ឆាកនយោបាយខ្មែរឡើងកម្ដៅជាថ្មីនៅពេលការបោះឆ្នោតខិតជិតមកដល់
ចុះផ្សាយនៅថ្ងៃ៖
ស្តាប់ - ០៤:០២
កាលពីថ្ងៃចន្ទ ក្រុមតំណាងរាស្ត្រមកពីគណបក្សប្រជាជនកម្ពុជា ទើបតែបោះឆ្នោតធ្វើវិសោធនកម្មបទបញ្ជាផ្ទៃក្នុងរដ្ឋសភា ប្រការ៤៨ថ្មី៣ ដែលស្មើនឹងការលុបចោលតំណែងប្រធានក្រុមមតិភាគតិចនៃរដ្ឋសភា របស់លោក កឹម សុខា។ មិនត្រឹមតែប៉ុណ្ណោះ លោកនាយករដ្ឋមន្ដ្រី ហ៊ុន សែន ក៏បានស្នើទៅកាន់តំណាងរាស្ត្របក្សកាន់អំណាច ឲ្យរៀបចំធ្វើវិសោធនកម្មច្បាប់ស្ដីពីគណបក្សនយោបាយផងដែរ។ ជាការធ្វើវិសោធនកម្ម ដើម្បីរារាំងមិនឲ្យអ្នកដែលជាទណ្ឌិត ធ្វើជាប្រធានឬអនុប្រធានគណបក្ស។ ទាំងនេះគឺជាការឡើងកម្ដៅនៅក្នុងឆាកនយោបាយខ្មែរ ដែលគួរជះទឹកពន្លត់ឲ្យបានឆាប់ មុនការបោះឆ្នោតខែមិថុនាចូលមកដល់។
កាលពីចុងឆ្នាំ ២០១៦ ឆាកនយោបាយខ្មែរមានសភាពត្រជាក់ល្ហឹម នៅពេលប្រធានស្ដីទីបក្សប្រឆាំង គឺលោក កឹម សុខា ត្រូវបានព្រះមហាក្សត្រព្រះរាជទានលើកលែងទោស ហើយលោកបានជួបសន្ទនាយ៉ាងរាក់ទាក់ជាមួយលោកនាយករដ្ឋមន្ដ្រីហ៊ុន សែន នៅឯវិមានរដ្ឋសភា។ ប៉ុន្តែជាង១ខែក្រោយមក ពោលគឺនៅចុងខែមករាថ្មីៗនេះ ប្រមុខរដ្ឋាភិបាលកម្ពុជាបានយកវេទិកាសភាជិត១ម៉ោង វាយប្រហារខ្លាំងៗទៅលើថ្នាក់ដឹកនាំគណបក្សសង្គ្រោះជាតិ។
មិនត្រឹមតែវាយប្រហារដោយពាក្យសម្ដីប៉ុណ្ណោះទេ លោកនាយករដ្ឋមន្ដ្រីនិងក្រុមតំណាងរាស្ត្រមកពីគណបក្សប្រជាជនកម្ពុជា បានបោះឆ្នោតធ្វើវិសោធនកម្មបទបញ្ជាផ្ទៃក្នុងរដ្ឋសភា ប្រការ៤៨ថ្មី៣ ដែលស្មើនឹងការលុបចោលតំណែងប្រធានក្រុមមតិភាគតិចនៃរដ្ឋសភា របស់លោក កឹម សុខា។ លោកក៏បានស្នើទៅកាន់តំណាងរាស្ត្របក្សកាន់អំណាច ឲ្យរៀបចំធ្វើវិសោធនកម្មច្បាប់ស្ដីពីគណបក្សនយោបាយផងដែរ។ ជាការធ្វើវិសោធនកម្ម ដើម្បីរារាំងមិនឲ្យអ្នកដែលជាទណ្ឌិត ធ្វើជាប្រធានឬអនុប្រធានគណបក្ស។
មែនទែនទៅ នេះមិនមែនជារឿងប្លែកទេសម្រាប់ឆាកនយោបាយកម្ពុជា។ កន្លងមក គេសង្កេតឃើញថា ទំនាក់ទំនងល្អរវាងអ្នកនយោបាយនៅកម្ពុជា ជាពិសេសអ្នកនយោបាយគូបដិបក្ខមិនដែលស្ថិតស្ថេរគង់វង្សបានយូរអង្វែងឡើយ។ គឺតែងតែបែកបាក់គ្នាទៅវិញ បន្ទាប់ពីយល់ចិត្តគ្នាមិនបានរយៈពេលប៉ុន្មានផងនោះ។ ការបែកបាក់នេះ ច្បាស់ណាស់ គឺបណ្ដាលមកពីភាពមិនទុកចិត្តគ្នា ឬអាក្រក់ជាងនេះ គឺបណ្ដាលមកពីភាពមិនស្មោះត្រង់នឹងគ្នាតែម្ដង។
ការបែកបាក់របស់អ្នកនយោបាយគូបដិបក្ខ ពេលខ្លះឆ្លុះបញ្ចាំងឲ្យឃើញតាមរយៈពាក្យសម្ដីឌឺដង ចោទប្រកាន់ និងវាយប្រហារ។ ប៉ុន្តែពេលខ្លះទៀត ការទាស់ទែងគ្នាឈានដល់ការប្ដឹងផ្ដល់តាមផ្លូវតុលាការ ឬការបង្កើតវិធានផ្លូវច្បាប់ប្រឆាំងនឹងអ្នកនយោបាយផងក៏មាន។
បើទោះបីជាទំនាក់ទំនងល្អរវាងអ្នកនយោបាយខ្មែរមិនសូវកើតមានញឹកញាប់ដូចទំនាស់ក៏ដោយ ក៏អ្នកវិភាគនយោបាយ និងប្រជាពលរដ្ឋទូទៅនៅតែទទូចចង់ឃើញអ្នកនយោបាយបង្រួបបង្រួមគ្នា ជជែកគ្នាដើម្បីដោះស្រាយបញ្ហាសំខាន់ៗរបស់ជាតិ។ ប៉ុន្តែ ដើម្បីឲ្យទំនាក់ទំនងល្អកើតឡើងបាន វាទាល់តែអ្នកនយោបាយខ្លួនឯងមានឆន្ទៈខ្ពស់ ស្មោះត្រង់នឹងគ្នា ហើយតម្កល់ផលប្រយោជន៍ជាតិ ធំជាងផលប្រយោជន៍ផ្ទាល់ខ្លួន គ្រួសារ និងបក្សពួក។ ព្រោះបើពុំដូច្នោះទេ ទំនាក់ទំនងនោះ បើទោះបីជាបង្កើតឡើងហើយក៏ដោយ ក៏វាគង់រលត់ទៅវិញជាក់ជាពុំខាន។ មិនត្រឹមតែប៉ុណ្ណោះ វានឹងជះឥទ្ធិពលអាក្រក់ដល់ជាតិទៀតផង។
ជាក់ស្ដែងដូចជាករណីកម្ដៅនយោបាយចុងក្រោយនេះអ៊ីចឹង។ លោកនាយករដ្ឋមន្ដ្រីហ៊ុន សែន បានចោទគណបក្សសង្គ្រោះជាតិថា ប្រើយុទ្ធសាស្ត្រចាប់ដៃជាន់ជើង។ ប៉ុន្តែសម្រាប់គណបក្សប្រឆាំង រឿងរ៉ាវដែលកើតឡើងនាពេលថ្មីៗនេះ គឺជាការបង្ករឿងរបស់បក្សកាន់អំណាច។ សង្គ្រាមពាក្យសម្ដីរវាងគណបក្សនយោបាយធំៗទាំងពីរនេះ ជះឥទ្ធិពលអាក្រក់៣។ ទី១៖ វាធ្វើឲ្យអ្នកគាំទ្រគណបក្សនយោបាយបាត់បង់ទំនុកចិត្ត។ ទី២៖ វាបង្កើតឲ្យមានភាពមិនទុកចិត្តគ្នាកាន់តែខ្លាំងឡើងៗ ក្នុងចំណោមអ្នកនយោបាយ។ ទី៣៖ វាធ្វើឲ្យមានការបែងចែក និងបែកបាក់នៅក្នុងសង្គមជាតិ ដែលជាហេតុធ្វើឲ្យប្រទេសមិនអាចអភិវឌ្ឍច្បាស់លាស់ ពិតប្រាកដ។ នៅទីបំផុត តើអ្នកដែលរងគ្រោះដោយសារផលវិបាកទាំងនេះ មិនមែនជាប្រជាពលរដ្ឋ និងប្រជាជាតិខ្មែរខ្លួនឯងឬយ៉ាងណា?
សរុបមកវិញ ទំនាស់រវាងអ្នកនយោបាយជះឥទ្ធិពលអាក្រក់ណាស់ ទាំងសម្រាប់គណបក្សនយោបាយខ្លួនឯង និងសម្រាប់សង្គមជាតិ។ អ្នកនយោបាយ បើទោះបីជាគូបដិបក្ខគ្នា ក៏មិនមែនមានន័យថា មិនអាចអង្គុយជជែកគ្នាបានដែរ។ ខណៈដែលការបោះឆ្នោតក្រុមប្រឹក្សាឃុំសង្កាត់កាន់តែខិតជិតចូលមកដល់ កម្ដៅនៅក្នុងឆាកនយោបាយខ្មែរដែលកំពុងតែឆេះរោលរាលនេះ គួរតែត្រូវបានជះទឹកពន្លត់ឲ្យបានឆាប់។ ព្រោះបើពុំដូច្នោះទេ កម្ដៅនេះនឹងជះចំហាយអាក្រក់ដល់ការបោះឆ្នោតនាពេលខាងមុខ ហើយអាចក្លាយទៅជាកម្មវត្ថុនៃការរិះគន់ពីសំណាក់អង្គការសង្គមស៊ីវិលនិងសហគមន៍អន្ដរជាតិផងក៏ថាបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ