ.ប។ ក្រៅពីនេះ ក៏មានបេក្ខជនមកពីអង្គការសង្គមស៊ីវិលក៏បានដាក់ពាក្យផងដែរ។ តួយ៉ាងដូចជា លោក នី ចរិយា ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក, លោក ហេង មណីចិន្តា នាយកអង្គការពុទ្ធសាសនាដើម្បីអភិវឌ្ឍន៍ និងមន្រ្តីអង្គការសង្គមស៊ីវិលមួយចំនួនទៀត។
លោក ហង់ ពុទ្ធា អ្នកនាំពាក្យ គ.ជ.ប បានថ្លែងថា គិតត្រឹមល្ងាចថ្ងៃទី២៥ធ្នូ មានបេក្ខជនសរុបចំនួន១០៥រូប ក្នុងចំណោមបេក្ខជន២០០រូប បានយកពាក្យមកដាក់នៅ គ.ជ.ប ក្នុងនោះ បេក្ខជន២១រូប បានដាក់ពាក្យសុំធ្វើជាអគ្គលេខាធិការ និងបេក្ខជន៨៤រូប បានដាក់ពាក្យសុំធ្វើជាអគ្គលេខាធិការរង។ ក្នុងចំណោមបេក្ខជនទាំងអស់ គជប នឹងជ្រើសរើសបេក្ខជនម្នាក់ធ្វើជាអគ្គលេខាធិការ និង៤នាក់ជាអគ្គលេខាធិការរង។
យោងតាមមាត្រា៥៥នៃច្បាប់ស្តីពីការរៀបចំ និងការប្រព្រឹត្តទៅនៃគណៈកម្មាធិការជាតិរៀបចំការបោះឆ្នោត បានចែងថា អគ្គលេខាធិការ គជប ដែលមានឋានៈស្មើរដ្ឋលេខាធិការ និងអគ្គលេខាធិការរង ដែលមានឋានៈស្មើនឹងអនុរដ្ឋលេខាធិការនេះ ត្រូវតែងតាំងដោយព្រះរាជក្រឹត្យ តាមសំណើររបស់ប្រធានគណៈកម្មាធិការជាតិរៀបចំការបោះឆ្នោត បន្ទាប់ពីទទួលបានការឯកភាព តាមសម្លេងភាគច្រើនដាច់ខាតនៃសមាសភាពគណៈកម្មាធិការជាតិរៀបចំការបោះឆ្នោតទាំងមូល។
យ៉ាងណាក៏ដោយ ចំនួនបេក្ខជនឈរឈ្មោះនឹងមានការប្រែប្រួលទៀត ព្រោះថា ការផុតកំណត់នៃការឈប់ទទួលពាក្យនឹងធ្វើឡើងរហូតដល់ម៉ោង៥និង៣០នាទីល្ងាចថ្ងៃទី២៦ធ្នូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ