Global Witness ផ្ញើលិខិតចំហរជូននាយករដ្ឋមន្ត្រីកម្ពុជា សុំឲ្យស៊ើបអង្កេតដោយឯករាជ្យលើឃាតកម្មលោក កែម ឡី
សហស្ថាបនិក និងជានាយកអង្គការ Global Witness លោក ផាទ្រីក អាឡេយ៍ (Patrick Alley)បានផ្ញើលិខិតចំហមួយជូនលោកនាយករដ្ឋមន្ត្រី ហ៊ុន សែន ដោយបានជម្រុញឲ្យមានការស៊ើបអង្កេតដោយហ្មត់ចត់ និងឯករាជ្យជាបន្ទាន់មួយ ចំពោះករណីឃាតកម្មបាញ់សម្លាប់លោក កែម ឡី អ្នកវិភាគដ៏មានប្រជាប្រិយភាពរបស់កម្ពុជា។ ប៉ុន្តែ លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រី បានចាត់ទុក លិខិតចំហនេះថា គ្មានតម្លៃនឹងឆ្លើយតបទេ។
ចុះផ្សាយនៅថ្ងៃ៖
ស្តាប់ - ០២:២៩
នៅក្នុងលិខិតចំហជូនលោកនាយករដ្ឋមន្ត្រី ហ៊ុន សែន ចុះថ្ងៃទី២ សីហា ឆ្នាំ២០១៦ លោក ផាទ្រីក អាឡេយ៍ (Patrick Alley) សហស្ថាបនិកនិងជានាយកអង្គការ Global Witness បានកត់សម្គាល់ថា ការចូលរួមដង្ហែសពលោក កែម ឡី ពីសំណាក់ប្រជាពលរដ្ឋខ្មែររាប់ម៉ឺននាក់ និងការថ្កោលទោសជាអន្តរជាតិ ដែលបានធ្វើឡើងកាន់តែច្រើនឡើង លើឃាតកម្មនេះ សបញ្ជាក់ច្បាស់ថា គ្រប់ការស៊ើបអង្កេតឯករាជ្យ ដែលមានលក្ខណៈមិនពេញលេញ និងមិនទទួលបានការជឿទុកចិត្តនោះទេ។
លោក ផាទ្រីក អាឡេយ៍ (Patrick Alley) បានចាត់ទុក ឃាតកម្មបាញ់សម្លាប់លោក កែម ឡី កាលពីថ្ងៃទី១០ កក្កដា ឆ្នាំ២០១៦ថា គឺជាព្រឹត្តិការណ៍ថ្មីបំផុត នៃបណ្តាអំពើហិង្សានានាប្រឆាំង នឹងសមាជិកគណបក្សប្រឆាំង សកម្មជន និងអ្នកសារព័ត៌មាន ហើយកំពុងធ្វើឲ្យអាប់ឱនដល់ដំណើរការលទ្ធិប្រជាធិបតេយ្យ និងនីតិរដ្ឋនៅកម្ពុជា។ លិខិតចំហរនេះកត់សម្គាល់ដែរថា នៅដំណាក់កាលដំបូងនៃការស៊ើបអង្កេតលើឃាតកម្មលោក កែម ឡី នេះ មិនបានធ្វើអ្វីទាល់តែសោះ ដើម្បីកាត់បន្ថយការភ័យខ្លាចដែលថា ការស៊ើបអង្កេតនេះ នឹងត្រូវបរាជ័យ ដោយមិនអាចកំណត់រក ឬកាត់ទោសអ្នកដែលបានបញ្ជាលើបទឧក្រិដ្ឋបានដូច (ករណី) លើកមុនៗដែរ។
ប៉ុន្តែយ៉ាងណាក៏ដោយ លោក ផៃ ស៊ីផាន រដ្ឋលេខាធិការនិងជាអ្នកនាំពាក្យទីស្តីការគណៈរដ្ឋមន្ត្រីបានចាត់ទុកលិខិតចំហរនេះថា គ្មានន័យនឹងឆ្លើយតបនោះទេ។ លោក ផៃ ស៊ីផាន បានបញ្ជាក់ថា ទោះបីជាលោកនៅមិនទាន់ឃើញលិខិតនេះក្តី តែថា រដ្ឋាភិបាលមិនដែលចាប់អារម្មណ៍ចំពោះលិខិត ឬរបាយការណ៍របស់អង្គការ ដែលមាននិន្នាការប្រឆាំងនឹងរដ្ឋាភិបាលនេះទេ។ លោក បានចាត់ទុកថា លិខិតនេះ គឺជាការបំពានលើអធិបតេយ្យភាពរបស់កម្ពុជា។
ចំណែកលោក ខៀវ សុភ័ក្រ អ្នកនាំពាក្យក្រសួងមហាផ្ទៃ បានមានប្រសាសន៍ដែរថា ការស៊ើបអង្កេតទាំងឡាយ គឺធ្វើឡើងដោយផ្អែកទៅលើច្បាប់របស់កម្ពុជា។ ដោយមិនសំដៅទៅលើលិខិតចំហររបស់ Global Witness លោក ខៀវ សុភ័ក្រ បានអំពាវនាវឲ្យប្រជាពលរដ្ឋខ្មែរផ្តល់ភស្តុតាងនានាមកកាន់អាជ្ញាធរ ដើម្បីស៊ើបអង្កេតបន្តលើករណីឃាតកម្មលើលោក កែម ឡីនេះ។
សូមបញ្ជាក់ថា នៅក្នុងលិខិតចំហរបស់អង្គការ Global Witnessក៏បានកត់សម្គាល់ដែរថា ក្នុងរយៈពេលជិតមួយខែបន្ទាប់ពីមរណភាពរបស់លោក កែម ឡី មានរបាយការណ៍ថា មិត្តភក្តិ និងអ្នករួមការងាររបស់លោក កែម ឡី មួយចំនួនបានរងការគំរាមកំហែង និងបំភិតបំភ័យ ក្នុងនោះ សកម្មជនពីររូប គឺជុំ ហួរ និងជុំ ហួត ត្រូវបានគេរាយការណ៍ថា បានជម្លៀសខ្លួនទៅប្រទេសថៃ ដើម្បីការពារជីវិតឲ្យផុតគ្រោះភ័យ។ Global Witness ក៏បានអំពាវនាវឲ្យរដ្ឋាភិបាលកម្ពុជា ធ្វើការធានាលើសុវត្ថិភាពរបស់បុគ្គលទាំងនេះ និងអ្នកដែលគាំទ្រពួកគេ ហើយគោរពសិទ្ធិសេរីភាពក្នុងការបញ្ចេញមតិរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ