កំពង់ផែស្វយ័តភ្នំពេញប្រកាសលក់ភាគហ៊ុន២០ភាគរយចាប់ពីថ្ងៃនេះតទៅ
កំពង់ផែស្វយ័តភ្នំពេញទទួលបានការអនុញ្ញាត្តពីរដ្ឋាភិបាលសម្រេចឲ្យលក់ភាគហ៊ុន២០ភាគរយចាប់ពីថ្ងៃជូនដំណឹងនេះតទៅ។ ហើយតាមគម្រោងនៅពីរឆ្នាំបន្តខាងមុខរដ្ឋាភិបាលនឹងលក់ភាគហ៊ុន១០ភាគរយបន្ថែមទៀត។ ការប្រកាសនេះធ្វើឡើងបន្ទាប់ពីការបោះផ្សាយលក់មូលបត្រកម្មសិទ្ធលើកដំបូងនិងជាសាធារណៈរបស់កំពង់ផែភ្នំពេញនៅព្រឹកថ្ងៃចន្ទនេះនាសណ្ឋាគារ សូហ្វីតែល។
ចុះផ្សាយនៅថ្ងៃ៖
ស្តាប់ - ០១:៤១
កំពង់ផែស្វយ័តក្រុងភ្នំពេញមានហ៊ុនសរុបនៅក្នុងដៃចំនួន៤លាន១សែនហ៊ុនសម្រាប់ការបោះផ្សាយលក់មូលបត្រកម្មសិទ្ធជាលើកដំបូង។ ហើយក្នុងមួយភាគហ៊ុនស្ថិតក្នុងតម្លៃទាប១.០៨ដុល្លារនិងតម្លៃខ្ពស់១.៥៥ដុល្លារ។ នេះបើតាមការបញ្ជាក់របស់លោក ហ៊ី បាវី ប្រតិភូរាជរដ្ឋាភិបាលទទួលបន្ទុកជាប្រធានអគ្គនាយកកំពង់ផែស្វយ័តភ្នំពេញ។
វត្តមានជាលើកដំបូងនៅក្នុងទីផ្សារមូលបត្ររបស់កំពង់ផែភ្នំពេញលោក ហ៊ី បាវី មិនរំពឹងនឹងទទួលបានជោគជ័យទាំងស្រុងនោះព្រោះថា ភាគហ៊ុនកំពង់ផែភ្នំពេញស្ថិតនៅក្នុងទីផ្សារមួយតូចចង្អៀតនិងមិនសូវមានការទទួលស្គាល់។ ម្យ៉ាងទៀតលោកបានគត់សម្គាល់ឃើញថាកន្លងមកមានសហគ្រាសចំនួនពីរទាំងឯកជននិងរដ្ឋរហូតមកដល់ពេលនេះមិនទាន់មានការជួញដូរភាគហ៊ុន។ តែយ៉ាងណាក៏ដោយដើម្បីកុំឲ្យជួបការអស់សង្ឃឹមកំពង់ផែស្វយ័តភ្នំពេញនឹងពង្រឹងទៅលើការគ្រប់គ្រងគណនេយ្យនិងហិរញ្ញវត្ថុឲ្យមានតម្លាភាពដើម្បីទទួលបានការទុកចិត្តពីអ្នកវិនិយោគ។
លោក ហ៊ី បាវី ឲ្យដឹងទៀតថា ការលក់ភាគហ៊ុនចែកចេញពីជាពីរដំណាក់គឺដំបូងលក់ទៅឲ្យមន្ត្រីធ្វើការនៅកំពង់ផែស្វយ័តចំនួន១០ភាគរយនិងបន្ទាប់មកលក់ទៅក្រុមអ្នកវិនិយោគទុកចំនួន៣៥ភាគរយ។ ហើយការលក់ភាគហ៊ុន២០ភាគរយនេះគឺជាដំណាក់ដំបូងនៃការប្រមូលដើមទុនបូកជាមួយប្រាក់សន្សំរបស់កំពង់ផែដែលមានស្រាប់យកទៅពង្រីកវិសាលភាពកំពង់ផែដែលបច្ចុប្បន្នផ្ទុក១៥កុងតឺនឺនិងកើនដល់៣០ម៉ឺនកុងតឺនឺក្នុងមួយឆ្នាំសម្រាប់ការអភិវឌ្ឍជំហ៊ានទី២ចាប់ពីឆ្នាំ២០១៦ដល់២០១៨។ សូមបញ្ជាក់ថា រហូតមកដល់ពេលនេះ គឺមានក្រុមហ៊ុនចំនួន៣ប៉ុណ្ណោះទេដែលបានដាក់ភាគហ៊ុនរបស់ខ្លួនទៅក្នុងទីផ្សារមូលបត្រ។ នោះគឺរដ្ឋករស្វយ័តក្រុងភ្នំពេញ និងក្រុមហ៊ុនរោងចក្រតៃវ៉ាន់ និងពេលនេះ គឺកំពង់ផែស្វយ័តក្រុងភ្នំពេញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ