ប៉ូលិសបញ្ជូនអង្គរក្ស ៤ នាក់ របស់លោកឧកញ៉ា ថោង សារ៉ាត់ ទៅតុលាការ
ប៉ូលិស បានបញ្ជូនអង្គរក្ស ៤ នាក់ របស់លោកឧកញ៉ា ថោង សារ៉ាត់ ដែលជាប់ចោទពីបទមនុស្សឃាត បាញ់សម្លាប់លោកឧកញ៉ា អ៊ឹង ម៉េងជឺ ទៅកាន់តុលាការ នៅរសៀលថ្ងៃនេះ។ ដោយឡែកអ្នកពាក់ព័ន្ធផ្សេងទៀត រួមទាំងឪពុកម្តាយរបស់លោក ឧកញ៉ា ថោង សារ៉ាត់ ដែលត្រូវបានចាប់ខ្លួនកាលពីយប់មិញ មិនទាន់មានដំណឹងថា ប៉ូលិស ត្រូវដោះលែង ឬចាត់ការបែបណា នៅឡើយនោះទេ។
ចុះផ្សាយនៅថ្ងៃ៖ កែប្រែថ្ងៃទី៖
អង្គរក្សទាំង ៤នាក់នោះ បានសារភាពថា ខ្លួនមិនមែនជាឃាតកស៊ីឈ្នួលនោះទេ តែគ្រាន់តែធ្វើតាមបញ្ជាមេ ជាថ្នូរនឹងការសន្យាឱ្យផ្ទះម្នាក់ ១ល្វែង។នេះបើតាមការបង្ហាញព័ត៌មាន នៅលើទំព័រសាលារាជធានីភ្នំពេញ។
អង្គរក្ស ៤នាក់ ដែលប៉ូលិសបញ្ជូនទៅតុលាការនោះ រួមមាន ទី១-ឈ្មោះ សៀង វាសនា ជាឃាតក ទី២-ឈ្មោះ លី សៅ ជាអ្នកបើកម៉ូតូឌុបជនដៃដល់ធ្វើសកម្មភាព ទី៣-ឈ្មោះ មាស សម្បត្តិ ជាអ្នកបើកម៉ូតូសម្រាប់ការពារពីក្រោយ និងទី៤-ឈ្មោះ កូយ ចាន់ថុល ជាអ្នកជិះម៉ូតូពីក្រោយ ហើយជាអ្នកមកពិនិត្យមើលសពរបស់ជនរងគ្រោះក្រោយកើតហេតុ។
លោក ជួន ណារិន ស្នងការរងនគរបាលរាជធានីភ្នំពេញ បានឲ្យដឹងថា លោកឧកញ៉ា ថោង សារ៉ាត់ ជាម្ចាស់បុរី៩៩៩ ត្រូវបានសមត្ថកិច្ច រកឃើញថា ជាអ្នករៀបចំគម្រោងយ៉ាងលម្អិត តាំងពីដើមរហូតដល់ចប់ ដើម្បីសម្លាប់ឧកញ៉ា អ៊ឹង ម៉េងជឺ ថៅកែស៊ីម៉ងតិ៍ពេជ្រ និងហាងពេជ្រ ហុងកុង ប៉ុន្តែលោក ណារិន មិនទាន់បញ្ជាក់ពីមូលហេតុនៅឡើយទេ ល្គឹកណាចាប់ខ្លួនមេខ្លោងមិនទាន់បាន។
សូមបញ្ជាក់ថា ក្រោយពីប្រតិបត្តិការពេញមួយយប់ ថ្ងៃពុធទី៣ធ្នូ ឈានដល់ថ្ងៃព្រហស្បត្តិ៍នេះ សមត្ថកិច្ចកម្ពុជា បានសម្រេចឃាត់ខ្លួនមនុស្សសរុប ១៤នាក់ ក្នុងនោះ រួមមានឱពុកម្តាយ អង្គរក្ស រួមទាំងប្រពន្ធ និងអ្នកបំរើរបស់លោកឧកញ៉ា ថោង សារ៉ាត់។ ដោយឡែក មេខ្លោងក្នុងករណីឃាតកម្មលើឧកញ៉ា អ៊ឹង ម៉េងជឺ គឺលោកឧកញ៉ា ថោង សារ៉ាត់ កំពុងរត់គេចខ្លួន។
យោងតាមគេហទំព័រសាលារាជធានីវិញ ក្នុងចំនោមអាវុធទាំង ៨ ដើម ដែលរកឃើញដោយសមត្ថកិច្ចនោះ ៣ដើម បានរកឃើញនៅផ្ទះឧកញ៉ា ថោង សារ៉ាត់ នៅសង្កាត់ចាក់អង្រែក្រោម ក្នុងប្រតិបត្តិការឆែកឆេរម៉ោង២២ និង៤០នាទីយប់ ចំណែកអាវុធ ៣ ដើមផ្សេងទៀត បានរកឃើញនៅគេហដ្ឋានទីពីររបស់គ្រួសារនេះ ហើយ ២ដើមចុងក្រោយ រកឃើញ ក្នុងរថយន្ត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ