គណបក្សខ្មែររួបរួមជាតិរបស់លោក ញឹក ប៊ុនឆៃត្រូវបានបង្កើតជាផ្លូវការ
ក្រសួងមហាផ្ទៃនៅថ្ងៃទី២៤ កុម្ភៈនេះ បានចេញលិខិតទទួលស្គាល់គណបក្សខ្មែររួបរួមជាតិថ្មីរបស់លោកញឹក ប៊ុនឆៃ ជាផ្លូវការណ៍ក្រោយការដើរចេញពីគណបក្សហ៊្វុនស៊ិនប៉ិកអស់រយៈពេលជិតមួយខែ។ គណបក្សថ្មីនេះ មានទីតាំងនៅក្នុងសង្កាត់ជ្រោយចង្វា ក្នុងទីក្រុងភ្នំពេញ។
ចុះផ្សាយនៅថ្ងៃ៖
ស្តាប់ - ០១:២៨
គណបក្សរាជានិយមថ្មីដែលដឹកនាំដោយលោក ញឹក ប៊ុនឆៃ ត្រូវរដ្ឋាភិបាលអនុញ្ញាតជាផ្លូវការហើយនៅថ្ងៃទី២៤កុម្ភៈនេះ។ គណបក្សថ្មីដែលកើតចេញពីការបែកបាក់សារជាថ្មីពីសម្តេចក្រុមព្រះនេះ ក៏នឹងធ្វើសមាជជាលើកដំបូងរបស់ខ្លួននៅថ្ងៃទី២៦កុម្ភៈចុងសប្តាហ៍ ដែលមានមនុស្សចូលរួមប្រមាណជា៣ពាន់នាក់។ គណបក្សរាជានិយមថ្មីនេះ មានលោកញឹក ប៊ុនឆៃ ជាប្រធានបក្ស លោក ទា ចំរ៉ាត់ ជាប្រធានកិត្តិយស និងលោក ខាន់ សាវឿន។ ការបែកមកបង្កើតគណបក្សថ្មីរបស់លោក ញឹក ប៊ុនឆៃនេះ គឺធ្វើឡើងបន្ទាប់ពីមានជម្លោះផ្ទៃក្នុងរវាងក្រុមរបស់លោក និងក្រុមសម្តេចក្រុមព្រះក្រោយការរួមរស់សារជាថ្មីរវាងក្រុមសម្តេចក្រុមព្រះ និងក្រុមលោក ញឹក ប៊ុនឆៃបានជាង១ឆ្នាំពោលគឺក្រោយការបង្រួបបង្រួមកាលពីខែមករា ២០១៥ ។
សូមបញ្ជាក់ថាក្រោយការបែកបាក់សារជាថ្មីរបស់គណបក្សហ៊្វុនស៊ិនប៉ិច ជាពីរចំណែកចុងក្រោយនេះ។ អ្នកវិភាគបានមើលឃើញថា អនាគតគណបក្សរាជានិយមទាំងពីរដែលម្ខាងជារបស់សម្តេចក្រុមព្រះ និងម្ខាងទៀតគឺជារបស់លោកញឹក ប៊ុនឆៃនោះ នឹងគ្មានលទ្ធភាពទទួលបានប្រជាប្រិយភាពនោះទេ។ ទន្ទឹមនឹងនេះ លោកញឹក ប៊ុនឆៃ បានលើកឡើងថា គណបក្សថ្មីរបស់លោក នឹងនៅតែមានការគាំទ្រជានិច្ចព្រោះថា ទឹកចិត្តខ្លាវក្លារបស់សមាជិក និងគោលនយោបាយ ដែលយកបញ្ហាជាតិជាធំមកដាក់ដើម្បីឃោសនា។ គោលនយោបាយទាំងនោះរួមមាន បញ្ហាអំពើពុករលួយ បញ្ហាព្រំដែនដែលនៅសេសសល់ជាដើម។
យ៉ាងណាក៏ដោយ លោកញឹក ប៊ុនឆៃ ដែលមានការជិតស្និតនឹងប្រធានគណបក្សប្រជាជនកម្ពុជា លោកនាយករដ្ឋមន្ត្រីហ៊ុន សែននោះ បានគូសបញ្ជាក់ថាគណបក្សថ្មីរបស់លោក មិនមែនជាគណបក្សប្រឆាំងនឹងរដ្ឋាភិបាលនោះទេ។ សូមបញ្ជាក់ថា ខណៈដែលការបោះឆ្នោតនៅកម្ពុជាខិតជិតចូលមកដល់គណបក្សថ្មីៗនៅកម្ពុជាត្រូវបានបង្កើតឡើងជាច្រើន ដូចជាគណបក្សយុវជន គណបក្សប្រជាធិបតេយ្យមូលដ្ឋានរបស់ក្រុមបញ្ញវន្ត និងគណបក្សអំណាចពលរដ្ឋខ្មែររបស់លោក សួនសេរីរដ្ឋាជាដើម។ បើទោះបីជាបែបណាក៏ ការបង្កើតគណបក្សថ្មីរបស់ក្រុមលោកញឹក ប៊ុនឆៃនេះគឺគ្រាន់តែជាផ្កាលំអរសួននៃទីលានប្រកួតនៅកម្ពុជាតែប៉ុណ្ណោះ។ នេះបើតាមអ្នកវិភាគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ