លោក ផៃ ស៊ីផាន សុំឲ្យប្រជាពលរដ្ឋទុកចិត្តលើរដ្ឋាភិបាលក្នុងបញ្ហាព្រំដែនកម្ពុជា-វៀតណាម
មន្ត្រីជាន់ខ្ពស់រដ្ឋាភិបាលកម្ពុជា លោក ផៃ ស៊ីផាន បានអំពាវនាវឲ្យប្រជាពលរដ្ឋខ្មែរគ្រប់និន្នាការនយោបាយទាំងអស់ ជឿទុកចិត្តលើរដ្ឋាភិបាល ក្នុងការស្វែងរកដំណោះស្រាយលើបញ្ហាព្រំដែនជាមួយនឹងប្រទេសជិតខាងវៀតណាម។ ការអំពាវនាវបានធ្វើឡើង នៅក្នុងវេទិការឯកជនមួយ ដែលលោកបានជួបជាមួយយុវជនមួយក្រុមនៅក្នុងភោជនីយដ្ឋានមួយក្នុងទីក្រុងភ្នំពេញនាថ្ងៃអាទិត្យនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៤
លោក ផៃ ស៊ីផាន ជាអ្នកនាំពាក្យនិងជារដ្ឋលេខាធិការទីស្តីការគណៈរដ្ឋមន្ត្រីផង បានប្រើវេទិការតុអាហារ ដោយបានជួបជាមួយអ្នកសារព័ត៌មាន ប្រិយមិត្ត Facebook និងយុវជនមួយក្រុមនៅថ្ងៃអាទិត្យនេះ ដើម្បីពន្យល់ពីបញ្ហាព្រំដែន នៅក្នុងភោជនីយដ្ឋានយ៉ីសាង (Yi Sang) ក្នុងទីក្រុងភ្នំពេញ។ នៅក្នុងវេទិការដែលមានយុវជនតែ៣ទៅ៤នាក់នេះ លោក ផៃ ស៊ីផាន បានអំពាវនាវឲ្យប្រជាពលរដ្ឋខ្មែរគ្រប់និន្នាការនយោបាយទាំងអស់ ជឿទុកចិត្តលើរដ្ឋាភិបាល ក្នុងការស្វែងរកដំណោះស្រាយលើបញ្ហាព្រំដែនជាមួយនឹងប្រទេសជិតខាងវៀតណាមនេះ។
ការអំពាវនាវនេះ បានធ្វើឡើងចំពេលដែលបញ្ហាព្រំដែនកម្ពុជា-វៀតណាម កំពុងតែឡើងកំដៅ នៅក្នុងរយៈពេលចុងក្រោយនេះ តួយ៉ាងដូចជា ករណីវៀតណាមជីកស្រះចូលក្នុងទឹកដីកម្ពុជាក្នុងខេត្តរតនគីរី និងចុងក្រោយនេះ គឺវៀតណាមបានសាងសង់ប៉ុស្តិ៍យោធានៅតំបន់មិនទាន់ឯកភាពគ្នាក្នុងស្រុកកោះធំខេត្តកណ្តាលជាដើម។ ហើយឆ្លើយតបទៅនឹងការរំលោភបំពាននេះ រដ្ឋាភិបាលកម្ពុជា តាមរយៈក្រសួងការបរទេស ក៏បានចេញកំណត់ទូតតវ៉ាជាបន្តបន្ទាប់រួចមកហើយ ដែលលោក ផៃ ស៊ីផាន បានចាត់ទុកថា ជាយន្តការផ្លូវច្បាប់ដោយផ្អែកលើមិត្តភាព និង សន្តិភាពនិយម។
នៅក្នុងវេទិការនេះ លោកផៃ ស៊ីផាន ក៏បានរិះគន់ទៅលើសកម្មភាពរបស់ក្រុមអ្នកតំណាងរាស្ត្របក្សប្រឆាំង ដែលបានចុះទៅពិនិត្យមើលព្រំដែននៅស្រុកកោះធំ ខេត្តកណ្តាលកាលពីថ្ងៃសៅរិ៍ផងដែរ។ ការចុះទៅពិនិត្យមើលព្រំដែន នៅស្រុកកោះធំខេត្តកណ្តាល របស់ក្រុមអ្នកតំណាងរាស្ត្រគណបក្សប្រឆាំងដែលត្រូវបានអាជ្ញាធរហាមឃាត់។ លោក ផៃ ស៊ីផាន បានហៅសកម្មភាពនេះថា ជាការដុតកំដៅព្រំដែនកម្ពុជា-វៀតណាមឲ្យកាន់តែកើនឡើងខ្លាំងទៅវិញទេ។ ហើយថា សកម្មភាពនេះ គឺដើម្បីតែល្អមើលតែប៉ុណ្ណោះ។ បើតាមអ្នកនាំពាក្យរូបនេះ ក្នុងគលៈទេសៈនេះ ប្រជាពលរដ្ឋខ្មែរទាំងអស់គួរតែឈនៅពីក្រោយរដ្ឋាភិបាល ដើម្បីដោះស្រាយបញ្ហាព្រំដែននេះ ទៅតាមយន្តការការទូត ការចរចារនយោបាយ ហើយបើគ្មានប្រសិទ្ធភាព នោះកម្ពុជានឹងប្រើយន្តផ្លូវច្បាប់អន្តរជាតិ ដូចដែលកម្ពុជាបានធ្វើ ជាមួយភាគីថៃ នៅក្នុងជម្លោះព្រំដែនប្រាសាទព្រះវិហារជាដើម។
ទាក់ទងនឹងបញ្ហាព្រំដែននេះដែរ លោក ផៃ ស៊ីផាន បានប្រកាសថា រដ្ឋាភិបាលកម្ពុជា នឹងធ្វើវេទិការបើកចំហមួយ នៅថ្ងៃទី១១ខែវិច្ឆិការឆ្នាំ២០១៥ខាងមុខនេះ ដើម្បីពន្យល់បន្ថែមទៀតពីបញ្ហាព្រំដែនកម្ពុជាជាមួយប្រទេសជិតខាងពិសេសជាមួយនឹងប្រទេសថៃ និងវៀតណាម។ វេទិការនោះ នឹងមានការចូលរួមពីលោក ហោ ណាំហុង រដ្ឋមន្ត្រីក្រសួងការបរទេស និងលោក វ៉ា គីមហុង ប្រធានគណៈកម្មាធិការព្រំដែនកម្ពុជាផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ