ជនជាតិអូស្ត្រាលីម្នាក់ និងខ្មែរពីរនាក់ត្រូវបានចាប់ខ្លួន ជុំវិញការផ្តល់សេវាពពោះជំនួស
ជនជាតិអូស្ត្រាលីម្នាក់ និងជំនួយការជនជាតិខ្មែរពីរនាក់ត្រូវបានប៉ូលីសប្រឆាំងការជួញដូរមនុស្សរបស់ក្រុងភ្នំពេញចាប់ខ្លួន កាលពីល្ងាចថ្ងៃសុក្រ ក្រោយពីបានស៊ើបអង្កេតរកឃើញថាពួកគេជាខ្សែបណ្តាញផ្តល់សេវាពពោះជំនួសនៅក្នុងប្រទេសកម្ពុជា។ ការចាប់ខ្លួននេះធ្វើឡើងក្រោយពីរដ្ឋាភិបាលកម្ពុជា ពិចារណាបង្កើតច្បាប់ស្តីពីការពពោះជំនួស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៥
នេះគឺជាលើកទី១ហើយ ដែលប៉ូលីសប្រឆាំងការជួញដូរមនុស្សរបស់ក្រុងភ្នំពេញ បានចាប់ផ្តើមវិធានការក្តៅបង្រ្កាបសេវាពពោះជំនួសនៅក្នុងប្រទេសកម្ពុជា។ ក្នុងប្រតិបត្តិការនោះ ប៉ូលីសបានចាប់ខ្លួនស្រី្តជនជាតិអូស្ត្រាលីម្នាក់ និងជំនួយការជាជនជាតិខ្មែរពីរនាក់ ដែលមានស្រ្តីម្នាក់ និងបុរសម្នាក់។ នេះបើតាមលោកកែវ ធា ប្រធានការិយាល័យប្រឆាំងការជួញដូរមនុស្សរាជធានីភ្នំពេញ។
មុនឈានដល់ការចាប់ខ្លួននេះ ក្រុមការងាររបស់លោកបានបើកការស៊ើបអង្កេតរយៈពេល១០ខែមកហើយ។ លោកកែវ ធាបញ្ជាក់ថា កន្លងមកស្រី្តជនជាតិអូស្ត្រាលីឈ្មោះ Tammy Davis-Charles អាយុ៤៩ឆ្នាំ បានធ្វើអាជីវកម្មផ្តល់សេវាពពោះជំនួសនៅប្រទេសថៃ ប៉ុន្តែដោយសារតែប្រទេសថៃរឹតបន្តឹងច្បាប់ ទើបគេរត់មករកស៊ីបែបនេះនៅប្រទេសកម្ពុជាវិញ ដោយសារមិនទាន់មានច្បាប់គ្រប់គ្រងលើផ្នែកនេះនៅឡើយ។
លោកបានបន្តថានៅពេលដែលស្រ្តីជនជាតិអូស្រា្តលីរូបនេះ បង្កើតអាជីវកម្មពពោះជំនួសនៅប្រទេសខ្មែរគេបានបង្កើតបណ្តាញបន្ថែមទៀត ដើម្បីដើរលួងលោមមនុស្សឲ្យស៊ីឈ្នួលពពោះជំនួស។ ប្រធានការិយាល័យប្រឆាំងការជួញដូរមនុស្សរាជធានីភ្នំពេញ ថានៅថ្ងៃទី២០ ខែវិច្ឆកានេះ ប៉ូលីសបានបញ្ជូនក្រុមមនុស្សទាំងនេះទៅតុលាការ ដើម្បីសាកសួរ ហើយសាលាដំបូងនឹងបន្តការសាកសួរនៅថ្ងៃទី២១ ខែវិច្ឆកា បន្ថែមទៀត។ ពួកគេអាចនឹងត្រូវជាប់ពន្ធនាគារប្រមាណពី៦ខែ ទៅ២ឆ្នាំ។
ក្នុងរយៈពេលជិតមួយឆ្នាំដែលពួកគេបង្កើតបណ្តាញទទួលពពោះជំនួសនេះ ពួកគេបានរកស្ត្រី២៣នាក់ ដែលជាអ្នកពពោះជំនួស ហើយមាន៥នាក់បានផ្តល់កំណើតទារក៥រួចមកហើយ។ នេះបើតាមលោកកែវ ធា។
សូមបញ្ជាក់ថាប្រតិបត្តិការបង្ក្រាបការផ្តល់សេវាពពោះជំនួសនេះធ្វើឡើងក្រោយពេលរដ្ឋមន្ត្រីក្រសួងសុខាភិបាលប្រកាសមិនឲ្យមានការធ្វើអាជីវកម្មពពោះជំនួសក្នុងប្រទេសកម្ពុជា ដោយចាត់ទុកថានេះគឺជាការជួញដូរមនុស្ស។ កាលខែតុលាកន្លងទៅ លោកស្រីរ៉ូណាស្មីត អ្នករាយកាណ៍ពិសេសស្តីពីស្ថានភាពសិទ្ធិមនុស្សកម្ពុជា ក្នុងជំនួបជាមួយរដ្ឋមន្ត្រីក្រសួងយុត្តិធម៌ បានស្វាគមន៍ក្រសួងយុត្តិធម៌ក្នុងការបង្កើតច្បាប់ស្តីពីការពពោះជំនួស ដើម្បីទប់ស្កាត់ការពពោះជំនួសក្នុងប្រទេសកម្ពុជា និងចូលរួមការពារសិទ្ធិស្ត្រី និងកុមារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ