លោក កឹម សុខា ចេញមកគោរពវិញ្ញាណក្ខន្ធលោក ប៉ែន សុវណ្ណ នៅមុខទីស្នាក់ការបក្ស
សពលោក ប៉ែន សុវណ្ណ បានដង្ហែមកដល់វត្តនួនមណីរាម ហៅវត្តថាន់ហើយនៅម៉ោង ១រសៀលនេះ។ វត្តថាន់ គឺជាទីកន្លែងតម្កល់សពលោក ប៉ែន សុវណ្ណ ចាប់ពីថ្ងៃនេះរហូតដល់ថ្ងៃទី ៦វិច្ឆិកា ទើបបូជានៅទីតាំង ដែលបានកំណត់ទុក គឺមុខវត្តបទុមវត្តី។ មុនសពដង្ហែមកដល់វត្តថាន់ក្បួនរថយន្ត ក៏បានឈប់នៅមុនទីស្នាក់ការគណបក្សសង្គ្រោះជាតិ ដើម្បីឲ្យលោក កឹម សុខា ចុះមកគោរពសពលោក ប៉ែន សុវណ្ណ។
ចុះផ្សាយនៅថ្ងៃ៖
ក្បួនរថយន្តដង្ហែសពលោក ប៉ែន សុវណ្ណ ភាគច្រើនគឺមានការចូលរួមពីតំណាងរាស្ត្រគណបក្សសង្គ្រោះជាតិ និងអ្នកគាំទ្រគណបក្សសង្គ្រោះជាតិជាច្រើនរយនាក់ដោយមានការហែហមអមដំណើរតាមរយៈមធ្យោបាយផ្សេងៗរួមមាន៖ ម៉ូតូនិងរ៉ឺម៉ក់កងបីជាដើម។ ហើយក្បួនទាំងនោះក៏បានឈប់នៅមុខទីស្នាក់ការគណបក្សសង្គ្រោះជាតិមួយសន្ទុះ ដើម្បីឲ្យលោក កឹម សុខា ចុះមកគោរពវិញ្ញាក្ខន្ធសពលោក ប៉ែន សុវណ្ណ។
នៅក្រោមកម្តៅថ្ងៃ និងបានថ្លែងដោយខ្លី លោក កឹម សុខា ចាត់ទុកលោក ប៉ែន សុវណ្ណ ជាវីរៈបុរសស្នេហាជាតិ។ ព្រោះលោក ប៉ែន សុវណ្ណ ជាអ្នករើបម្រាស់ពីអាណានិគមបរទេស។ លោក កឹម សុខា ក៏បានរំលឹកបណ្ដាំលោក ប៉ែន សុវណ្ណ ក្នុងនាមជាខ្មែរត្រូវប្រឹងប្រែង ដើម្បីការពារទឹកដី។
ហើយក្បួនដង្ហែសពលោក ប៉ែន សុវណ្ណ អតីតនាយករដ្ឋមន្ត្រីសម័យសាធារណរដ្ឋប្រជាមានិតកម្ពុជា និងជាតំណាងរាស្ត្រគណបក្សសង្គ្រោះជាតិមណ្ឌលកំពង់ស្ពឺក៏បានបន្តដំណើរមកដល់វត្តថាន់ ដើម្បីធ្វើបុណ្យបន្តនឹងអនុញ្ញត្តឲ្យពលរដ្ឋអញ្ចើញមកគោរពវិញ្ញាណក្ខន្ធរបស់លោករហូតដល់ថ្ងៃបូជានៅថ្ងៃទី ៦វិច្ឆិកា។
ទាក់ទងទីកន្លែងបូជាសពលោក ប៉ែន សុវណ្ណ គណកម្មការរៀបចំបុណ្យសពលោក ប៉ែន សុវណ្ណ រហូតមកដល់ថ្ងៃនេះនៅតែបន្តរក្សាជំហរដដែល គឺជាបូជាសពលោកប៉ែន សុវណ្ណ នៅបទុមវត្តី។ បើតាមគណកម្មការរៀបចំបុណ្យសព មុខវត្តបទុមវត្តីជាទីតាំងមួយ ដែលស័ក្តិសមបំផុតសម្រាប់កេរ្តិ៍ឈ្មោះលោក ប៉ែន សុវណ្ណ។ តែយ៉ាងណាមិញជំហរដាច់ណាត់របស់អាជ្ញាធររាជធានីភ្នំពេញ គឺមិនអនុញ្ញត្តឲ្យបូជាសពលោក ប៉ែន សុវណ្ណ នៅមុនវត្តបទុមវត្តីនោះទេ។ អាជ្ញាធរថាទីតាំងនេះសម្រាប់តែឥស្សរជនជាន់ខ្ពស់តែប៉ុណ្ណោះ។
អ្នកនាំពាក្យសាលារាជធានីភ្នំពេញ លោក មាន ចាន់យ៉ាដា បានប្រាប់វិទ្យុបារាំងសពលោក ប៉ែន សុវណ្ណ អាចធ្វើការបូជាបាននៅវត្តអារ៉ាម ដែលមានទីតាំងនៅជាយរាជធានីភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ