ការកំណត់អាសនៈរដ្ឋសភា មិនមានការឯកភាព
ក្រុមការងារចរចាកំណែទម្រង់ការបោះឆ្នោតរបស់គណបក្សប្រជាជនកម្ពុជា និងគណបក្សសង្គ្រោះជាតិ បានបន្តជួបចរចា កាលពីរសៀលថ្ងៃសុក្រ ទី៦កុម្ភៈ នៅរដ្ឋសភា។ ក្រុមការងារគណបក្សទាំងពីរ បានពិនិត្យឡើងវិញ លើចំណុចដែលមិនទាន់ឯកភាពគ្នា ក្នុងការកែប្រែច្បាប់បោះឆ្នោតជ្រើសតាំងតំណាងរាស្ត្រ រួមមាន ការកំណត់អាសនៈ និងការដៅអត្តសញ្ញាណអ្នកបោះឆ្នោត ជាដើម។ ក្នុងនោះ គណបក្សទាំងពីរ បន្តមិនឯកភាពគ្នាលើការកំណត់អាសនៈរដ្ឋសភាដដែល។
ចុះផ្សាយនៅថ្ងៃ៖
ស្តាប់ - ០២:១៨
មានការជជែកច្រើនលើការកំណត់អាសនៈរដ្ឋសភា សម្រាប់អាណត្តិក្រោយ។ តែក្រុមការងារគណបក្សទាំងពីរ មិនទាន់រកចំណុចឯកភាពគ្នានៅឡើយទេ។ គណបក្សប្រជាជនកម្ពុជា ចង់ឲ្យនៅថេរដដែល គឺ១២៣ អាសនៈ។ តែគណបក្សសង្គ្រោះជាតិ ចង់ឲ្យមានរូបមន្តមួយ ចែងក្នុងច្បាប់បោះឆ្នោត ដើម្បីកំណត់អាសនៈរដ្ឋសភា នៅពេលប្រជាជនមានការកើនឡើង ពោលគឺគណបក្សសង្គ្រោះជាតិ ចង់ឲ្យបង្កើនអាសនៈរដ្ឋសភា នៅអាណត្តិក្រោយ លើសពី ១២៣។
លោក ប៊ិន ឈិន ប្រធានក្រុមការងារចរចាគណបក្សប្រជាជនកម្ពុជា បានមានប្រសាសន៍ថា គណបក្សប្រជាជនកម្ពុជា នៅតែរក្សាជំហរ ថាអាសនៈរដ្ឋសភា សម្រាប់នីតិកាលទី៦ នៅដដែល គឺ១២៣ អាសនៈដូចពេលនេះ។ ប៉ុន្តែគណបក្សសង្គ្រោះជាតិ ចង់ឲ្យបង្កើនអាសនៈ លើសពី ១២៣។
លោកប៊ិនឈិន បានបញ្ជាក់ថា ខេត្តរាជធានីទាំង ២៥ ទូទាំងប្រទេស នៅរក្សាការកំណត់អាសនៈដដែល លើកលែងតែខេត្តកំពង់ចាម ដែលពីមុនមាន ១៨ អាសនៈ នៅពេលនេះ ត្រូវបានកំណត់ក្នុងច្បាប់បោះឆ្នោត នៅត្រឹមតែ ១០ អាសនៈ រីឯខេត្តត្បូងឃ្មុំ ដែលទើបតែបំបែកចេញពីខេត្តកំពង់ចាម គឺត្រូវកំណត់ចំនួន ៨ អាសនៈ។
លោក ប៊ិន ឈិន៖ “អីចឹងយើងកុំឲ្យទាល់គ្នាតែរឿងកំណត់អាសនៈហ្នឹង ហើយនិយាយការពិតការកំណត់អាសនៈហ្នឹង វាត្រូវមានការជជែក យកកត្តាភូមិសាស្ត្រ កត្តាប្រជាសាស្ត្រ កត្តាសេដ្ឋកិច្ច កត្តាសង្គម តែរឿងបកស្រាយបញ្ហាហ្នឹង វាមិនអាចសុក្រឹត្យទេ។ ប៉ុន្តែចាំ ខ្ញុំបានប្រាប់ហើយ ចាំថា បើការកំណត់អាសនៈនេះ ធ្វើមិនបាន អាសនៈរដ្ឋសភាប៉ុន្មាន យកប៉ុណ្ណុង អាហ្នឹង គឺអីចឹង”។
ចំណែកលោក គុយ ប៊ុនរឿន បានលើកឡើងថា “ខាងគណបក្សសង្គ្រោះជាតិ ចង់ឲ្យមានការគិតគូរ ហើយនិងរក្សាទុកនូវរូបមន្ត ដើម្បីធ្វើជាមូលដ្ឋាន នៅពេលដែលកំណើនប្រជាពលរដ្ឋកាន់តែកើនឡើង។ អីចឹងនៅលើចំណុចហ្នឹង យើងជជែកគ្នាទៅ មិនទាន់មានការឯកភាពគ្នាទេ”។
ចំពោះការកំណត់ដៅអត្តសញ្ញាណអ្នកបោះឆ្នោត ក៏ត្រូវបានក្រុមការងារគណបក្សទាំងពីរលើកមកជជែកផងដែរ។ ក្នុងនោះ ការដៅអត្តសញ្ញាណអ្នកបោះឆ្នោត ត្រូវបានគណបក្សសង្គ្រោះជាតិ ចង់ឲ្យកំណត់ជាក់លាក់ ដើម្បីឲ្យមានបញ្ជីឈ្មោះបោះឆ្នោត មានគុណភាពល្អ និងមិនមានអ្នកបន្លំ។ នោះគឺការកំណត់យកស្នាមម្រាមដៃ និងរូបថតអ្នកបោះឆ្នោត ជាដើម។
ចំណុចនេះ ត្រូវបានលោក ប៊ិនឈិន អះអាងថា ការដៅអត្តសញ្ញាណអ្នកបោះឆ្នោត ត្រូវប្រើស្នាមម្រាមដៃ និងរូបថត ហើយគណបក្សប្រជាជនកម្ពុជា ចង់ឲ្យសិទ្ធិទៅគជប ជាអ្នកកំណត់ដូច្នេះ ប៉ុន្តែគណបក្សសង្គ្រោះជាតិ ចង់ឲ្យកំណត់ពីការដៅអត្តសញ្ញាណអ្នកបោះឆ្នោត ចែងនៅក្នុងច្បាប់បោះឆ្នោត។ យើងនឹងពិចារណាលើចំណុចនេះ។
នៅថ្ងៃចន្ទ ទី៩កុម្ភៈ ក្រុមការងារគណបក្សទាំងពីរ នឹងបន្តជួបគ្នា លើកឡើងពីចំណុច ដែលមិនទាន់ឯកភាពគ្នា នោះគឺការឃោសនាបោះឆ្នោត ដែលគណបក្សប្រជាជនកម្ពុជា ចង់កាត់បន្ថយថ្ងៃឃោសនា មកត្រឹមតែ ១៤ ថ្ងៃ ហើយការហែក្បួនឃោសនាតាមផ្លូវ ត្រូវធ្វើតែពីរថ្ងៃ គឺនៅថ្ងៃបើក និងថ្ងៃបិទយុទ្ធនាការឃោសនាបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ