បីខែដើមរដូវវស្សា ការដាំដុះធ្លាក់ចុះ ខណៈគ្រោះរាំងស្ងួតប៉ះពាល់ដល់ខេត្តក្រុងចំនួន១២
របាយការណ៍របស់ក្រសួងកសិកម្មបង្ហាញថា ការដាំដុះស្រូវរដូវវស្សាឆ្នាំនេះ បានធ្លាក់ចុះបើប្រៀបធៀបនឹងរយៈពេលដូចគ្នាកាលពីឆ្នាំមុន។ ការដាំដុះធ្លាក់ចុះ ដោយសារតែកម្ពុជាបានជួបប្រទះនឹងគ្រោះរាំងស្ងួតដែលធ្វើឲ្យប៉ះពាល់ដល់ខេត្តក្រុងចំនួន១២នៅទូទាំងប្រទេស ក្នុងនោះខេត្តកំពង់ស្ពឺប៉ះពាល់ធ្ងន់ធ្ងរជាងគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
ខេត្តដែលប៉ះពាល់ដោយគ្រោះរាំងស្ងួតបីខែមកនេះរួមមាន ខេត្តបន្ទាយមានជ័យ បាត់ដំបង កំពង់ចាម កំពង់ឆ្នាំង កំពង់ស្ពឺ ខេត្តកំពង់ធំ កណ្តាល ព្រៃវែង ពោធិសាត់ តាកែវ ឧត្តរមានជ័យ និងក្រុងភ្នំពេញ ហើយខេត្តដែលប៉ះពាល់ធ្ងន់ធ្ងរជាងគេ គឺខេត្តកំពង់ស្ពឺ។ នេះបើតាមរបាយការណ៍ស្តីពីសភាពការណ៍នៃការបង្ករបង្កើនផលដំណាំរដូវវស្សាឆ្នាំ២០១៥ ដែលចេញផ្សាយដោយក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី៣០កក្កដា ហើយដែលវិទ្យុបារាំងអន្តរជាតិទើបនឹងទទួលបាននៅថ្ងៃទី៨សីហានេះ។
ផ្អែកតាមរបាយការណ៍នេះ ការដាំដុះស្រូវវស្សាឆ្នាំនេះ មានការធ្លាក់ចុះ បើប្រៀបធៀបនឹងរយៈពេលដូចគ្នាកាលពីឆ្នាំមុន។ គិតត្រឹមចុងខែកក្កដាកន្លងទៅ នៅទូទាំងប្រទេស ការស្ទូងនិងព្រោះស្រូវក្នុងរដូវវស្សាសម្រេចបានតែចំនួន១៥៥៧១៦៨ហិចតា ស្មើនឹង៦០.៦៦%នៃផែន ការជាង២លានហិចតា ពោលគឺតិចជាង១២១ ១០៥ ហិចតា បើប្រៀបធៀបក្នុងរយៈពេលដូចគ្នាកាលពីឆ្នាំមុន។ ការធ្លាក់ចុះ គឺដោយសារតែកម្ពុជាជួបគ្រោះរាំងស្ងួត។ គ្រោះរាំងស្ងួត ដែលបានធ្វើឲ្យប៉ះពាល់ដល់ផ្ទៃដីដាំដុះសរុបចំនួនជាង១៥ម៉ឺនហិចតា នៅក្នុងខេត្តក្រុងទាំង១២ ហើយក្នុងនោះមានសំណាបសរុបចំនួន ២៣៤៤ ហិចតា និងសន្ទូង-ស្រូវពង្រោះចំនួន ១៥២ ៥០៩ហិចតាបានរងផលប៉ះពាល់ហើយសំណាប៦៤ហិចតាស្ថិតនៅក្នុងខេត្តកំពង់ស្ពឺបានរងការខូចខាតទាំងស្រុង។
ប្រឈមុខនឹងបញ្ហានេះ កាលពីថ្ងៃទី៧សីហា មជ្ឈមណ្ឌលសិក្សានិងអភិវឌ្ឍន៍កសិកម្មកម្ពុជា ហៅកាត់ថា សេដាក បានចេញសេចក្តីប្រកាសព័ត៌មានមួយ ដោយបានអំពាវនាវឲ្យប្រជាកសិករខ្មែរ ត្រៀមខ្លួនឲ្យបានល្អសម្រាប់ការធ្វើស្រែ និងដាំដំណាំផ្សេងៗទៀតនៅចុងរដូវវស្សានេះ បើទោះបីជាប៉ុន្មានថ្ងៃមកនេះ កម្ពុជាមានភ្លៀងធ្លាក់នៅតាមតំបន់ជាច្រើនហើយក្តី។
គួរកត់សំគាល់ថា នៅឆ្នាំនេះ ប្រជាកសិករខ្មែរភាគច្រើន បានបែរមកធ្វើស្រូវពង្រោះច្រើនជាងស្រូវស្ទូង ដោយសារតែបញ្ហាគ្រោះរាំងស្ងួត នឹងដោយសារខ្វះកម្លាំងពលកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ