លោកនាយករដ្ឋមន្ត្រីអំពាវនាវជាលើកទី២ មិនឲ្យរថយន្តឈ្នួលឡើងថ្លៃ
លោកនាយករដ្ឋមន្ត្រី ហ៊ុន សែន បានអំពាវនាវជាថ្មីម្តងទៀត ឲ្យម្ចាស់រថយន្តឈ្នួលទាំងអស់កុំដំឡើងថ្លៃរថយន្តឈ្នួលខ្លាំងពេក នៅពេលដែលកម្មករ កម្មការនី ត្រឡប់មករាជធានីភ្នំពេញវិញ ក្រោយចប់ពិធីបុណ្យភ្ជុំបិណ្ឌ។ លោកបានថ្លែងយ៉ាងដូច្នេះ តាមរយៈវីដេអូមួយ ដែលបានបង្ហោះនៅលើទំព័រហ្វេសប៊ុករបស់លោកនាព្រឹកថ្ងៃទី១២ តុលានេះ ពីប្រទេសចិន។
ចុះផ្សាយនៅថ្ងៃ៖
ស្តាប់ - ០២:១៩
“ខ្ញុំព្រះកុរណាខ្ញុំ ក៏នៅបន្តអំពាវនាវឲ្យអ្នកប្រើប្រាស់ឡានឈ្នួលទាំងឡាយ មេត្តាកុំដំឡើងថ្លៃ ដែលហួសហេតុពេក។ ដំឡើងថ្លៃរួចមកហើយ! តែសូមកុំដំឡើងថ្លៃបន្ថែមទៀត នៅពេលដែលប្រជាពលរដ្ឋសម្រុកចូលមកកាន់ទីក្រុងវិញ ដែលក្នុងនោះមានកម្មករ កម្មការនី សិស្ស និងនិស្សិតជាដើម។” នេះជាការថ្លែងរបស់លោកនាយករដ្ឋមន្ត្រី ហ៊ុន សែន ពីប្រទេសចិន នៅព្រឹកថ្ងៃទី១២ តុលានេះ ក្នុងឳកាសដែលលោក ចូលរួមវេទិកា និងសន្និសីទមួយចំនួន ដែលនឹងប្រព្រឹត្តទៅចាប់ពីថ្ងៃទី១២ តុលា ដល់ថ្ងៃទី១៧ ខែតុលា ឆ្នាំ២០១៥ នៅទីក្រុងម៉ាកាវ និង ទីក្រុងប៉េកាំង ប្រទេសចិន។ នេះបើតាមសេចក្តីជូនដំណឹងរបស់ក្រសួងការបរទេសកម្ពុជា។
ការបន្តអំពាវនាវ ចំពោះម្ចាស់រថយន្តឈ្នួលកុំឲ្យឡើងថ្លៃ របស់លោកនាយករដ្ឋមន្ត្រី ហ៊ុន សែន បានធ្វើឡើង ក្រោយពីលោកធ្លាប់បានអំពាវនាវម្តងរួចមកហើយ កាលពីថ្ងៃទី ២២ខែកញ្ញា មុនឱកាសបុណ្យភ្ជុំបិណ្ឌ ដែលប្រជាពលរដ្ឋខ្មែរក្នុងរាជធានីភ្នំពេញ ជាពិសេស សិស្ស និស្សិត កម្មករ កម្មការនី ធ្វើដំណើរទៅកាន់ស្រុកកំណើត ដើម្បីជួបជុំក្រុមគ្រួសារ។
បើទោះបីជាមានការអំពាវនាវស្ទើរតែរាល់ឆ្នាំ ពីនាយករដ្ឋមន្ត្រីកម្ពុជាក៏ដោយ ប៉ុន្តែថ្លៃឈ្នួលរថយន្តនៅតែបន្តឡើងថ្លៃដដែល ក្នុងឳកាសបុណ្យជាតិសំខាន់ៗ។ លោក បណ្ឌិត កង ច័ន្ទដារ៉ារ័ត្ន អ្នកវិភាគផ្នែកសេដ្ឋកិច្ច ធ្លាប់បានថ្លែងប្រាប់វិទ្យុបារាំង កាលពីថ្ងៃទី១០ តុលា ថា ការទាមទារនេះ គឺជាការទាមទារបញ្ច្រាសពីចរាចរណ៍ទីផ្សារ ព្រោះថាក្នុងឳកាសរដូវបុណ្យជាតិធំៗ យើងមិនអាចទាមទារឲ្យតម្លៃរថយន្តឈ្នួលចុះថ្លៃទេ។ លោកបន្តថា បើចង់ឲ្យតម្លៃរថយន្តឈ្នួលចុះថ្លៃ លុះត្រាតែតម្លៃទំនិញផ្សេងៗ នៅលើទីផ្សារចុះព្រមគ្នាដែរ។
អ្នកវិភាគសេដ្ឋកិច្ចរូបនេះ បានបញ្ជាក់ថា គ្មានយន្តការណាផ្សេងទេ ដើម្បីដោះស្រាយបញ្ហាឡើងថ្លៃនេះ លុះត្រាតែរដ្ឋជួលរថយន្តឈ្នួល ឬរដ្ឋជួលរថយន្តពីបណ្តាប្រទេសផ្សេងៗទៀត ដើម្បីដឹកជញ្ជូនក្នុងតម្លៃថោក។ លោកបានបង្ហាញជំនឿចិត្តយ៉ាងដូច្នេះថា កម្ពុជាមិនអាចធ្វើបែបនេះ បានទេ ដោយសារតែក្នុងមួយឆ្នាំៗរដ្ឋាភិបាលធ្លាប់បានចំណាយយ៉ាងច្រើនទៅលើបុណ្យជាតិសំខាន់ៗ។
ចំណែកបុគ្គលិករបស់ក្រុមហ៊ុនផ្តល់សេវារថយន្តដឹកអ្នកដំណើរមួយក្នុងទីក្រុងភ្នំពេញ បានបញ្ជាក់ប្រាប់វិទ្យុបារាំងថា ការដំឡើងថ្លៃនេះ គឺមិនច្រើននោះទេ តែក្រុមហ៊ុនយកប្រាក់ដំឡើងនេះ ដើម្បីឧបត្ថមសម្រាប់បុគ្គលិក ដែលធ្វើការបន្ថែមម៉ោង ដោយមិនបានឈប់សម្រាកក្នុងឳកាសបុណ្យភ្ជុំបិណ្ឌនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ