គណបក្សប្រឆាំង គ្រោងស្នើសុំអន្តរាគមន៍ពីព្រះមហាក្សត្រ លើវិសោធនកម្មច្បាប់ស្តីពីគណបក្សនយោបាយ
ក្រុមអ្នកតំណាងរាស្រ្តគណបក្សសង្រ្គោះជាតិចំនួន៥៥រូប គ្រោងនឹងសរសេរលិខិតផ្ញើទៅកាន់ព្រះមហាក្សត្រនៅត្រឹមចុងសប្តាហ៍នេះ ដើម្បីសុំព្រះរាជអន្តរាគមន៍ពីព្រះអង្គកុំឲ្យឡាយព្រហស្ថលេខាលើវិសោធនកម្មច្បាប់ ស្តីពី គណបក្សនយោបាយ ដែលស្នើឡើងដោយគណបក្សប្រជាជនកម្ពុជា។ សម្រាប់គណបក្សប្រឆាំង នេះគឺជាផ្លូវតែមួយគត់ដែលអាចធ្វើបាន។ វិសោធនកម្មច្បាប់ស្តីពីគណបក្សនយោបាយ ត្រូវបានរដ្ឋសភាអនុម័តរួចហើយ កាលពីថ្ងៃចន្ទដើមសប្តាហ៍នេះ នឹងបានទៅដល់ដៃព្រឹទ្ធសភាហើយនៅព្រឹកថ្ងៃទី ១២ កក្កដា។
ចុះផ្សាយនៅថ្ងៃ៖
ស្តាប់ - ០២:២២
លិខិតសុំព្រះរាជអន្តរាគមន៍នេះ នឹងធ្វើឡើងយ៉ាងយ៉ូនៅត្រឹមចុងសប្តាហ៍នេះ ពោលគឺត្រូវធ្វើឲ្យបានមុនពេលដែលសេចក្តីស្នើវិសោធនកម្មច្បាប់ ស្តីពី គណបក្សនយោបាយ ដ៏ចម្រូងចម្រាស់នេះ ត្រូវបញ្ជូនទៅព្រះមហាក្សត្រ។ នេះបើតាមការអះអាងរបស់លោក សុន ឆ័យ ប្រធានក្រុមតំណាងរាស្រ្តគណបក្សសង្គ្រោះជាតិ នៅព្រឹកថ្ងៃទី ១២ កក្កដា នេះ។ លោក សុន ឆ័យ បានបញ្ជាក់ថា នេះគឺជានីតិវិធីតែមួយគត់ ដែលគណបក្សប្រឆាំងនៅមានសង្ឃឹមនិងអាចធ្វើបាន ដើម្បីទប់ស្កាត់វិសោធនកម្មច្បាប់ដ៏ចម្រូងចម្រាស់មួយនេះ។
បើតាមនីតិវិធីច្បាប់ ក្រោយពីរដ្ឋសភានិងព្រឹទ្ធសភាអនុម័តលើវិសោធនកម្មច្បាប់នេះហើយ នឹងត្រូវបញ្ជូនបន្តទៅកាន់ស្ថាប័នក្រុមប្រឹក្សាធម្មនុញ្ញ ដើម្បីពិនិត្យ មុនថ្វាយទៅព្រះមហាក្សត្រ ដើម្បីឡាយព្រះហត្ថលេខាដាក់ឲ្យអនុវត្ត។ ប៉ុន្តែបើតាមលោក សុន ឆ័យ គឺព្រះមហាក្សត្រអាចប្រើប្រាស់ព្រះរាជបុព្វសិទ្ធិរបស់ព្រះអង្គ ដើម្បីមិនឡាយព្រះហស្តលេខាលើច្បាប់នេះបាន។
គួរជំរាបជូនថា សេចក្តីស្នើវិសោធនកម្មច្បាប់ស្តីពីគណបក្សនយោបាយថ្មី បច្ចុប្បន្នបានទៅដល់ដៃព្រឹទ្ធសភាហើយ នៅថ្ងៃទី ១២ កក្កដានេះ បន្ទាប់ពីរដ្ឋសភាដែលមានតែតំណាងរាស្រ្តមកពីគណបក្សកាន់អំណាចចំនួន៦៦រូប បានអនុម័តកាលពីថ្ងៃចន្ទ ដោយគ្មានការចូលរួមពីភាគីគណបក្សប្រឆាំង។ គណៈកម្មាធិការអចិន្ត្រៃយ៍នៃព្រឹទ្ធសភា ដែលបានបើកកិច្ចប្រជុំ នៅព្រឹកថ្ងៃទី១២ កក្កដា ក៏បានសម្រេចបញ្ជូនសេចក្តីស្នើវិសោធនកម្មច្បាប់នេះ ទៅកាន់គណៈកម្មការទី៦របស់ខ្លួនដើម្បីពិនិត្យមុនពេលអនុម័ត ដោយចាត់ទុកជាការប្រញាប់។
នៅមិនទាន់មានប្រតិកម្មផុសផុលលើវិសោធនកម្មច្បាប់ដ៏ចម្រូងចម្រាស់នេះនៅឡើយទេ។ ប៉ុន្តែ លោក អេង ឆៃអ៊ាង អនុប្រធានគណបក្សសង្រ្គោះជាតិ បានចាត់ទុកវិសោធនកម្មច្បាប់ស្តីពីគណបក្សនយោបាយជាលើកទី២នេះថា មិនត្រឹមតែបានផ្តាច់ទំនាក់ទំនងរវាងគណបក្សសង្រ្គោះជាតិ និងអតីតប្រធានគណបក្សលោក សម រង្ស៊ី នោះទេ តែវិសោធនកម្មនេះ នឹងធ្វើឲ្យគណបក្សប្រឆាំងខាតបង់ថវិកាជាច្រើន ដើម្បីផ្លាស់ប្តូរផ្ទាំងប៉ាណូគណបក្សរបស់ខ្លួន ដែលមានរូបលោក សម រង្ស៊ី នៅទូទាំងប្រទេស។ ត្បិតច្បាប់ថ្មីនេះ បានហាមឃាត់មិនឲ្យគណបក្សនយោបាយឃុបឃិតជាមួយទណ្ឌិតនោះឡើយ សូម្បីតែការប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិត ដែលជាប់ទោសពីបទឧក្រិដ្ឋឬបទមជ្ឈិមនោះឡើយ។ បើមិនដូច្នោះទេ គណបក្សនយោបាយនោះនឹងត្រូវផ្អាកសកម្មភាពមិនលើសរយៈពេល៥ឆ្នាំ ឫត្រូវរំលាយចោលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ