ចំណីអាហារនៅកម្ពុជានៅតែរងការគំរាមពីសុវត្ថិភាព
ចុះផ្សាយនៅថ្ងៃ៖
ស្តាប់ - ០៥:២៧
វាជារឿងនឹកស្មានមិនដល់ដែលប្រទេសកម្ពុជា ក្រោមកិត្តិនាមថា«អាណាចក្រត្នោត» បែរជាមានការកែច្នៃស្ករត្នោតពីស្ករសលាយជាតិគីមីទៅវិញ។ ការធ្វើបែបនេះបានប៉ះពាល់ដល់សុខភាពប្រជាជនធ្ងន់ធ្ងរ ប៉ះពាល់ដល់ទីផ្សារផលិតផលត្នោតខ្មែរ ដែលជាផលិតផលសម្គាល់ភូមិសាស្ត្រនិងអត្តសញ្ញាណជាតិខ្មែរ។ ការដែលមិនមានវិធានការម៉ត់ចត់លើករណីនេះ ស្មើនឹងបំផ្លាញប្រទេសជាតិនិងប្រជាជនខ្លួនឯងដូច្នោះដែរ។
តាំងពីបុរាណកាលមក ត្នោតជានិម្មិតរូបនៃប្រទេសកម្ពុជា ត្នោតមានប្រយោជន៍ច្រើនបំផុតដល់ជីវភាពរស់នៅក្នុងសង្គមខ្មែរ។ ផលិតផលគ្រប់ប្រភេទរបស់ត្នោត បានបង្ហាញពីរូបភាពនិងរស់ជាតិធម្មជាតិពិតៗ។ ខ្មែរមួយនគរពឹងអាស្រ័យលើផលិតផលដែលទាញចេញពីដើមត្នោត ពិសេសគឺស្ករត្នោតនេះតែម្តង។ ជាមួយនឹងស្ករត្នោត គេអាចប្រើប្រាស់នៅក្នុងផ្ទះបាយក្នុងការធ្វើម្ហូបអាហារ ធ្វើបង្អែម និងផ្តល់ប្រយោជន៍ដល់គ្រឿងបរិភោគជាច្រើនទៀត។
ជាអកុសល កាលពីពេលថ្មីៗនេះ ស្ករត្នោត ត្រូវបានគេរកឃើញថាបានផលិតឡើងដោយប្រើជាតិគីមីលាយជាមួយ ហើយថែមទាំងនាំចូលស្ករអំពៅប្រភេទអន់ ឬប្រភេទកាកសំណល់ មកលាយជាមួយសារធាតុគីមី ដែលមានឈ្មោះថា Sodium Hydrocilfeet ដើម្បីបំលែងទៅជា ស្ករត្នោត។ សារធាតុគីមី Sodium Hydrocilfeet គឺជាសារធាតុដែលគ្រោះថ្នាក់ខ្លាំងដល់សុខភាពមនុស្ស ដែលមានការហាមឃាត់។
តាមពិតការប្រើម្សៅគីមី ដែលធ្វើឲ្យស្ករត្នោតមានពណ៌ស្រស់ ស និងមានក្លិនឈ្ងុយឈួល សូម្បីតែរុយ ដែលជាសត្វគគ្រិចក៏មិនហ៊ានរោមផងនោះ បែរជាគេលក់សម្រាប់មនុស្សបរិភោគទៅវិញ។ មើលទៅបញ្ហាសុវត្ថិភាពចំណីអាហារនៅក្នុងប្រទេសកម្ពុជា ត្រូវគេធ្វើឲ្យមានភាពច្របូកច្របល់ស្ទើរតែរកអាហារធម្មជាតិបរិភោគលែងបាន។
កាលពីចុងខែមករាកន្លងទៅនេះ ប៉ូលិសប្រឆាំងបទល្មើសសេដ្ឋកិច្ចក្រសួងមហាផ្ទៃបានរកឃើញសិប្បកម្មមួយចំនួននៅក្នុងរាជធានីភ្នំពេញ ប្រើប្រាស់សាធាតុគីមីប្រភេទខាងលើ ផលិតស្ករត្នោត។ ប៉ូលិសបានរឹបអូសរាប់តោនយកទៅដុតបំផ្លាញចោល។ អ្នកទទួលខុសត្រូវលើរឿងទាំងអស់នេះត្រូវបានឃាត់ខ្លួនមួយចំអិនក្រពិស ហើយត្រូវតុលាការដោះលែងវិញ ដោយសំអាងថាគ្មានទោសដាក់ពន្ធនាគារ យោងតាមច្បាប់គ្រប់គ្រងអាស៊ីតខ្លាំង ប៉ុន្តែមហាជនបានលើកឡើងថាវាជាប្រភេទឧក្រិដ្ឋកម្មបំផ្លាញសុខភាពមនុស្សដែលមិនគួរអត់ឱនឲ្យបានឡើយ។
មួយថ្ងៃៗប្រជាជនខ្មែរដែលមានជីវភាពទន់ខ្សោយ ត្រូវបានរួតរិតដោយជាតិគីមី ដោយបន្តបរិភោគជាមួយចំណីអាហារដែលគ្មានសុវត្ថិភាព។ ពីមុនគេរំពឹងថាផលិតផលធម្មជាតិ ប្រហែលមានតែស្ករត្នោតទេដែលជារបស់ធម្មជាតិចុងក្រោយមិនពាក់ព័ន្ធនឹងជាតិគីមី ក៏ប៉ុន្តែនៅពេលដែលមានការរកឃើញថា សូម្បីតែស្ករត្នោតដែលខ្មែរមានដើមត្នោតរាប់មិនអស់ បែរជាផលិតចេញពីស្ករអំពៅធុនអន់ ដោយលាយជាមួយជាតិគីមីបំលែងទៅជាស្ករត្នោតទៅវិញ វាជារឿងដែលមិនគួរឲ្យកើតមានទាល់តែសោះ។
តាមរយៈទង្វើដែលមិនមានការពិចារណានេះ បង្ហាញថាខ្មែរបានបាត់បង់អត្តសញ្ញាណ ធម្មជាតិរបស់ខ្លួនហើយគឺផលិតផលចេញពីដើមត្នោត។ ហើយទាក់ទងទៅនឹងទំនុកចិត្តវិញ ប្រហែលជាលែងមានអ្វីដែលជាផលិតផលធម្មជាតិពិតៗហើយ ដែលត្រូវគេយកទៅលក់នៅតាមទីផ្សារ។ ម្យ៉ាងទៀតទីផ្សារស្ករត្នោតខ្មែរក៏រងការវាយប្រហារ ពីកេរ្តិ៍ឈ្មោះមិនល្អផងដែរ។
មែនទែនទៅ រឿងនេះមិនមែនសាមញ្ញទេ ត្រូវតែមានសំណួរ និងសញ្ញាសួរប៉ុនដូងទំហើយ ថាហេតុអ្វីបានជាគ្រឿងបរិភោគគ្រប់យ៉ាងនៅក្នុងប្រទេសកម្ពុជារងការគម្រាមពីសុវត្ថិភាព ដូច្នេះ? ជាការពិតចំណីអាហារនៅកម្ពុជា ពិតជាពិបាកនិយាយថាមានសុវត្ថិភាពណាស់ ដោយហេតុថាមានករណីពុលអាហារជាបន្តបន្ទាប់នៅទូទាំងប្រទេស។
តាមពិតការប្រើប្រាស់ជាតិគីមីលើចំណីអាហារ លើបន្លែ ត្រីសាច់ មិនមែនជារឿងថ្មីទេ។ អាហារដែលមានជាតិគីមីទាំងនេះ បានរុញច្រានឲ្យសុខភាពពលរដ្ឋខ្មែររងនូវជំងឺប្លែកៗជាច្រើននៅក្នុងខ្លួន។ ការដែលឈ្មួញមានលទ្ធភាពបង្កអសន្តិសុខលើចំណីអាហារកន្លងមក ត្រូវគេស្តីបន្ទោសទៅលើសមត្ថកិច្ចពាក់ព័ន្ធ ដែលមិនធ្វើការ បណ្តែតបណ្តោយឲ្យជាតិគីមីត្រូវគេប្រើប្រាស់ស្រែចតែចិត្ត។
ទោះយ៉ាងនេះក្តីជារឿយៗ តាមកញ្ចក់ទូរទស្សន៍ក្នុងស្រុក គេតែងឃើញសមត្ថកិច្ចកាំកុងត្រូល ចុះទៅតាមទីផ្សារ ត្រួតពិនិត្យមើលគុណភាពទំនិញ ពិសោធន៍រកសារធាតុគីមីផងដែរ។ ក៏ប៉ុន្តែអាជីវករនៅតាមបណ្តាផ្សារមួយចំនួននៅតែហ៊ានលក់ផលិតផលដែលមានលាយជាតិគីមីរបស់ពួកគេ។ ផលិតផលខូចគុណភាព ហួសកាលកំណត់ ត្រូវបានគេប្រទះឃើញញឹកញាប់ថានៅបន្តដាក់លក់ដោយមិនបារម្ភនឹងការចាប់បង្រ្កាប។
រូបភាពបែបនេះធ្វើឲ្យមានចំងល់ពីអ្នកតាមដានសង្គម ថាតើសមត្ថកិច្ចពាក់ព័ន្ធ បានបំពេញការងាររបស់ផងខ្លួន ប្រកបដោយភាពច្បាស់លាស់កំរិតណា?
ជារួមបើមិនមានឆន្ទៈ និងវិធានការណ៍តឹងរ៉ឹងក្នុងការលុបបំបាត់សារធាតុគីមីពីចំណីអាហារពីសំណាក់សមត្ថកិច្ចជំនាញទេ នោះប្រជាជនខ្មែរនឹងបន្តរងគ្រោះបន្តទៀត ក្នុងនោះអ្នកដែលមានជីវភាពក្រីក្រ ជាអ្នករងគ្រោះខ្លាំងជាងគេ ដោយសារការទិញអាហារដែលមានជាតិគីមីទៅបរិភោគ ពួកគេគ្មានជម្រើសទេ។ ម្យ៉ាងទៀតបើនៅតែបណ្តែតបណ្តោយ ក្រៅពីប្រជាជនខ្មែរអ្នកដែលខាតគឺមុខមាត់ប្រទេសកម្ពុជាទាំងមូល ក្រោមក្រសែភ្នែកអ្នកទេសចរណ៍បរទេស គេនឹងមិនរើសយកកម្ពុជាជាទីសំរាកកាយ ដ៏មានផាសុខភាពទៀតឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ